Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MIR 10

Yesu ku juruot pagi gicidho i Yerusalem

Yesu ku juruot pagi gicidho i Yerusalem

LUKA 2:40-52

  • YESU UBEPENJO JUPONJI KINDE MA ORO PARE TIE 12

  • YESU ULWONG’O YEHOVA NIA “VWA”

Saa uromo ma Yosefu ku juruot pare, karacelo ku jurimbe man wat pare gibed gicidho i ie i Yerusalem ku bang’ oro pi nicitimo foc mi Kadhukuwijo, calku Cik pa Mungu. (Poi mi Cik 16:16) Niai i Nazareti niloro i Yerusalem utie wotho mi kilometre 120. Etie saa ma dhanu ceke beyikiri i ie, man ma ketho gibedo kud anyong’a. I saa maeno, Yesu dong’ utie ku oro 12, man ebekuro kud ava nindo maeno mi foc ma pire tek, man ninwang’u kaka mi bedo kendo ceng’ini kud hekalu.

Timo Kadhukuwijo utie ngo foc mi nindo acel kende ni Yesu man ni juruot pagi. I ng’ei nindo mi foc mi Kadhukuwijo, jutimo foc mi kwen ma thobi mbe i ie, focne timo nindo abiro. (Marko 14:1) Saa mi Kadhukuwijo eno ubed uting’o nindo dupa. Niai i Nazareti, nicitimo nindo moko i Yerusalem, man niloko nidwogo i pacu, eno ceke timo yenga ma romo adek. Ento oro maeni, gibitimo nindo ma lee nikum lembe moko ma Yesu bitimo. Gibin ginyang’ ikum lembene kinde ma gibedwogo kud i Yerusalem.

Kinde ma gibedwogo, Yosefu giku Maria gibino niparu nia Yesu utie ikind wedi man jurimo migi ma gibino niwotho i wang’gi. Re kinde ma gitundo ka m’ukwayu givut i ie pilembe uthieno mondo, ginwang’u embe. Pieno gicaku nisaye ikind dhanu ma giwotho kugi, ento ginwang’e ngo. Nyathin migi urwinyo! Yosefu giku Maria gidok kendo i Yerusalem nisaye.

Gisaye duu ginwang’e ngo. Kadok nindo mir arionde de ginwang’e ngo. Ento gibin ginwang’e nindo mir adege. Gineno Yesu ubedo ikind juponji mi Juyahudi. Ebewinjogi, ebepenjogi ku penji, man igi ubewang’ lii i kume pi ng’eyong’ec pare.

Maria upenje kumae: “Woda, nedi itimo kumeni i bang’wa? Nen, waku wuru wayenyi ku can kwa.”​—Luka 2:48.

E ezungogi nia ging’eyo ngo ka m’ukwayu ebed i ie. Epenjogi kumae: “Wuyenya nedi? Wung’eyo ngo nia akoabed i [ot] pa Vwa be?”​—Luka 2:49.

Calu ma kawoni dong’ ginwang’e, ecoko woth kugi pi nidok i Nazareti man emedere niworo junyodo pare. Emedere nidongo man rieko pare de umedere ameda kumeca. Niai m’ejalawobi, enwang’u bero i wang’ Mungu man iwang’ dhanu bende. M’umbe jiji, Yesu uweko lapor maber niai m’enyathin, lapor mi dieng’ ikum lembe mi tipo man mi nyutho woro ni junyodo bende.