Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MIR APAR ARIO

Icopo doko jarimb Mungu nenedi?

Icopo doko jarimb Mungu nenedi?

1, 2. Kekwan dhanu moko ma gibino jurimb Yehova

ICOPO mito nia jarimbi ubed ng’atu ma nenedi? M’umbe jiji, icopo mito nia jarimbi ubed ng’atu m’imaru. Ebed bende ng’atu ma wuwinjuru kude maber. Ng’atu ma kura pare ber man ma timo pare nyeng’i.

2 Yehova Mungu beng’io dhanu moko gibed ni jurimbe. Ku lapor, Abraham ubino acel m’ikind jurimb Yehova. (Isaya 41:8; Yakobo 2:23) Yehova umaru bende Daudi, uketho ewacu nia ebino ‘ng’atu ma kacwinye.’ (Tic mi Jukwenda 13:22) Jabila Daniel ke ubino ng’atu ma Yehova ‘umaru dit.’Daniel 9:23.

3. Pirang’o Abraham, Daudi, man Daniel gibino jurimb Yehova?

3 Abraham, Daudi, man Daniel gitimo ang’o kara gidok jurimb Yehova? Yehova uwacu ni Abraham kumae: “Iworo dwanda.” (Thangambere 22:18) Dhanu ma gibed gijwigiri ni Yehova, man ma giwore, gin kendgi re ma giromo doko jurimbe. Kadok dhanu mi thek acel zoo de copo doko ni jurimbe. Yehova ung’olo ni thek mir Israel kumae: “Wuwinj [niwacu, wuwor] dwanda, e abibedo Mungu mu, man wubibedo dhanu para.” (Yeremia 7:23) Pieno, in de kan imito andha nia ibed jarimb Yehova, ukwayu iwore.

YEHOVA BEGWOKO JURIMBE

4, 5. Yehova begwoko jurimbe nenedi?

4 Biblia uwacu nia Yehova besayu yo mi “nyuthre gire tek ni ju ma adundegi bedo ndhu cu yor i bang’e.” (2 Lemkei 16:9) I Zaburi 32:8, Yehova ung’olo ni jurimbe  kumae: “Abidwoki riek man abiponji ku yo m’ibiwotho i ie: abimio iri rieko lembe ku wang’a ma ni i wii.”

5 Jakwor moko ma tie ku tego lee [niwacu, Sitani], ubemito nicerowa kara kud wabed jurimb Mungu. Ento Yehova ubemito nigwokowa. (Som Zaburi 55:22.) Wan ma watie jurimb Yehova, wabetimo ire kud adunde mwa ceke. Wabegwoko bedoleng’ mwa ire kadok wanwang’ara i peko ma tek de. Bende, watie ku tegocwiny ma rom ku pa jagor zaburi, m’ukiewo kumae iwi Yehova: “Kum eni i cinga ma yor acwic, cwinya biringo ngo.” (Zaburi 16:8; 63:8) Sitani ubepimo nenedi nicerowa kara kud wabed jurimb Yehova?

ADOTE PA SITANI

6. Sitani uloko lembang’o pi dhanu?

6 I wic mir 11, waponjo nia Sitani uloko lembe iwi Yehova man edote nia etie javupo man etie ng’atu m’atira ngo, pilembe Yehova uweko ngo kaka ni Adamu giku Eva ging’ii gin gigi gin maber ku gin marac. Biblia ubeponjowa i buku pa Yob nia, Sitani udoto bende dhanu ma gibemito nibedo jurimb Mungu. Eloko nia gibetimo ni Mungu pi bero moko ma gicopo nwang’u kud ibang’e, ento pi mer ma gimare ko re ngo. Bende, Sitani uloko nia ecopo wingo wi dhanu ceke kara gijai ni Mungu. Wakenen ponji ma wacopo nwang’u niai kud i lapor pa Yob, man kite ma Yehova ugwoke ko.

7, 8. (a) Yob ubino ng’atu ma nenedi iwang’ Yehova? (b) Sitani ke uyero ang’o pi Yob?

