Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 42

Yesu ukwero jufarisayo ngbeng’ i dhoggi

Yesu ukwero jufarisayo ngbeng’ i dhoggi

MATAYO 12:33-50 MARKO 3:31-35 LUKA 8:19-21

  • YESU UWECO IWI “GIRANYUTHA PA YONA”

  • PI JULUB PARE TIE TEK I IE NI SAGU PI JUPAGI

Calu ma Jufarisayo ku jugorcik gikwero nia Yesu ubewodho ngo pajogi ku tego pa Mungu, ginyutho kamaleng’ nia giyenyo yero lembacidi ikum tipo maleng’. Lembuno ubenyutho nia gitie i thenge pa ng’a, nyo pa Mungu kunoke pa Sitani? Yesu uwacu kumae: “Kadi wuketh yen udok ber, nyinge de dok ber; kadi wuketh yen udok rac, nyinge de dok rac: kum jung’eyo yen [nikum] nyinge.”​—Matayo 12:33.

Etie lemkasegu niyero nia Yesu uwodho pajogi ku kony pa Sitani, ma ke lundo tic pare utie nyingyen maber. Yesu ugam uyero i saa mi ponji pare iwi got nia, ka nyingyen utie ma cuu, yende de nwang’u tie ma cuu. Pieno nying’yen ma Jufarisayo gicego, niwacu adote mi vupo ma gidoto ko Yesu, ubenyutho ang’o? Ubenyutho nia gitie nyingyen m’utop. Yesu uyero igi kumae: “Wu nyikwai thwol, wucopo yero gin ma ber nenedi ma wun wu raci? Kum kud i gin m’usagre mir adunde e dhok de yero.”​—Matayo 7:16, 17; 12:34.

Eno utie lembe mandha, wec mi dhogwa wodho lembe mir adundewa, man en re m’etie ukungu mi pokolembe. Pieno Yesu uyero kumae: “Awacu iwu, nia ku ba lembe ceke ma kite mbe ma dhanu biyero gibitito pire ceng’ pokolembe. Kum jubigonyo lembe m’i wii ku lembe peri, man jubipoko lembe rac i wii de ku lembe peri.”​—Matayo 12:36, 37.

Kadok Yesu ubino nitimo tic ma wang’u ijo de, re tic m’eno kende uromo ngo wang’ Jufarisayo, giwacu kumae: “Japonji, wayenyo wanen giranyutha i beng’i.” Nwang’u niki ginen ku wang’gi udu m’ebetimo kunoke ungo, lembe ma Yesu utimo ubino ninen kamaleng’. Eno uketho Yesu uyero ni judong Juyahudi kumae: “Dhanum’utuk ma girac ma giweg gier de gibeyenyo giranyutha; giranyutha moko de mbe ma bimire igi, ndhu giranyutha pa Yona ma jabila.”​—Matayo 12:38, 39.

Yesu ukoro igi i lembe maeno ku wec ma e: “Kum calu Yona ubedo ceng’ adek ku diewor de i cino rec ma dit; e Wod dhanu de bibedo kumeno ceng’ adek ku dieworne i adunde ng’om.” Rec ma dwong’ ugam umwonyo Yona, ento i ng’eye edok ewok kud i ie calu ve ecer acera. Eno Yesu ubeyero pire gire nia ebitho man i nindo mir adege ke ebicer. Ing’eye kinde ma lembuno bitimere, judong Juyahudi gikwero “giranyutha pa Yona,” niwacu gikwero niloko cwinygi man niloko kura migi. (Matayo 27:63-66; 28:12-15) Tung’ kugi, “dhanu mi Nineve” giloko cwinygi pi lembe ma Yona uyero igi. Pieno jubipoko lembe iwi thek maeno. Yesu uyero bende nia lapor pa dhaku mi  Ceba de ubepoko lembe i wigi. Dhakune ubino nimaru ewinj rieko pa Suleman man ie wang’ lii ikum riekone. Yesu uwacu nia kawoni “ng’atu ma sagu Suleman ni keni.”​—Matayo 12:40-42.

Yesu uporo lembe mi dhanu m’utuk maeno marac ku pa ng’atu ma tipo m’ucido uwok kud i ie. (Matayo 12:45) Calu ma ng’atu maeno upong’o ngo kaka m’udong’ i ie thwolo ku lembe maber, tipo m’ucido udwogo ku tipo mange abiro mareco ma sagu mi kwong’o, e gimondo i ng’atuno. Thek mir Israel bende kumeno, jugam judwokogi gidoko leng’ nisagu ng’atu ma tipo m’ucido uwok kud i ie. Re thek maeno gikwero jubila pa Mungu, bende ginyutho ngbeng’ nia gikwero Yesu, ng’atu m’utie ku tipo pa Mungu. Eno ubenyutho kamaleng’ nia lembe mi thek maeno udoko rac magwei nisagu mi wang’e.

Kinde ma Yesu ubemedere ku wec pare, min kud umego pare gitundo man gicungo ang’et. Ju m’ubino ceng’ini ku Yesu giwacu ire kumae: “Meru ku utumeru gicungo woko, giyenyo giwec i beng’i.” Yesu unyutho nia pi julub pare tie tek nisagu zoo, gibedo ire ve umego ku nyimego, man mego pare mandha. Ecimo ba julubne man ewacu kumae: “Ma ku utumira de gi maeni m’uwinjo lem pa Mungu, m’utime de.” (Luka 8:20, 21) Enyutho nia winjiri m’utie i kindgi ku jupagi pire tie tek, ento m’utie ikindgi ku julubne pire tie tek lee nisagu. Etie iwa lembe mi mutoro nibedo kud umego mwa mi tipo ma gimaruwa, asagane kinde ma dhanu gibecayuwa kunoke gibenywaruwa pi tic maber ma wabetimo!