Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 92

Won dhobu acel udok ufoyo Yesu

Won dhobu acel udok ufoyo Yesu

LUKA 17:11-19

  • YESU UKEYO KUM WEG DHOBU APAR

Kinde ma dilo mi Sanedrini gicamu gamba kara gineg Yesu, eai ecidho i adhura mir Efraim, yor i thenge ma yo malu mi Yerusalem. Ebedo ku julubne kuca, bor ku judegine. (Yohana 11:54) Kawoni, Kadhukuwijo mi oro 33 R.M. udhingo romo, pieno Yesu ucoko woth kendo. Eng’olo yo malu mi Samaria, man eidho i Galilaya; eno tie wang’ ma tokcen m’ebekadhu kud i pacu maeno iwang’ tho pare.

Kinde m’ecaku woth, ebekadhu kud ikind pacu, egam erombo ku dhanu apar ma giweg dhobu. Kit dhobu moko rac magwei ma kan emaku ng’atini, nok nok ecaku ng’ondo wathkume moko ma calu ve nyig cinge, nyig tiende kunoke ithe. (Wel 12:10-12) Cik pa Mungu ung’olo nia won dhobu ucikere nikok ku dwande ma tek kumae, “a leng’ ungo a leng’ ungo!” man ecikere nibedo kende.​—Lembe mi Julawi 13:45, 46.

Weg dhobune ging’eyo cik maeno, pieno gibedo bor ku Yesu, man gikok ku dwandgi ma tek kumae: “Yesu, Japonji; bed ku kisa i kumwa!” Kinde ma Yesu unenogi, ewacu igi kumae: “Wucinyuthru ni julam.” (Luka 17:13, 14) Or ma Yesu uoro kogi ibang’ julam unyutho nia eworo Cik pa Mungu m’uwacu nia julam re ma gitie ku twero mi ng’olo nia weg dhobu udoko leng’. Ing’eye, gicopo dwogo kendo nikwo ikind dhanu ma kumgi leng’.​—Lembe mi Julawi 13:9-17.

Weg dhobu apar maeno giyio nia Yesu tie ku copo mi timo udu. Pieno gicoko woth pi nicidho ibang’ julam ma fodi kumgi ukei ungo. Kinde ma giwok i gengi, ginwang’u sukulia pi yioyic ma ginyutho i Yesu. Gicaku neno dendkumgi, man giwinjiri i kumgi nia gidaru kei!

Dhanu abung’wen ma gikei gicidho i yo migi, ento ng’atu acel kende ma tie Jasamaria re m’udok ibang’ Yesu. Pirang’o? Anyong’a ubenege lee dit pi kume ma Yesu ukeyo. Ng’atuno m’udaru kei ucaku “paku Mungu ku dwande ma tek,” kum enwang’u nia Mungu re m’uketho dhobu uweke. (Luka 17:15) Kinde m’enwang’u Yesu, epodho piny i the tiende man efoye.

Yesu ugam uwacu ni dhanu ma gitie kugi kumae: “Juapar kumgi doko leng’ ungo? Ento juabung’wen gini kani? Ng’atu moko mbe ma junwang’u udwogo nimio yung ni Mungu, ndhu jakamange maeni?” E Yesu uyero ni Jasamaria maeno kumae: “Ai malu icidhi: yioyic peri e m’ubodhi.”​—Luka 17:17-19.

Udu ma Yesu utimo m’ekeyo ko kum weg dhobu apar maeno unyutho kamaleng’ nia Yehova ni kude. Ng’atu acel m’udok ufoyo Yesu ung’eyo nia Mungu ukeyo kume nikadhu ibang’ Yesu, pieno dong’ etie i yo mi kwo ma rondo ku rondo. Tin eni, Yehova ubetio ngo ku Yesu pi nitimo udu ma kumeno. Re ka watie ku yioyic i Yesu, wacopo bedo i yo ma terojo i kwo ma nja ku nja. Nyo wan de wabenyutho foyofoc mwa calu ma Jasamaria unyutho?