Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MIR 11

Yohana ma Jababutisi uyiko yo

Yohana ma Jababutisi uyiko yo

MATAYO 3:1-12 MARKO 1:1-8 LUKA 3:1-18 YOHANA 1:6-8, 15-28

  • YOHANA UBINO NIPONJO MAN NIMIO BATIZO

  • DHANU DUPA GIMAKU BATIZO, RE CEKE NGO

Oro ma romo 17 ukadhu, ing’ei ma Yesu ubino nipenjo juponji i hekalu, ma nwang’u oro pare tie 12. Kawoni watie i acaki mi oro 29 R.M. Saa maeno dhanu mapol ubeweco ku nying’ wat pa Yesu ma tie Yohana, m’uberweyo lembanyong’a i ng’om ceke ma tie yo reto mi kulo Yordan.

Yohana ubino ng’atu ma leng’o man wec pare ubed utelo nen mi dhanu. Kendi pare ubino kendi mi yuk ngamia man ebed etwiyo piere ku mukaba mi del. Ebed ecamu bonyo man mio kic. Ebed etwong’o lembang’o? Ebed etwong’o nia “Wulok cwinywu; kum ker mi polo ni ceng’ni.”​—Matayo 3:2.

Lembe ma Yohana ubino niyero ubed umio amora ikum dhanu m’ubino niwinje. Dhanu mapol ginwang’u nia ukwayu giyew dubo migi, gilok paru migi, kitgi, man giwek ayi kwo migi marac cen. Dhanu m’ubed ubino ibang’e ubino dhanu mi “Yerusalem ku mi Yahudi ngung’, ku mi ng’om ceke ma ng’et Yordan.” (Matayo 3:5) Dhanu dupa ma giwinje giyewo dubo migi. Emio igi batizo, ebologi i pii mi Yordan. Pirang’o?

Batizo m’emio ni dhanu ubedo igi ni lanyuth nia gidaru niyewo kud adundegi ceke dubo ma gitimo i kum lembariba mi Cik pa Mungu. (Tic mi Jukwenda 19:4) Re dhanu moko uyewo ngo dubo migi. Kinde ma judong dini; Jufarisayo ku Jusadukayo gibino i bang’e, Yohana ulwong’ogi “nyikwai thwol.” Eyero igi kumae: “Wuceg nyingwu m’uromo ku lokocwiny: man iwu kud upid nia wuwac i iwu giwu kumae, wabedo kud [Abraham] ni wegwa: kum awacu iwu, nia Mungu copo ting’o nyithindho ni [Abraham] ku kidi maeni. Meni cil kawoni lei uvuto ther ulag yen: ka kumeno ku ba yen ceke m’ucego nyinge ma ber ungo jung’ole piny, jubole de i mac.”​—Matayo 3:7-10.

Calu ma Yohana ubino nitelo nen mi dhanu dupa ku wec pare ma tie ku tego, man ebino nimio batizo ni dhanu mapol, lembuno uketho juoro julam ku julawi gicidh gipenje kumae: “In i ng’a?”

Yohana udwoko igi kumae: “An a Kristu ngo.”

Gipenje kendo kumae: ‘Ka kumeno ang’o? In i Eliya?’

Edwoko igi kumae: “An a en ungo.”

E gipenje, “Die in i jabila?” Niwacu Jabila madit ma Musa ugam uyero pire nia bibino.​—Poi mi Cik 18:15, 18.

Yohana udwoko kumae: “Ungo!”

Girere ku penji kumae: “In i ng’a? Kara wadwok lembene ni ju m’uorowa. Iwacu ang’o piri giri?” Yohana udwoko lembe igi kumae: “An a dwand ng’atu moko m’ukok akoka i yamba kumae, wutir yo pa Rwoth, calu Isaya ma jabila wacu.”​—Yohana 1:19-23.

Gimito ging’ei thelembe m’uketho ebemio batizo, pieno gipenje kumae: “Tek in i Kristu ngo, kadok [Eliya] de ngo, kadok jabila de ngo, imio [batizo] nedi?” E edwoko igi wang’ lembe ma pire tek kumae: “Amio [batizo] i pii: ng’atu acel ucungo i kindwu ma wung’eyo ngo, ma en e ng’atu m’ubino i ng’eya.”​—Yohana 1:25-27.

M’umbe jiji, Yohana ung’eyo nia ebeyiko yo kara eketh dhanu giyik adundegi udok maleng’ pi nijolo Masiya ma jular juewo pire, man ma bidoko ni Ubimo. Uketho eyero pire kumae: “Ng’atu m’ulubo ng’eya ebedo ku tego ma sagu an, ma wara pare romo ngo ya ayei.” (Matayo 3:11) Yohana udok uyero kendo kumae: “Ng’atu m’ubino ing’eya esaga: kum en e ng’atu ma kwong’a ira.”​—Yohana 1:15.

Andha, lembe ma Yohana uyero nia ‘wulok cwinywu; kum Ker mi polo ni ceng’ni,’ uwok tap i saane. (Matayo 3:2) Lembe maeno ma Yohana utwong’o unyutho kamaleng’ nia tic pa Rwoth Yesu Kristu ma en e ng’atu ma Yehova ung’io dong’ udhingo nicaku.