Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 21

Yesu ni i kacokiri mi Nazareti

Yesu ni i kacokiri mi Nazareti

LUKA 4:16-31

  • YESU USOMO BUKU M’ADOLA PA ISAYA

  • DHANU MI NAZARETI GIMITO GINEG YESU

M’umbe piem, yakini unyai lee dit i Nazareti. Yesu ular ubino jagob bau i adhura maeno; niai m’eai kud i adhurane ecidh emaku batizo ibang’ Yohana, nwang’u oro ukadhu doko acel ku wie. Re kawoni jung’eye nia etie ng’atu ma timo udu. Dhanu ma keca gibekuro kud ava ma lee dit, gikeginen udu m’ebitimo iwang’gi bende.

Ava migine lund umedere magwei kinde ma gineno Yesu ucidho i kacokiri migi calu m’ubino ng’io pare. Kuca jubed jurwo man jusomo buku pa Musa calu ma jutimo i ‘kacokri ku ba ceng’ Sabatu.’ (Tic mi Jukwenda 15:21) Jubed jusomo bende theng buku mi lembila moko. Kinde ma Yesu uai malu pi nisomo, ecicopere nia eng’iyo wang’ dhanu mapol, pilembe con de ebed ecokere keca. E jugam jumio kitabu m’adola pa jabila Isaya ibang’e. Eyabu kaka ma jukiewo i ie lembe iwi Ng’atu ma tipo pa Yehova uwiro; kaka m’eyabune nwang’ere tin eni i Isaya 61:1, 2.

Lembe ma Yesu usomo iwi Ng’atu maeno ma jular juewo pire uyero nia ng’atune birweyo pi gony ni ng’eca, pi dwoko nenopiny ni abinga man pi bino mi rundi ma Yehova uyio. Kinde m’edaru, edwoko kitabu m’adola ibang’ ju ma gibedo keca, e edok ebedo. Kawoni dhanu zoo uloko wang’gi ibang’e. Ecicopere nia ing’eye eyero lembe mange de, re edok emedo wec mae, ma pire tek: “Tinuni lembagora pa Mungu maeni timbre kakare i ithwu.”​—Luka 4:21.

I dhanu uwang’ lii ikum “lembe mi bero m’uai i dhoge,” man giweco ikindgi kumae: ‘Maeni wod Yosefu ungo?’ Ento kinde ma Yesu unyang’ nia gibemito eketim kit udu ma giwinjo nia etimo kaka mange, emedo wec mae: “Wubiwacu ira lembabola maeni andha, jakeikum cengri giri: gin ceke ma wawinjo utimbre Kapernaum, tim keni i ng’om ma thu ma dhe bende.” (Luka 4:22, 23) Ju maeno ma gilar gikwo karacelo ku Yesu, gineno nia nwang’u i andha, Yesu ucikere nilar caku keyo kum dhanu i pacu ma thugi ma dhe. Pieno ginwang’u ve nia Yesu unenogi ni dhanu ma kony migi mbe.

Yesu ung’eyo paru migi, pieno ekoro lembe moko m’utimere con i Israel. Ekoro kumae: i rundi pa jabila Eliya, montho ubino dupa i Israel, re juoro ngo Eliya ibang’ dhatho moko acel de ikindgi. Ento ecidho ba dhatho ma nya Israel de ngo, m’ubino i Zarefath i ng’om mi Sidon, kaka m’etimo i ie udu m’ubodho kwo. (1 Ubimo 17:8-16) Bende, i rundi pa Elisha, weg dhobu ubino dupa i Israel, ento jabila Elisha ukeyo kum Naman kende ma tie Jacami.​—2 Ubimo 5:1, 8-14.

Iparu nia dhanu maeno ma gitie juthugi Yesu giwinjiri nenedi kinde ma Yesu umio lapor maeno m’ucwaku ngo paru migi ento m’umulo umbili ku koso yioyic migi? Kwinyo ulund uopo i dhanu ceke m’ubino i kacokiri man giwodho Yesu cen kud i adhura. Gitere malu iwi got, kaka ma jugomo i ie adhurane ma dhe, man gimito gicwale epodh ku malu kuca. Ento Yesu uvuth kud i the cing’gi man ecidho ma gin m’utime mbe. Yesu ugam umaku woth eloro i Kapernaum, i dhu wat ma yo malu mi nam Galilaya.