Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 87

Etie lembe mi rieko nilar neno bor

Etie lembe mi rieko nilar neno bor

LUKA 16:1-13

  • LAPOR PI JAKURPINY MA WON GONDRI

  • “WUMAK JURIMO” KU JAMCINGWU

Yesu uai umio lapor pa wod m’urwinyo; laporne uwang’u i weg ajok, i jugorcik man i Jufarisayo lii, kinde ma giwinjo nia kara Mungu tie ayika nitimo kisa ni jadubo m’uloko cwinye. (Luka 15:1-7, 11) Kawoni Yesu umio lapor mange, re ni julub pare kende. Emaku igi lapor pa jalonyo moko m’uwinjo nia jakurpiny pare unyotho piny.

Yesu ukoro nia judoto jakurpiny pi piny pa rwoth pare m’enyotho. Pieno, rwoth uwacu nia ebewodhe cen kud i tic. E jakurpiny ucaku penjere gire kumae: “Abitimo ang’o, kum rwoth para kabu tic mi kuropiny i bang’a? Tekra mbe mi furofur; lewic de nega kum kwayu piny.” Kara kud ebin esendere saa ma jubiwodhe kud i tic, eyero yor i ie kumae: “Ang’eyo gin m’abitimo, [kara] ka jukaba woko kud i tic mi kuropiny, [dhanu] gibin gijola i udigi.” E wang’ acel egam elwong’o jubanja pa rwoth pare, man epenjo ma kwong’ane kumae: “Banja peri adi m’igamu ba rwoth para?”​—Luka 16:3-5.

Won banja maeno uwacu kumae: “Mo mukero dak.” Eno copo bedo mo litre 2 200. Copere ebino ku podho yau madit, kunoke ebino jakuloka mi mo yau. Jakurpiny uwacu ire kumae: “Gam waraga peri, ibed piny pio igor pier abic [eno litre 1 100].”​—Luka 16:6.

Jakurpiny upenjo won banja mange kumae: “In ke banja peri adi?” Edwoko kumae: “Nganu mukero dak acel.” Eno copo bedo nganu litre 22 000. Jakurpiny uwacu ire kumae: “Gam waraga peri, igor pier abora.” Jakurpiny ujwigo banja pa ng’atuno lee mandha.​—Luka 16:7.

Fodi asu jakurpiny ubeneno wi sente pa rwoth pare, pieno i thenge moko etie ku twero m’ecopo jwigo ko wel banja ma dhanu biculo ni rwoth pare. Calu m’ejwigo wel banja migi, i kite maeno etheyo mer kugi kara gibin gikonye, kinde ma jubiwodhe kud i tic.

Rwoth ugam uwinjo lembe ma jakurpiny pare utimo; kadok nwang’u piny pare unyothere en de, re lembe ma jakurpiny eno utimo uwang’u ie lii man efoye, pilembe kadok ‘egondre,’ re “etimo ku rieko.” Yesu udok umedo kumae: “Wot mi ng’om maeni i kind dhanum’utuk migi gi riek ma sagu wot mi der.”​—Luka 16:8.

Yesu ubecwaku ngo lembe ma jakurpiny utimo, man ebeyero ngo nia ukwayu nicwayu vupo i kuloka. Dong’ i andha emito yero ang’o? Ewacu ni julubne kumae: “Wumak jurimo iwu giwu ku piny mi gondri; kara, kan ebithum, gibijolowu i hema ma nja.” (Luka 16:9) Andhandha, nilar neno bor man nitio ku rieko copo mio iwa ponji. Jurutic pa Mungu, niwacu “wot mi der” gicikiri nitio ku jamcing’gi ku rieko, ma nwang’u gibewil ungo pi kwo ma rondo ku rondo m’ubekurogi.

Yehova giku Yesu re ma gicopo ketho ng’atini unwang’ kwo i Ker mi polo, kunoke i Paradiso  iwi ng’om i the Kerne. Pieno, wacikara nitimo kero nibedo ku mer ma ceng’ini kugi, nwang’u wabetio ku lonyo kunoke jamcingwa pi nitielo tic mi Ker. Tek wabetimo kumeno, nwang’u wabeyiko kwo mwa mi nindo m’ubino ma binyothere ngo, saa ma nwang’u mola ma kwar, mola ma tar, sente kunoke lonyo ceke gidaru nyothiri.

Yesu uyero bende nia dhanu ceke ma gibetio ku lonyo kunoke jamcing’gi i ayi m’atira, gicopo neno wi piny mange ma pigi tek lee de. Pieno epenjo kumae: “Ka kumeno, tek wubedo mandha ngo i piny mi gondri ng’a ma bimio iwu piny mandha [calu ve tic ma Mungu umio ni dhanu pare] ni sumba?”​—Luka 16:11.

Yesu ubemito nyutho ni julubne nia kara jujolgi “i hema ma nja,” jubikwayu lembe dupa ibang’gi. Ng’atu moko mbe ma copo bedo jaratic mandha pa Mungu, ma nwang’u ebetimo bende ni lonyo. Yesu udaru wec pare kumae: “Jatic umbe ma copo timo ni judongo ario: kum kadi ebidagu acel, ebimaru mucelo; kadi ebimoko bang’ acel, man ebicayu mucelo. Wucopo timo ni Mungu ku lonyo de ngo.”​—Luka 16:9, 13.