Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 96

Yesu udwoko wang’ penji pa jabim moko ma jalonyo

Yesu udwoko wang’ penji pa jabim moko ma jalonyo

MATAYO 19:16-30 MARKO 10:17-31 LUKA 18:18-30

  • JALONYO MOKO UPENJO PENJI IWI KWO MA RONDO KU RONDO

Fodi Yesu ubewotho asu kud ikind ng’om Perea, pi nibino i Yerusalem. E jalawobi moko ma jalonyo uring’ini ubin urum piny i the tiende. Jalawobine tie “jabim,” man copere ebed etio calu jadit mi kacokiri kunoke etie acel m’ikind dilo mi Sanedrini. Epenjo Yesu kumae: “Japonji ma ber, abitimo ang’o kara acam pacu mi kwo ma rondo ku rondo?”​—Luka 8:41; 18:18; 24:20.

Yesu dwoko ire kumae: “Nedi ilwong’a ya a beri? ng’atu moko mbe ma ber, ndhu acel kende, en e Mungu.” Ecicopere nia jalawobi maeno ulwong’o Yesu “japonji ma ber,” pilembe eno tie lwong’o mi yung ma jubed julwong’o ko dhanu ma gitie rabbi niwacu juponji mi dini mi Juyahudi. Kadok andha Yesu utie japonji maber de, re enyutho ni ng’atuno nia Mungu kende re “ma ber” m’ukwayu jumii ire yung.

Yesu umio juk ma e ni jalawobi maeno: “Tek iyenyo imond i kwo, wor Cik.” Jalawobine ulund upenje kumae: “Manedi ke?” E Yesu ukwanu ire Cik abic ma e kud ikind apar: Kud ineg nek, kud igier gier, kud ikwal kwo, kud inyuth lembe mi ndra, yung wuru ku meru. Edok emedo Cik ma e ma pire tek: “Man imar wedu calu imeri giri.”​—Matayo 19:17-19.

Ng’atuno dwoko ire kumae: “Gin maeni ceke adaru woro: edong’ ang’o ke ma fodi urem ira?” (Matayo 19:20) Enwang’u nia ve lembe moko mabeco udong’ ma fodi etimo ngo, ma copo cere ku nwang’u kwo ma rondo ku rondo. Kinde ma Yesu uneno nia epenjo penji ku cwinye zoo, e ‘emare.’ (Marko 10:21) Re lemoko nuti m’ubedo ni macero ni ng’atuno.

Emaru lonyo pare lee dit, pieno Yesu uyero ire kumae: “Gin acel urem iri: cidh, ilok piny ceke m’ibedo ko, imi ni jucan, man ibibedo ku piny m’akana i polo: man ibin, ilub ng’eya.” Nwang’u i andha, jalonyo eno copo poko piny pare ni jucan ma gibidwoko ngo ire ka wang’e, man ecopo doko jalub pa Yesu. Re eai m’etie ku can. Copere  kinde m’ebecidho, Yesu unene ku kisa madit. Ng’atuno umoko lee dit ikum lonyo “pare [ma] dit,” lembuno uketho eneno ngo lonyo mandha. (Marko 10:21, 22) Yesu uwacu kumae: “Mondo i Ker pa Mungu [bibedo] tek apila ni julonyo!”​—Luka 18:24.

Wec maeno ma Yesu uyero, ku m’edok emedo ing’eye uwang’u i julub lii, emedo kumae: “Kum mondo ku wang’ sindani e yot ni ngamia, ma sagu mondo i Ker pa Mungu ni julonyo.” Eno ucwalu julub nipenjo Yesu kumae: “Ka kumeno ng’a ma copo bothi?” Nyo andha dhanu copo tundo ngo nyanok de ninwang’u bothi? Yesu unenogi atira i wang’gi man edwoko kumae: “Gin ma copre ngo ni dhanu copre ni Mungu.”​—Luka 18:25-27.

E Petro unyutho nia gin gitimo ng’iong’ic m’ukoc ku pa jalonyo maeno, eyero kumae: “Nen, waweko gin ceke, man walubo ng’ei: ka kumeno wabibedo ku girang’o?” Yesu unyutho igi nia gibinwang’u bero ma lee nikum ng’iong’ic ma gitimo, ewacu kumae: “Wun ma wulubo ng’eya, i nyol ma nyen ka Wod dhanu bijany wi komker mi dwong’ pare, wun bende wubijany wi komker apar wi ario, ma wupoko ko lembe ni suru apar wi ario mir Israel.”​—Matayo 19:27, 28.

Ubenen kamaleng’ nia Yesu ubino paru iwi kite ma kwo bibedo ko iwi ng’om nindo m’ubino, saa ma Mungu biyiko lembe bidoko ve m’ular ubino i podho mir Eden. Petro ku julub wadi gibibimo karacelo ku Yesu iwi ng’om ma bidoko ni Paradiso. Eno tie sukulia ma lee dit m’usagu lembe ceke ma gitwoniri ko pi nilubo tok Yesu!

Re julub gibinwang’u sukulia eno nindo m’ubino kende ngo. Kadok saa nica de gibino nwang’u moko; Yesu uyero kumae: “Ng’atu moko mbe m’uweko ot, kadi dhaku, kadi umego, kadi junyodo, kadi nyithindho, pi Ker pa Mungu, m’ekebinwang’u wang’e bang’ dupa ngo i nindo maeni, man i ng’om m’ubino kwo ma rondo ku rondo.”​—Luka 18:29, 30.

Ma jiji mbe, kakare ceke ma julub gibicidho i ie, gicopo nwang’u utumego mange ma gibeworo Mungu calu gin, man gicopo bedo ku mer ma ceng’ini kugi nisagu kadok mer ma ku wat migi ma dhe de. Lembe mi can utie nia jalonyo maeno ubecibayu mugisa ma lee, man bende sukulia mi nwang’u kwo i Ker pa Mungu i polo.

Yesu umedo kumae: “Ento dhanu dupa ma ma kwong’a gibidong’ cen; man m’udong’ cen bibedo ma kwong’a.” (Matayo 19:30) Yesu ubemito yero ang’o?

Jabim maeno ma jalonyo ubino ikind jutelwic mi Juyahudi, pieno en de ebino ikind dhanu ma kwong’a. Calu m’ebed eworo cik pa Mungu, nwang’u ecopo doko jalub pa Yesu man ecopo timo lembe mange dupa karacelo ku julub mange. Re ebeketho lonyo man jamcinge i kabedo ma kwong’a i kwo pare. Tung’ kude, dhanu mange ma gitie jucan ginwang’u nia ponji pa Yesu utie lemandha ma terojo i kwo ma nja. Jucopo yero nia gitie ju ma ‘gidong’ cen’ ma re kawoni gibedoko “ma kwong’a.” Gicopo bedo ku genogen nia gibijany karacelo ku Yesu iwi komker mi polo man gibibimo wi ng’om ma bidoko ni Paradiso.