Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MI 91

Lazaru ucer

Lazaru ucer

YOHANA 11:38-54

  • CER PA LAZARU

  • DILO MI SANEDRINI UPANGU LEMBE PI NINEGO YESU

Kinde ma Martha giku Maria giring’ini gibin ginwang’u Yesu ceng’ini ku Bethania, gicidho i dhu liel mi poi ma jukunyo Lazaru i ie. Lielne juroke i cana man jujengo kidi ma pethere i dhoge. Yesu uwacu kumae: “Wung’iel kidi woko.” Martha unyang’ ungo ikum lembe ma Yesu ubemito timo, pieno eyero kumae: “Rwoth, kawono ng’wic kume beng’wi; kum etho cenge doko ang’wen.” Yesu uloko ire kumae: ‘Awacu iri ngo nia tek iyio, ibineno dwong’ pa Mungu?’​—Yohana 11:39, 40.

E jung’ielo kidi ku dhu liel. Yesu ulund ung’ayu wang’e malu man erwo kumae: “Vwa, afoii kum iwinja. Man ang’eyo nia iwinja thiri thiri: ento kum udul dhanu m’ucungo i vuta ayero, kara giyi nia iora.” Yesu urwo iwang’ dhanu ceke kara  ging’ei nia udu m’ebecitimo, Mungu re m’umio ire copone. Ing’eye ekok ku dwande ma tek kumae: “Lazaru, wok woko!” E Lazaru uwok andha, ma tiende ku cinge, ku wang’e ceke juriwo ku bongu ma jukunye ko. Yesu uwacu kumae: “Wugonye, wek ecidhi.”​—Yohana 11:41-44.

Kinde ma Juyahudi mapol ma gibino nijuko Maria giku Martha gineno udu maeno, e giyio Yesu. Ento jumange giai gicidh gikoro lembe ma Yesu utimo ni Jufarisayo. Saa ma Jufarisayo ku julam ma dongo giwinjo kumeno, gicokiri i ot pido ma malu mi Juyahudi ma julwong’o Sanedrini. Ikindgi, Kayafa ma jalam madit de ubedo nuti. Jumoko gipenjiri kumae: ‘Watimu ang’o? kum ng’atuno timo giranyutha dupa. Tek waweke kumeno, dhanu ceke biyio ire: Juroma de bibino kabu kakawa woko ku thek mwa.’ (Yohana 11:47, 48) Kadok dhanu maeno giwinjo lembatuca m’uai kud i dhu ju ma Yesu “timo giranyutha dupa” iwang’gi de, re anyong’a negogi ngo nyanok de ikum udu ma Mungu ubetimo nikadhu kud ibang’ Yesu. Gin ma pire tek akeca igi, utie dito man rwom migi.

Cer ma Lazaru ucer ko ku kind ju m’utho ubedo ve goc ma lith ni Jusadukayo, pilembe gin giyio nia cer umbe. Kawoni Kayafa ma en e ng’atu acel m’ikind Jusadukayo umaku wec man eyero kumae: “Wung’eyo gin moko ki ngo, kadi wukwanu ngo nia maeni en e ber iwa ya ng’atu acel utho pi dhanu, man kara thek dho kud urwiny.”​—Yohana 11:49, 50; Tic mi Jukwenda 5:17; 23:8.

Kayafa uyero wec maeno “gire ngo,” ento Mungu re m’uketho eweco kumeno, pilembe ebino jalam madit. Ebemito juneg Yesu pilembe elworo nia ka juweke, dhanu bijigo nilubo judong dini mi Juyahudi. Re wec m’eyero utie lembila m’unyutho kamaleng’ lemandha ma nia, tho pa Yesu bibedo jamgony ni Juyahudi kendgi ngo, ento ni “nyithindho pa Mungu m’ulal mba bende.”​—Yohana 11:51, 52.

Andha, Kayafa utundo nicwalu dilo mi Sanedrini nicamu gamba pi ninego Yesu. Nyo Nikodem ma tie acel m’ikind dilone, ucidh unyutho pi gamba maeno ni Yesu pilembe etie jarimbe? Kadok kumeno de, re Yesu uai wang’ acel ku kaka m’ebino i ie ceng’ini ku Yerusalem, kara kud junege ma fodi saa ma Mungu ung’olo uromo ngo.