Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 32

Cik uyio nia jutim lembe makani i ceng’ Sabatu?

Cik uyio nia jutim lembe makani i ceng’ Sabatu?

MATAYO 12:9-14 MARKO 3:1-6 LUKA 6:6-11

  • YESU UKEYO CING NG’ATU MOKO I CENG’ SABATU

Nindo mange, de i ceng’ Sabatu, Yesu ucidho i kacokiri moko; copere nia ecidho i kacokiri mi Galilaya. Kuca ewok enwang’u ng’atu moko ma cinge mir acwic ulindere. (Luka 6:6) Jugorcik ku Jufarisayo giketho wang’gi kilili gibelubo Yesu. Pirang’o? Paru migi ung’eyere kamaleng’ kinde ma gipenjo Yesu kumae: ‘Cik uyio jukei kum ceng’ Sabatu?’​—Matayo 12:10.

Judong dini mi Juyahudi ging’eyo nia cik uyio jukei kum ng’atini i ceng’ Sabatu, kende kende ka kwo pa ng’atune ni i ariti. Ku lapor, gibed giponjo nia i ceng’ Sabatu, cik uyio ngo nimadu ng’atu m’utur kunoke nitwio wathkumjo m’ukwot, pilembe eno copo nego ngo ng’atini. Ubenen kamaleng’ nia penji ma jugorcik ku Jufarisayo gipenjo ko Yesu utie ngo pi kisa m’ubenegogi ikum ng’atu ma kume lith m’ubesendere, ento gibesayu gimak theleb Yesu kara gikel adote i wie.

Re Yesu ung’eyo paru migi marac. Enwang’u nia gikadhu mukero man giloko nia giragora uyio ngo jutim tic moko ci i ceng’ Sabatu. (Ai 20:8-10) Kadok yor iwang’e bende jucayu tic mabeco ma Yesu utimo. Kawoni Yesu ubecitimo lembe moko ma binyayu teliri lee ikindgi; ewacu ni ng’atu ma cinge lindere kumae: “Cung i diere.”​—Marko 3:3.

Yesu uloko wang’e ibang’ jugorcik ku Jufarisayo man ewacu igi kumae: ‘Ng’atu moko m’i kindwu, ma won rombe acel, tek eni de epodho i vur i ceng’ Sabatu, ebimake, ebiwodhe woko de ngo?’ (Matayo 12:11) Urombo acel gicopo lworo ginwang’u ko sente, pieno kan urombone upodho i vur, gicopo weke ngo i vur nitundo urwonde, pilembe ecopo tho, man eno copo nego tic migi. Lembagora ke uyero nia, “ng’atu ma pwe ng’eyo bedo mi lim pare.”​—Lembrieko 12:10.

Yesu uporo lembe ario maeno kumae: ‘Dhanu sagu rombe dit apila! Kum kumeno cik uyio ya jutim tic ma ber ceng’ Sabatu.’ (Matayo 12:12) Nimakere ku lapor maeno, Yesu uturo ngo cik mi Sabatu kinde m’ekeyokum ng’atu ma nwang’u ubesendere. Judong dini maeno gilund gisayu kpe kite ma gicopo kwero ko wec mandha man mi kisa ma Yesu uyero. E giling’ ting’.

Yesu ufoyo ngo nyanok de ku paru migi marac, pieno eloko wang’e enenogi, e eyero ni ng’atu ma cinge lindere kumae: “Riei cingi.” (Matayo 12:13) Ng’atuno ugam urieyo cinge m’ulindere man cingene udoko cuu. Lembuno unyayu anyong’a mandandha i ng’atune; ka ju ma gibino nisayu adote iwi Yesu ke?

Kakare nibedo kud anyong’a pi cing ng’atuno m’ukei, Jufarisayo giwok wang’ acel woko, gicaku “poro lembe giku Juherodiano ikum [Yesu], rama gicopo nyothe ko.” (Marko 3:6) M’umbe jiji, ikind dhanu ma gicokiri pi nicamu gamba ikum Yesu, jurudini ma julwong’ogi Jusadukayo bende gibino nuti. I andha, nwang’u Jufarisayo ku Jusadukayo gidagiri ikindgi, re kawoni gidikiri karacelo pi ninyayu ragedo ikum Yesu.