Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 94

Rwo man jwigiri tie lembe ario ma pigi tek

Rwo man jwigiri tie lembe ario ma pigi tek

LUKA 18:1-14

  • LAPOR PA DHATHO M’UOL UNGO KU PENJO

  • JAFARISAYO MAN WON AJOK

Yesu uai umio lapor ni julubne pi niketho ginyang’ nia ukwayu gimediri asu nirwo. (Luka 11:5-13) Kawoni ecopo bedo i Samaria kunoke i Galilaya man ebeketho peko kendo nia ukwayu ngo julub giwek nirwo. Emaku lapor mange pi nikoro lembe maeno, eyero kumae:

“Japoklembe nuti i adhura, ma lworo Mungu ngo, eparu pi dhanu de ngo: man dhaku ma cware tho nuti i adhura maeno; ebino i bang’e de wang’ udul, ewacu kumae, cul wang’ lembe para kum jadegina. E eyio ngo nindo moko: ento macen ewacu i ie gire kumae, kadok alworo Mungu ngo, kadi aparu pi dhanu de ngo; ento kum dhaku maeni besenda, abiculo wang’ lembe pare, kara kud eola ku bino pare ma thiri thiri.”​—Luka 18:2-5.

Niai kud i lapor maeno Yesu uwodho ponji mae: “Wuwinj lembe ma japoklembe m’ugondre yero. E Mungu biculo wang’ lembe mi ju m’egoyo wigi ngo m’uywak i bang’e dieceng’ ku diewor, ento fodi etwio cwinye i kumgi?” (Luka 18:6, 7) Yesu ubemito yero ang’o iwi Won?

Yesu ubemito yero ngo nyanok de nia Yehova Mungu utie calu japoklembe maeno m’ugondre. Emito ponjo lembe m’ukoc: ka fodi japoklembe ma tie dhanu, man ma tie ng’atu m’ugondre de udwoko wang’ kwac pa dhatho m’uol ungo ku penje, dong’ Mungu ngi copo dwoko ngo wang’ kwac mwa? Mungu tie pwe man e ber; m’umbe jiji ebidwoko wang’ rwo mi dhanu pare ka giol ungo ku kwaye. Yesu unyutho lembe maeno i wec ma e m’edok emedo: “Awacu iwu, nia [Mungu] biculo wang’ lembe migi pio.”​—Luka 18:8.

Wang’ mapol dhanu ma jucayugi man jucan, lembe migi wotho ngo i atira; re ju m’ulony man ju ma gitie ku dito ke juworogi awora. Ento Mungu koyo dhanu ngo. Ka saa biromo, ebiketho lembe biwotho i atira: ebinyotho jutimrac cen man ebimio kwo ma rondo ku rondo ni jurutic pare.

Ng’a ma tie ku kit yioyic pa dhatho eno? Dhanu adi ma giyio nia andha Mungu “biculo wang’ lembe migi pio”? Yesu umio kende kende lapor m’ukonyowa ninyang’ nia ukwayu kud waol nirwo. Kawoni, ebepenjo penji iwi yioyic m’ukwayu jubed ko iwi tego ma rwo utie ko, eyero kuma e: “ka Wod dhanu bino, ebinwang’u yioyic i ng’omi?” (Luka 18:8) Kristu ubemito yero nia saa m’ebidwogo, ebinwang’u dhanu ma nok kende re ma gitie ku yioyic i tego ma rwo utie ko.

Jumoko m’ikind dhanu ma gibewinjo Yesu gibed ginwang’iri nia gitie ku yioyic. Gibino bende ku genogen i wigi gigi nia giweg bedopwe, jumange ke gibed gicayu. Pi dhanu maeno, Yesu umio lapor ma e:

“Juario idho malu i hekalu nirwo; ng’atu acel en e Jafarisayo, jalwadi ke won ajok. Jafarisayo cungo man erwo kumeno i ie gire, Mungu, afoii, kum a calu dhanu mange ngo, ma weg kuvuga, weg gondri, ma weg gier, kadi calu won ajok maeni de ngo. Aweko cam wang’ ario i yenga acel, amio apaje mi gin ceke m’anwang’u.”​—Luka 18:10-12.

Jufarisayo gibed gimito dhanu ung’ei nia gin re ma gitie pwe. Gibed gitimo kumeno pi nitelo  nen mi dhanu. Ku lapor, gipangu gin gigi nia ceng’ kas’acel ku kas’ang’wen ubed nindo migi mi kwiro cam, kara dhanu mapol unengi, kum ebino nindo pa soko ma dongo. M’umedo maeno, gibed gimio apaje kokoro, kadok etie apaje mi ith uboko. (Luka 11:42) Nwang’u dwi moko i wang’e, Jufarisayo gilar giyero wec moko ma gibed gicayu ko jumange kumae: “Udul dhanu maeni m’ung’eyo cik ungo [nimakere ku paru mi Jufarisayo] gibedo akwong’a.”​—Yohana 7:49.

Yesu umedere asu ku lapor, eyero kumae: “Ento won ajok, ucungo bor cen, eyio ting’o wang’e malu i polo de ngo, endre edhongo kore, ewacu kumae, Mungu dong’ kisa negi i kuma an a jadubo.” Andha, won ajok ujwigere man enenere gire nia eromo ngo. E Yesu udaru wec pare kumae: “Awacu iwu kumae, ng’atu maeni uloro piny i ot pare ma lembe m’i wie gonjre ma sagu pa jalwadi: kum ku ba dhanu ceke m’uyungre gire jubijwige; ento ng’atu m’ujwigre gire jubiyunge.”​—Luka 18:13, 14.

Andhandha, Yesu unyutho kamaleng’ nia wacikara nibedo ku jwigiri. Eno ubino juk ma pire tek ni julub, pilembe gidongo ikind Jufarisayo ma gikethiri gigi nia gitie dhanu ma pwe man ma gineno dito re ma ni gin ma pire tek. Juk maeno tie bende ku kony ni dhanu mange ceke ma gibelubo Yesu.