Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 44

Yesu ujuko wavuvu m’utuk iwi nam

Yesu ujuko wavuvu m’utuk iwi nam

MATAYO 8:18, 23-27 MARKO 4:35-41 LUKA 8:22-25

  • YESU UJUKO WAVUVU M’UTUK IWI NAM MI GALILAYA

Yesu uwotho wotho ma bor, man eol. Kinde ma ceng’ umwony, eyero ni julubne kumae: “Wakedhu lokaca,” niwacu i dhu wat mi Kapernaum.​—Marko 4:35.

I dhunam mi Galilaya yo nyangu, utie ng’om ma julwong’o Gadereni, ma julwong’o bende Dekapoli. Adhura mi Dekapoli utie adhura ma Jugiriki gitimo lem suru migi i ie, kadok Juyahudi ma pol ginwang’iri ka keca de.

Kinde ma Yesu ubeai kud i Kapernaum, dhanu mange de beneno. Yei mange de unuti kakeca m’utie ayika pi nikadhu loka nam. (Marko 4:36) Nikadhu yo lokaca utie bor ungo. Nam mi Galilaya utie nam ma lac man ma piine ber, borne utie kilometre 21, lac wang’e ke utie kilometre 12. Re namne thuth ungo akeca.

Kadok Yesu utie ng’atu ma leng’ de, re tic m’etimo uketho eol. Pieno, saa ma gicaku woth ku yei, ecidh evuto i the yei, etheno the wie ku mvodu mi theno thewic, e enindo.

Jukwenda pare ma pol ging’eyo lem pa nam, re wotho migi maeni ubecibedo igi yot ungo. Gudi udhoko nam mi Galilaya tingili, man wang’ ma pol namne bebedo lieth. Saa moko yamu ma ng’ic mi wi got koto man girombo ku lietho mi wi pii, e wang’acel wavuvu ma tek tuk iwi nam. Tap yamu maeno re m’ugam utuk i wigi. E ndhu ndhu mujanga caku nidhongo yei. ‘E yei migi ucaku nipong’ ku pii, ma dong’ gitie ceng’ini ikum tho.’ (Luka 8:23) Fodi asu Yesu ubenindo saa maeno!

Ju m’ung’eyo lem pa nam gitimo tego migi ceke pi nitiro wi yei, bodho migi ceke ma ging’eyo gipimo ikum yamu maeno. Re yamune ma cing’ nica ukoc. Lworo umakugi pilembe gibecitho, e gicewo Yesu man gikok kumae: “Bodhwa, Rwoth; waberwinyo.” (Matayo 8:25) Lworo umaku julub pilembe gibecimwony!

Kinde ma Yesu ucew, eyero ni jukwenda pare kumae: “Lworo benegowu nedi, wun ma wunok i yioyic?” (Matayo 8:26) E ing’eye Yesu ujuko yamu ku nam kumae: “Cungi, bed ling’.” (Marko 4:39) E yamu ma tek ucungo, man nam ukwio tii. (Marko giku Luka gikiewo nia Yesu ular ujuko yamu, kan ing’eye edok eweco pi yioyic ma nok mi julubne.)

Kepar pi matoke ma lembuno copo nibedo ko iwi julub! Giai gineno wavuvu ma tek m’utuk iwi nam ukwio tii. Lworo ma naka fodi umakugi ngo re m’umakugi. Gicaku niweco i kindgi kumae: “Ng’atuni [tie] ng’a, ma cil yamu ku nam de wore e?” E ing’eye gikadhu loka nam ma masendi mbe. (Marko 4:41–5:1) Saa moko nyo yei mange de m’ubino iwi nam udok i dhu wat ma yo reto.

Etie lembe ma tielo cwinyjo lee mandha ning’eyo nia Wod Mungu utie ku tego cil iwi yamu! I the bimobim pare iwi ng’om, dhanu ceke bibedo museme ma masendi mbe, pilembe gin moko acel de mbe marac ma bitimere!