7 Yob ubino ng’a? Yob ubino ng’atu maber; niai m’egam ekwo i ng’om, oro udaru kadhu 3 600 kumeni. Yehova uyero nia ng’atu moko acel de mbe m’ubino calu Yob iwi ng’om, i saa m’ebino kwo i ie. Yob ubino ku woro ma thuth ibang’ Mungu man edagu dubo. (Yob 1:8) Eyo, Yob ubino jarimo mandha pa Mungu.

 8 Sitani uloko nia Yob ubino nitimo ni Yehova kara enwang’ bero moko niai i bang’e. Ewacu ni Yehova kumae: “Itwodo arara [niwacu, gang’] i kume ngo, man kum ot pare, man kum gin ceke m’ebedo ko, i ng’ete gbur ungo? Imio mugisa kum tic m’i cinge, e lim pare nyai i ng’om. Ento riei cingi kawono, man imul gin ceke m’ebedo ko, e ebicei i weng’i.”Yob 1:10, 11.

9. Yehova umio ni Sitani kaka mi timo ang’o?

9 Sitani udoto Yob nia ebino timo ni Yehova, kende kende pilembe ecopo nwang’u bero moko ibang’e. Sitani uloko bende nia ecopo ketho Yob uwek nitimo ni Yehova. Yehova uyio ngo lembe pa Sitani, ento Emio kaka ire nia eke emul i Yob kara enen ka nyo Yob ubeworo Mungu pi mer m’emare ko kunoke ngo.

SITANI UMIO PEKO IKUM YOB

10. Sitani umio peko makani ma tung’ tung’ ikum Yob, man Yob ke utimo ang’o?

10 Mi kwong’o, Sitani uketho juyaku, man junyotho lim ceke ma Yob ubino ko. Ing’eye, Sitani unego jurutic ma pol pa Yob. Piny pa Yob unyothere ceke. Kendo, Sitani umio peko madit ikum Yob: enego awiya pare apar ceke ku yamu madit. Ento Yob umedere nigwoko bedoleng’ pare ni Yehova. “I maeni ceke Yob udubo ngo, kadi edwoko lembe rac de ngo ni Mungu.”Yob 1:12-19, 22.

Yehova umio mugisa ni Yob pilembe egwoko bedoleng’ pare

11. (a) Sitani umio peko mange makani ikum Yob? (b) Yob ke utimo ang’o?

11 Sitani uol ungo. Enyayu piem i dhu Mungu, ewacu kumae: “Riei cingi kawono, man imul cogone ku ring’kume, e ebicei i weng’i.” E Sitani ugam ugoyo Yob ku twoyo ma pek akeca. (Yob 2:5, 7) Saa maeno bende, Yob umedere asu nigwoko bedoleng’ pare ni Yehova. Ewacu kumae: “Abicoro bedocu [niwacu, bedoleng’] para cen ungo kud i kuma maram abitho ko.”Yob 27:5.

12. Yob unyutho nenedi nia Sitani ubino javupo?

 12 Yob ung’eyo ngo lembe moko acel de ikum adote pa Sitani, man eng’eyo ngo nia pirang’o ebino ninwang’u peko ma lee rukeca. Eparu nia Yehova re m’ubino nimio ire masendi. (Yob 6:4; 16:11-14) Ento kadok eparu kumeno de, Yob umedere asu nigwoko bedoleng’ pare ni Yehova. M’umbe jiji, Yob ubino ngo nitimo ni Yehova pi piny m’ebedo ko. Ebino jarimb Mungu pilembe emare. Kumeno re m’enyutho kamaleng’ nia, adote ceke pa Sitani ubino vupo ma lee.

13. Gwokobedoleng’ pa Yob ubino ku matoke makani?

13 Kadok Yob ung’eyo ngo lembe m’ubino nitimere i polo de, re egwoko bedoleng’ pare ni Mungu man enyutho nia Sitani tie ng’atu marac. Yehova umio mugisa ni Yob pilembe egwoko bedoleng’ pare ire, m’enyuthere ko nia etie jarimo mandhandha pa Mungu.Yob 42:12-17.

KITE MA SITANI UBEDOTO KO IN BENDE

14, 15. Sitani ubedoto dhanu ceke nenedi?

