Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 26

“Dubo peri juweko”

“Dubo peri juweko”

MATAYO 9:1-8 MARKO 2:1-12 LUKA 5:17-26

  • YESU UWEKO DUBO PA NG’ATU MA TIE KU THO MA NEGO KUM NDING’ MAN EKEYO KUME

Rwonglembe iwi Yesu udaru yik ucidho bor mandha. Jumapol giai kakare ma tung’ tung’ kara gibin giwinj ponji pare man ginen udu m’ebetimo. Re ing’ei nindo moko, Yesu udok i Kapernaum i kabedo pare. Nyapio pio adhura ceke mi dhu nam Galilaya uwinjo nia edaru dwogo. Pieno, dhanu dupa gibino ibang’e. Ikind dhanu m’ubinone, Jufarisayo de bedo nuti man juponji mi Cik m’uai i Galilaya, i Yahudi man i Yerusalem bende.

‘Dupa gicokri karacelo, ketho kabedo mbe igi kendo cil dhugola de mbe: man ecaku yero igi lembe.’ (Marko 2:2) Kawoni ebecitimo udu ma lee dit. Udune bikonyowa ninyang’ nia Yesu utie ku copo mi kabu cen ulag masendi mi dhanu, man nia ecopo nikeyo kum dhanu ceke m’eng’io nia ekei kumgi.

Kinde ma Yesu ubeponjo i ot moko ma dhanu upong’ i ie, co ang’wen m’uyeyo ng’atu moko ma tie ku tho ma nego kum nding’ ku kavuto, gitundo. Re dhanu upong’ akeca ma “gicopo tundo ceng’ni i bang’ [Yesu] ngo.” (Marko 2:4) Cwiny dhanu maeno copo tur mandhandha! Ento gisayu rieko mi tundo ibang’ Yesu, pieno giidho iwi ot, man giyeco wi ode kaka moko. E giting’o ng’atu ma kume tho nding’ ku kavuto pare, man gilure nitundo i ot.

Nyo ng’ecwiny unego Yesu pilembe nia gikathu ponji pare rek? Nyanok de ngo! Yioyic migi uwang’u i Yesu lii, man eyero ni ng’atu ma kume tho nding’ kumae: “dubo peri juweko.” (Matayo 9:2) Nyo andha Yesu copo niweko dubo pa ng’atuno? Jugorcik ku Jufarisayo gicaku porolembe i adundegi kumae: “Ng’atuni weco kumeni nedi? eyero lembacidi kum Mungu: ng’a ma copo weko dubo woko ndhu ng’atu acel, en e Mungu.”​—Marko 2:7.

Calu ma Yesu ung’eyo lembe mir adundegi, ewacu igi kumae: “Wuporo lembe maeni i adundewu nedi? Makani ma yot ma sagu, wacu ni won tho ma nego kum nding’ kumae, dubo peri juweko; kadi wacu kumae, ai malu, ting’ kavuto peri iwothi?” (Marko 2:8, 9) Andha, Yesu tie ku copo mi weko dubo pa ng’atuno iwi ukungu mi lam ma nwang’u ebecithiero.

Ing’eye, Yesu unyutho ngbeng’ ni udul dhanu man ni ju m’ubeng’ur ikum wec pare nia etie ku copo mi weko dubo iwi ng’om. Eloko wang’e ibang’ ng’atu m’ubetwoyo man eyero ire ku ng’ol kumae: “ai malu ting’ kavuto peri, icidh i ot peri.” Wang’ acel ng’atuno uai malu eting’o kavuto pare ma dhanu m’ubino keca de gibeneno. E igi wang’ lii! Gilund gimio yung ni Mungu giwacu kumae: “Naka fodi waneno wagi eni ki ngo”!​—Marko 2:11, 12.

Etie lembe ma pire tek ning’eyo nia Yesu ulwong’o twoyo nia ‘dubo,’ man kumjo m’ukei nia ‘dubo m’uwekere.’ Biblia uponjo nia Adamu ma tie janyodo mwa ma kwong’a udubo man wan ceke walagu matoke marac mi dubo parene, niwacu remokum man tho. Ento i the Ker pa Mungu, Yesu biweko dubo mi dhanu ceke m’umaru Mungu man m’ubetimo ire. E jubikabu remokum magwei.​—Jurumi 5:12, 18, 19.