Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MIR 7

Jururieko mi nyikaluku gibino nineno Yesu

Jururieko mi nyikaluku gibino nineno Yesu

MATAYO 2:1-12

  • “CERO” UTELO WI JURURIEKO NITUNDO I YERUSALEM MAN IBANG’ YESU

Dhanu moko ma co giai yo Nyangu. Gitie jururieko ma ponjo lembe iwi nyikaluku, giparu nia eno konyogi ninyutho lembe m’utimere i kwo mi dhanu. (Isaya 47:13) Kinde ma fodi gitie i pacu migi yo Nyangu, gineno “cero” moko, man cerone telo wigi i wotho mi kilometre ma lee nitundo i Yerusalem ento ungo i Bethlehem.

Kinde ma jururieko gitundo, gipenjo kumae: “Ng’atu ma junyolo ni Ubimo mi Juyahudi e, eni kani? Kum waneno cero pare yo nyangu, wabino de nirwo ire.”​—Matayo 2:1, 2.

Kinde ma Herode uwinjo lembuno, cwinye ng’abere lee mandha. E egam ecoko julam man judong dini mi Juyahudi man epenjogi pi ning’eyo kaka ma Kristu binyolere i ie. Nimakere ku Lembagora, gidwoko ire nia, “i Bethlehem.” (Matayo 2:5; Mika 5:2) Lembe maeno uketho Herode ulwong’o jururieko maeno nyalwe ibang’e man ewacu igi kumae: “Wuci wuyeny cu pi nyathin ma nok; ka wunwang’e de, wukel lembene ira, kara an bende abin arwo ibang’e.” (Matayo 2:8) Ento, i andha Herode ubino mito enwang’ nyathin manok maeno kara enege cen!

Kinde ma jururieko maeno giwok, lembe moko mi zungo ugam utimere. “Cero” ma gineno kinde ma fodi gibino i bang’gi yo Nyangu, uwok nitelo wigi. Ubenen kamaleng’ nia, eno ubino ngo cero ma bewok nja i kor polo, ento ewok kende kende pi nitelo wigi. Cerone utelo wigi nitundo gimondo i ot ma Yosefu giku Maria gini ie ku nyathin migi.

Kinde ma jururieko gimondo i ot, ginwang’u Maria karacelo ku Yesu ma nwang’u fodi etie nyathin ma nok. E gipodho piny girwo ire. Man gimio ire giramia dupa; or, udok ma ng’wice ng’ar, man mo ma ng’wice ng’ar. Ing’eye, kinde ma dong’ gimito gidok i bang’ Herode, Mungu ukwerogi i lek nia kud gidok kuca. Pieno gikwanyu yo mange pi nidok i ng’om ma thugi.

Iparu nia ng’a m’uketho “cero” utelo wi jururieko maeno? Poi nia, cerone utelo ngo wigi wang’ acel i bang’ Yesu i Bethlehem. Ento, etelo wigi nitundo i Yerusalem, kaka ma gicidh girombo ie kud ubimo Herode, m’umito eneg Yesu. Ka nwang’u Mungu k’umondo ngo i lembene, nwang’u enege, man Mungu yero ni jururiekonegi nia kud ginyuth ni Herode kaka ma Yesu ni ie. Ubenen kamaleng’ nia, Sitani ma tie jadegi pa Mungu re m’umito juneg Yesu, man emito etii ku yo maeno pi nitimo lembakeca pare.