14 Lembe m’unwang’u Yob copo mio iri ponji ma pire tek. Tin eni, Sitani ubedotowa nia wabetimo ni Yehova pi bero moko ma wacopo nwang’u ibang’e. I buku pa Yob 2:4, Sitani uloko kumae: “Gin ceke ma dhanu bedo ko ebimio pi kwo pare.” Pieno, wacopo yero nia Sitani udoto Yob kende ngo, ento ebedoto dhanu ma co ku mon ceke nia gibeworo Mungu pilembe gikio bero moko ibang’e. Oro dupa ing’ei tho pa Yob, Sitani ubino medere asu nicayu Yehova man nidoto jurutic pare. Ku lapor, i Lembrieko 27:11, Biblia uwacu kumae: “Woda, bed riek, man nyai mutoro i adundena, kara alok lembe ni ng’atu m’ucaya.”

15 Icopo ng’io niworo Yehova man nibedo jarimbe ma ceng’ni; kumeno re m’ibinyutho nia Sitani tie  javupo. Kadok bikwayu nia itim alokaloka ma lee i kwo peri pi nidoko jarimb Mungu de, ng’ei nia eno tie yub maber m’usagu zoo m’icopo nimaku! Etie lembe m’ukwayu ngo inen ku tuko. Sitani ubeloko nia in, ibigwoko ngo bedoleng’ peri ni Mungu kan itie ku peko. Ebepimo niwondowa kara kud wagwok bedoleng’ mwa iwang’ Mungu. Nenedi?

16. (a) Sitani ucikutio ku yo makani pi pimo nicero dhanu kara giwek nitimo ni Yehova? (b) Wonabali copo pimo nenedi niceri in bende kara iwek nitimo ni Yehova?

16 Sitani ubetio ku yo dupa dit pi nipimo nicerowa kara wawek nibedo jurimb Mungu. Emito emakwa ‘calu umvor m’ubeywak, m’ubewotho ku ku ku, m’ebeyenyo ko ka ng’atu m’ecam.’ (1 Petro 5:8) Ka jurimbi, wat peri kunoke dhanu mange gibepimo niceri kara iwek niponjo Biblia man nitimo lembe m’atira, lembe maeno kud uzungi akeca. Icopo nwang’u nia ve jubenyayu peko i kumi. * (Yohana 15:19, 20) Sitani lokere bende gire “ni malaika mi der.” Pieno, ecopo pimo niwondowa kara watur cik pa Yehova. (2 Jukorinto 11:14) Yo mange ma Sitani tio ko pi pimo nicerowa kara wawek nitimo ni Yehova, tie niketho wapar nia waromo tundo ngo nitimo ni Mungu.Lembrieko 24:10.

WOR CIK PA YEHOVA

17. Pirang’o wabed waworo Yehova?

17 Ka wabeworo Yehova, nwang’u wabenyutho nia Sitani tie javupo. Ang’o ma bikonyowa nibedo wor? Biblia uwacu kumae: “Mar Yehova Mungu peri kud adundeni ceke, man ku ng’eyong’ec peri ceke, man ku tegoni  ceke.” (Poi mi Cik 6:5) Wabed waworo Yehova pilembe wamare. Kinde ma wabemedara nimaru Yehova, wabibedo kud ava mi timo lembe ceke m’ekwayu nia watim. Jakwenda Yohana ukiewo kumae: “Kum maeni en e mer pa Mungu, nia wawor cik pare: man cik pare gi pek ungo.”1 Yohana 5:3.

18, 19. (a) Kekwan lembe moko ma Yehova neno rac. (b) Wang’eyo nenedi nia Yehova copo ngo nikwayu watim lembe ma wacopo tundo ngo nitimo?

18 Dong’, lembe moko makani ma Yehova uyero iwa nia gitie rac? Moko nwang’ere i sanduku ma thiwie tie, “ Dag lembe ma Yehova udagu.” Lembene moko kan inenogi anena, icopo paru nia gitie rac magwei ungo. Ento kinde m’ibesomo i Biblia, verse ma tung’ tung’ ma junyutho man ibenyamu i lembe m’ibesomone, ibinyang’ nia etie lembe mi rieko niworo cik pa Yehova. Icopo nwang’u bende nia ukwayu itim alokaloka  moko i kwo peri. Kadok saa moko ecopo bedo yot ungo iri nitimo kumeno de, re timo alokaloka maeno biketho ibinwang’u kwiocwiny ku mutoro ma ng’atini copo nwang’u kan etie jarimo mandha pa Mungu. (Isaya 48:17, 18) Wang’eyo nenedi nia ecopere iwa nitimo alokaloka maeno?

