Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 82

Yesu urweyo lembanyong’a i Perea

Yesu urweyo lembanyong’a i Perea

LUKA 13:22–14:6

  • UKWAYU NITIMO KERO PI NIMONDO KUD I DHUGOLA MA DINY

  • UKWAYU YESU UTHO I YERUSALEM

Yesu ubino niponjo man nikeyo kum dhanu i Yahudi man i Yerusalem. I ng’eye ekadhu loka Kulo Yordan, man ecaku nirweyo lembanyong’a kubang’ adhura ceke mi ng’om mi Perea. Re ebigalu ngo, ebidok i Yerusalem.

Kinde ma fodi Yesu ni i Perea. Ng’atu moko ubin upenje kumae: ‘Rwoth, ju ma gibiboth gi noki?’ Ecicopere nia ng’atuno ung’eyo pi wec m’ukadhu ikind judong dini, ma gimito ging’ei nyo dhanu dupa re ma biboth kunoke ngo. Kakare niyero nia dhanu dupa re ma biboth, Yesu unyutho gin m’ukwayu jutim kara jubin jubothi. Eyero kumae: ‘Ponj mondo kud i dhugola ma diny.’ Eyo, ukwayu nitimo kero. Pirang’o? Yesu ukoro kumae: ‘Awacu iwu, dupa biponjo nimondo kud i ie, ento gibicopo ngo.’​—Luka 13:23, 24.

Yesu umio lapor m’unyutho nia pire tie tek nitimo kero. Eyero kumae: ‘Ka won ot uai malu, eciko dhugola de, man wumaku cungo woko, wudwong’o dhugola de, wuwacu kumae, Rwoth yab iwa. . . . E ebiwacu kumae, awacu iwu, Ang’eyo ka ma wuai i ie ngo; wuai cen kud i vuta, wun ceke wu jutic mi camuco.’​—Luka 13:25-27.

Lapor maeno ubenyutho peko ma ng’atu m’utundo ing’ei saa nwang’ere ko; ecicopere nia etundo i saa pare m’emito en, e enwang’u juciko dhugola man jutiele. Nwang’u ecikere nibino con, kadok nwang’u emaru ngo de. Kumeno bende, dhanu dupa giweko ponji pa Yesu ukadhugi kinde m’ebino niponjo. Giketho ngo thier mandha ubed igi ni lembe ma kwong’a i kwo migi. Dhanu mapol ma Yesu ubino athothi pigi de, gikwero yub ma Mungu umaku pigi kara gibothi. Yesu uyero nia “ywak ku kayulak bibedo nuti” igi kinde ma jubibayugi woko. Ento dhanu biai “yo nyangu ku yo reto man yor ariwa ma malu ku yor ariwa ma piny,” gibiai kud i thek ceke, “gibibedo piny i [dhu meza i] Ker pa Mungu.”​—Luka 13:28, 29.

Yesu ukoro kumae: ‘M’udong’ tokcen (niwacu thek mange man Juyahudi ma jucayugi) gibitelo yo, m’utelo yo ke (niwacu judong Juyahudi ma giting’iri nia gitie nyikwai Abrahamu) gibidong’ tokcen.’ (Luka 13:30) Dong’ ‘tokcen’ migi ubenyutho nia gibimondo ngo kadok nyanok de i Ker pa Mungu.

Jufarisayo gibino i bang’e, man giyero ire kumae: “Ai kakeni, ci kamange: kum Herode [Antipas] uyenyo enegi.” Ecibedo ve Ubimo Herode re m’uoro dhanu maeno kara Yesu uring kud i ng’om migi. Saa moko nyo lworo ubenego Herode, pilembe emito ngo edik cinge ikum tho pa jabila mange, calu m’egam ediko ikum tho pa Yohana ma Jababutisi. Ento Yesu uyero ni Jufarisayo nia, ‘wucidh wuyer ni kaki maeno, nen, abewodho pajogi man abekeyo kum tin kud urwo, i ceng’ mir adege ke abidaru.’ (Luka 13:31, 32) Ecicopere nia Yesu ulwong’o Herode nia “kaki [kunoke  nzer]” pi ninyutho pi rieko marac mir awonde ma kaki utie ko. Re, ng’atu moko acel de mbe ma romo ninyutho ni Yesu lembe m’ukwayu etim, kadok ebed Herode kadi dhanu mange. Ebecitimo tic ma Won re m’umio ire ya etim, nimakere ku program pa Mungu, ento mi dhanu ngo.

Yesu ucoko woth man ecidho i Yerusalem pilembe, ewacu nia, ‘ecopere ngo nia jabila utho kamange m’uweko Yerusalem.’ (Luka 13:33) Lembila moko acel de mbe m’uyero nia Masiya ucikere nitho i Yerusalem. Ka kumeno, pirang’o ke Yesu ubeyero nia jubinege keca? Pilembe Yerusalem re m’utie adhura madit, ka ma dilo mi dhanu 71 mi Sanedrini ni i ie. Sanedrini utie ot pido ma malu, kaka ma jubed jupoko ie lembe mi ju ma judotogi nia gitie jubila mi ndra. M’umedo maeno, Yerusalem utie bende ka ma jubed juthiero ie lei ni lam. Pieno Yesu unwang’u nia etie lembe ma copere ngo nia junege kaka mange.

Can unego Yesu, uketho ewacu kumae: “E Yerusalem, Yerusalem, m’unego jubila pa Mungu, man m’ucanyu ju ma juoro i bang’e ku kidi! Ayenyo wang’ udul acok nyithindho peri karacelo, cil calu min gweno coko nyithindhe the bombe, [ento] wuyenyo ngo! Nen, ot peri dong’ iri ni uvuru.” (Luka 13:34, 35) Thek maeno gikwero Wod Mungu, pieno gicikiri ninwang’u adwogine!

Ma fodi Yesu utundo ngo i Yerusalem, jadit moko mi Jufarisayo ulwong’e i bang’e ni cam i ceng’ Sabatu. Dhanu mange ma julwong’ogi ni cam, gibino kiyo nineno nyo Yesu bikeyo kum ng’atu moko m’ubino ku twoyo mir ayidha kunoke tho liec (twoyo ma ketho pii cokere i kumjo, asagane yor i tielo). Yesu upenjo Jufarisayo ku Jueuthecik kumae: ‘Cik uyio jukei kum i ceng’ Sabatu kadi ungo?’​—Luka 14:3.

Ng’atu moko acel de mbe m’udwoko wang’ penji pare. Yesu ukeyo kum ng’atune man i ng’eye epenjogi kumae: ‘Ng’a m’i kindwu ma ka dhiang’ pare kadi kana pare upodho i vur, ewodhe ngo ndhundhu nica i ceng’ Sabatu?’ (Luka 14:5) Kendo, gidwoko ngo wang’ penji pare.