Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 PENJI MI 4

Acopo timo ang’o kan akoso?

Acopo timo ang’o kan akoso?

PIRANG’O PENJI MAENO

Kan ibed iyio kosa peri, ibibedo dhanu m’atira man ma jugeno.

ICOPO TIMO ANG’O?

Kepar lembe mae: Kinde ma Tim gibetuko ku jurimbe, egoyo mupira ung’enyo kieu mi mutukari pa jadhugola (jirani) migi.

Ka nwang’u itie Tim, nwang’u icopo timo ang’o?

KEPAR!

LEMBE TIE ADEK KUMENI M’ICOPO NG’IYO NITIMO:

  1. 1. Niringo.

  2. 2. Niloko lembe iwi ng’atu mange.

  3. 3. Nikoro lembe m’utimere ni jadhugola m’ing’enyo kieu mi mutukari pare, man niyero ire nia jubiculo.

Icopo paru nia ing’ii lembe mi A. Ento etie lembe ma pire tek niyio kosa peri, kadok nwang’u ing’enyo kieu kunoke itimo kosa mange.

 UKWAYU IYII KOSA PERI PI THELEMBE ADEK

  1. Etie ber nitimo kumeno.

    Biblia uwacu kumae: “Wabeyenyo wabed . . . ber i gin ceke.”Juebrania 13:18.

  2. Dhanu bemaru nitimo kisa yot yot ni ju ma yio kosa migi.

    Biblia uyero kumae: “Ng’atu ma umo kier pare lembe pare bibedo miero ngo; Ento ng’atu ma tek utuco man ewekogi ebinwang’u kisa.”Lembrieko 28:13.

  3. Pire tie tek niyio kosa pilembe enyayu anyong’a i Mungu.

    Biblia uwacu kumae: “Ng’atu ma kit lembe pare mbe en e gin ma judagu iwang’ Yehova; Ento lembapora pare ni ku ju m’atira.”Lembrieko 3:32.

Karina, ma oro pare 20, ukanu karatasi mir amandi ma jumio ire pi ng’wec m’eringo matek akeca ku mutukari, kara won kud ung’ei. Ento eromo ngo nikanu karatasi maeno pi nja. Karina ukoro kumae: “Ing’ei oro acel kumeni, baba urubo karatasi maeno ma jukiewo nyinga i wie. Afonyolo lembe dong’ magwei i kuma!”

Karina unwang’u ponji makani? Ekoro kumae: “Nibedo ling’ iwi kosa nyotho lembe anyotha, idok inwang’u matoke marac kokoro i ng’eye!”

PONJI M’IROMO NINWANG’U IKUM KOSA PERI

Biblia uwacu kumae: “I gin dupa wan ceke wakier.” (Yakobo 3:2) Calu ma waneno malu no, etie ber niyio kosa peri pio pio, pilembe eno binyutho nia ijwigiri man iteng’ni.

Lembe mange m’icopo nitimo tie ninwang’u ponji ikum kosa peri. Nyaku moko ma nyinge Vera uwacu kumae: “Kosa moko ci m’atimo bebedo ira ni ponji, man aketho ebedo ira ni cimowang’ ma bikonya nibedo dhanu m’atira man ninyego ku lembe mange ma bibino i kite ma tung’ tung’.” Wakenen kite m’icopo nitimo ko.

Ikwayu gari pa wuru, e garine unyothere iri. Icopo timo ang’o?

  • Nibedo ling’ pilembe iparu nia wuru ung’eyo ngo.

  • Niyero lembe m’utimere tap tap ni wuru.

  • Niyero ni wuru lembe m’utimere, re niloko lembene iwi ng’atu mange.

Iyongo i examen moko pilembe iponjo ngo piny cuu. Icopo timo ang’o?

  • Niloko nia examen ne ubino tek dit.

  • Niyio nia iyongo pi kosa peri giri.

  • Niloko nia japonjo udegi dit.

Niketho wii akeca iwi kosa m’ukadhu, tie ve nineno weng’i kilili ku kieu (maraya) ma nyutho lembe mi ng’eijo kinde m’iberingo mutukari

 Kedok iwi lembe ma jukoro pi gari man pir examen i mbaya mir 13, man kepar nia itie (1) wuru man (2) japonjo peri. Wuru giku japonjo peri gicopo bedo ku nen ma nenedi i wii kan iyio kosa m’itimo?Gicopo neni nenedi kan iumo wi kosane?

Kepar pi kosa moko acel m’itimo ikind oro m’ukadhu, ing’eye dwok wang’ penji m’ulubo e.

Itimo kosa makani? Ing’eye ke itimo nenedi?

  • Aling’ i wie.

  • Aloke iwi ng’atu mange.

  • Ayio kosane.

Kan iyio ngo kosane, idok iwinjiri nenedi ing’eye?

  • Awinjara maber—Pilembe avoyo!

  • Cwinya upido—Nwang’u timba ayer lemandha.

Nwang’u icikiri nitimo ang’o pi nidaru lembene?

Inwang’u ponji makani ikum kosa peri?

IPARU NENEDI?

Pirang’o dhanu moko gimito ngo giyii kosa migi?

Dhanu gibineni nenedi ka nja ibed iumo wi kosa peri? Kan ibed iyio kosa peri ke, gibineni nenedi?Luka 16:10.