19 Yehova copo ngo nyanok de nikwayu watim lembe moko ma wacopo tundo ngo nitimo. (Poi mi Cik 30:11-14) Calu etie jarimbwa mandha, eng’eyowa cuu nikadhu ma wang’eyara ko giwa. Eng’eyo tego mwa man ng’ico mwa. (Zaburi 103:14) Jakwenda Paulo uketho cwinywa kumae: “Mungu en e mandha, m’ebiyio ngo ya jubidhwu ma sagu ma wucopo bedo ko: ento karacelo kud abidhe nica ebiketho yojboth bende, kara wucopo cire.” (1 Jukorinto 10:13) Wacopo bedo ku genogen nia saa ceke, Yehova bibemio iwa tego mi timo gin m’atira. Ebimio iri “tego m’ukadhu tego maeni”  kara ukonyi niciro peko ma tung’ tung’. (2 Jukorinto 4:7, NWT) Yehova umio kony ni Paulo i saa ma kumeno mi peko; pieno, Paulo uyero kumae: “Acopo timo gin ceke ni kume m’emio ira tego.”Jufilipi 4:13.

PONJ NIMARU LEMBE MA MUNGU UMARU

20. Ukwayu ilub kite makani, man pirang’o?

20 Ka wamaru wadok jurimb Yehova, wacikara niweko nitimo lembe m’edagu; ento, eno kende uromo ngo. (Jurumi 12:9) Jurimb Mungu gimaru gin ma Mungu umaru. Juweco pi timo migi i Zaburi 15:1-5. (Som.) Jurimb Yehova gilubo kite [niwacu, kurayung] pa Mungu; ginyutho “mer, mutoro, kwiocwiny, mwonyolembe hai, bedo ber ku dhanu, berocwiny, bedo mandha [kunoke, yioyic], molcwiny, kweri gijo.”Jugalatia 5:22, 23.

21. Icopo ponjo nenedi ninyutho kite ma Yehova umaru?

21 Icopo ponjo nenedi ninyutho kite maeno? Kara ing’ei gin ma Yehova umaru, ukwayu ibed isom man iponj Biblia kubang’ nindo. (Isaya 30:20, 21) Kan ibetimo kumeno, mer m’imaru ko Yehova bilund medere, man ing’eye, ibibedo kud ava mi wore.

22. Bero makani m’ibinwang’u kan iworo Yehova?

22 Alokaloka m’ukwayu itim, jucopo nipore ku wodho bongu ma con cen, man nidok ronyo ma nyen. Biblia uwacu nia ukwayu ‘niwanyu ng’atu [niwacu, kura] ma con cen,’ man nironyo “ng’atu ma nyen.” (Jukolosai 3:9, 10) Kadok ecopo bedo lembe ma yot ungo de, re ka wabetimo alokaloka maeno, man wabeworo Yehova, eng’olo nia ebimio iwa “sukulia ma dit.” (Zaburi 19:11) Eyo, tim ng’iyong’ic mi woro Yehova man nyuth nia Sitani tie javupo. Tim ni Yehova, ungo nia pilembe ibinwang’u bero moko nindo m’ubino, ento pi mer m’imare ko i andha. Kan itimo kumeno, ibidoko jarimo mandha pa Mungu!

^ par. 16 Eno nyutho ngo nia Sitani ubecwalu en dhanu ceke ma gibepimo niceri iwek niponjo Biblia. Ento Sitani re m’utie “mungu mi ng’om maeni,” man “ng’om ngung’ de vuto i [tego pare].” Pieno, wacopo zungo ngo akeca ka dhanu moko gibepimo nicerowa kara kud watim ni Yehova.2 Jukorinto 4:4; 1 Yohana 5:19.