Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 PONJI MIR 2

Rebeka maru ninyayu anyong’a i Yehova

Rebeka maru ninyayu anyong’a i Yehova

Rebeka bino dhaku m’umaru Yehova. Nying won ot pare bino Isak. En de emaru Yehova. Rebeka nwang’u Isak nenedi? Enyutho nenedi nia emaru ninyayu anyong’a i Yehova? Wakeponj lembe moko i wiye.

Junyodo pa Isak ubino Abraham giku Sara. Gibed gikwo i ng’om mi Kanan, kaka ma dhanu ubed uworo ngo i ie Yehova. Ento Abraham umaru nia wode ugam dhaku ma woro Yehova. Pieno eoro jatic pare ma ve nyinge bino Eliezer, ecidh egam dhaku ni Isak i ng’om ma julwong’o Haran, kaka ma wat pa Abraham moko ubed ukwo i ie.

Rebeka bedo ayika nitwomo pii m’amadha kud amora ni ngamia

Eliezer ucidho karacelo ku jurutic mange pa Abraham. Ebino woth mabor akeca. Gicidho ku ngamia apar, ngamia ne uyeyo cam man giramia ma tung’ tung’. Eliezer bing’eyo nenedi dhaku m’ukwayu egam ni Isak? Saa ma Eliezer ku jurutic mange gitundo i Haran, giwok gicungo i dhu kulo m’atong’a, pilembe Eliezer ung’eyo nia dhanu bigalu ngo nibino twomo pii. Egam erwo ni Yehova eyero kumae: ‘Nyaku m’abiwacu ire nia emi ira pii amadhi man ebimio ira pii man bende ni ngamia para, abing’eyo nia nyaku maeca re m’ingiyo.’

E nyaku ma nyinge Rebeka ubino i kulo matong’a. Biblia yero nia wang’e  bino leng’ dit mir anena. Eliezer ukwaye nia emi pii emadhi, e egam eyero kumae: ‘Ber. Gam imadhi man abitwomo ni ngamia peri bende.’ Kepar nyanok! Ngamia ma riew pii benego madhu pii lee, pieno ukwayu Rebeka udok kendo kendo nitwomo pii. Nyo ibeneno i cal kite m’ebetimo ko tic kud amora?— Eliezer uzungo dit kite ma Yehova udwoko ko wang’ rwo pare.

Eliezer umio giramia dupa ma beco ni Rebeka. Rebeka ukwayu nia Eliezer ku jurutic mange m’ewotho kugi gicidh i pacu pagi. Eliezer ukoro thelembe m’uketho Abraham uore kuca man kite ma Yehova udwoko ko wang’ rwo pare. Jupagi Rebeka ufoyo niweko nia Rebeka udok dhaku pa Isak.

Rebeka cidho kud Eliezer i Kanan man edoko ni dhaku pa Isak

Ento, iparu nia Rebeka maru nibedo dhaku pa Isak?— Rebeka ng’eyo nia Yehova re m’uoro Eliezer i bang’e. Pieno, saa ma jupagi Rebeka upenje nyo emaru nicidho i Kanan pi nidoko dhaku pa Isak, eyero kumae: ‘Eyo, abicidho.’ Ndhundhu, egam ecoko woth karacelo kud Eliezer. Saa ma gitundo i Kanan, egam edoko ni dhaku pa Isak.

Rebeka timo tap yeny pa Yehova, e Yehova mio ire mugisa. Oro dupa ing’eye, Yesu ugam unyolere i thekwaru pare! In de kan itimo ve Rebeka, niwacu kan inyayu anyong’a i Yehova, e ebimio iri mugisa bende.