Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 40

Ponji iwi wekolembe

Ponji iwi wekolembe

LUKA 7:36-50

  • DHAKU MOKO MA JADUBO UKONJO MO IWI TIEND YESU

  • JUPORO WEKOLEMBE KU NG’ATU M’UTIE KU BANJA

Dhanu ubed ujolo lembe ma Yesu beyero ku m’etimo i kite ma tung’ tung’, nimakere ku lembe mir adundegi. Lembuno unen terere i ot moko i ng’om Galilaya. Jafarisayo moko ma nyinge Simon ulwong’o Yesu ni cam ibang’e, saa moko nyo etimo kumeno kara enen ng’atu maeno m’ubetimo tic ma wang’u ijo ku ceng’ini. Ecicopere nia Yesu uneno nia eno bibedo ire ni kaka mi ponjo dhanu ma gibinwang’iri kugi kuca, uketho eyio nicidho. Ebibedo bende ku kaka mi camu ku weg ajok, man judubo.

Re jujolo ngo Yesu i kite ma jubed jujolo ko welo nja. Calu ma yo mi Palestine upong’ kud utur, wara mi tiendgi uledho man ukwor kud utur, pieno etie lembe mi kurajo nia julwok tiend welo ku pii maleng’. Jutimo ngo lembe maeno ni Yesu. Kadok limbe de jucwiyo ngo pi nijole, calu ma naka jubed jutimo ka welo utundo. Lembe mange ma jubed jutimo, utie niwiro mo iwi welo m’utundo pi ninyutho nia jujole maber. Re lembe maeno de jutimo ngo ni Yesu. Dong’ i andha, jujole ke nenedi?

E welo ubedo i dhu meza, man gicaku nicamu cam. Kinde ma gibecamu, dhaku moko umondo ling’ling’ i ot ma julwong’e ngo. Dhakune ‘ung’eyere i adhura nia etie jadubo.’ (Luka 7:37) Kadok nwang’u dhanu ceke tie judubo de, re ve dhaku maeno ubino nikwo ku kwo mi tarwang’, man ve etie won asara. Cibedo ve egam ewinjo ponji pa Yesu, m’uketho i ie wec m’ewacu nia “wubin i bang’a, kewu ceke ma wumulu ku tic ma ter ma pek unurowu, man abimio iwu yom.” (Matayo 11:28, 29) Ecicopere nia wec pa Yesu ku tic pare, umulo adundene, kawoni dong’ etie kude karacelo.

Kinde ma Yesu ubedo dhu meza, ebino ku yor ing’eye man erum i the tiende. Piwang’e ucwir iwi tiend Yesu, man eyweye ku yukwie. Ecwiyo tiende, man ewiro tiendene ku mo ma ng’wice ng’ar m’eng’iewo. Lembuno ufoyo ngo i Simon, uketho ewecere yor i ie kumae: ‘Ng’atu maeni, tek en e jabila, kuno di eng’eyo nia dhaku maeni utie ng’a, man etie kit dhaku manedi m’umulo kume, ma en e jadubo.’​—Luka 7:39.

Calu ma Yesu ung’eyo paru pa Simon, eyero ire kumae: “Simon, abedo ku gin moko m’ayer iri.” Simon uloko ire kumae: “Japonji, yer.” Yesu umedere niyero ire kumae: ‘Dhanu moko ario gigamu banja ba jadit moko; ng’atu acel ubedo ku banja mi denarii 500, mange ke denarii 50. Calu ma gimbe ku piny ma gicul, eweko igi gin ario kpo. Ka kumeno, makani ma kind ju ario maeni ma bimare ma sagu?’ Ubenen ve lembene unyang’u ngo Simon, pieno edwoko ire kumae: “Awacu nyo ng’atu m’eweko lem pare dit ma sagu.”​—Luka 7:40-43.

Yesu ucwake. I ng’eye, eloko wang’e ba dhakune, man ewacu ni Simon kumae: “Ineno dhaku maeni? Amondo i ot peri, imio pi ira ngo mi tienda: ento ecwiro piwang’e wi tienda, eyweyogi de ku yukwie. Icwiyo limba ngo: ento en, ugambre i kinde m’amondo, eweko cwiyo tienda ngo. Iwiro mo i wia ngo: en ewiro tienda ku mo.” Yesu uneno nia andha dhaku maeno uyewo kud adundene ceke dubo pare mi timo tarwang’. Pieno edaru ku wec ma e: “Awacu iri kumae, dubo pare, m’ubedo dupa uwekre woko; kum emaru dit. Ento ng’atu ma juweko ire nyanok, ng’atuno maru nyanok.”​—Luka 7:44-47.

Yesu ucwaku ngo kura marac mi tarwang’. Ento, ebino ninyutho kisa ni dhanu ma gitimo dubo ma pek, ma re i ng’eye giyewo dubone kud adundegi ceke, man gidwogo ibang’e kara ginwang’ yom. Bende dhaku maeno unwang’u yom i adundene kinde ma Yesu uyero ire wec mae: “Dubo peri wekre woko. . . . Yioyic peri e m’ubodhi; cidh ma cwinyi kwio.”​—Luka 7:48, 50.