Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 WIC MIR 14

Bed ng’atu m’atira i lembe ceke

Bed ng’atu m’atira i lembe ceke

‘Wabeyenyo wabed atira i gin ceke.’ ​—JUEBRANIA 13:18.

1, 2. Yehova winjere nenedi kinde m’ebeneno wabetimo kero nibedo dhanu m’atira?

KINDE ma jalawobi moko ubedwogo kud i somo, ewok enwang’u usau moko upodho ku sente bik i ie. Ebitimo ang’o? Nwang’u ecopo kane ire. Ento, edwoke i bang’ won sentene. Kinde ma min jalawobine uwinjo pi lembe ma wode utimo, anyong’a unege lee mandha.

2 Junyodo dupa gibedo kud anyong’a kan awiya migi utie dhanu m’atira. Yehova, Wegwa mi polo, tie “Mungu mi lemandha,” man ebedo kud anyong’a ka watie dhanu m’atira. (Zaburi 31:5) Wamito wanyai anyong’a i ie man ‘wabed atira i gin ceke.’ (Juebrania 13:18) Wakewec iwi yo ang’wen ma tung’ tung’ ma bed’atira copo bedo iwa tek i ie. I ng’eye wabiweco iwi bero ma bed’atira copo mio.

WABED DHANU M’ATIRA IWA GIWA

3-5. (a) Wacopo bedo ngo dhanu m’atira iwa giwa nenedi? (b) Ang’o ma bikonyowa nibedo dhanu m’atira iwa giwa?

3 Kara wabed dhanu m’atira ni jumange, ukwayu walar wabed dhanu m’atira iwa giwa. Eno bebedo ngo kwa lembe ma yot. I rundi ma kwong’a, umego mi cokiri mi Laodikia giwondiri gigi ku paru ma nia  gibenyayu anyong’a i Mungu ma ke i andha, gibino nyayu ngo anyong’a i ie. (Lembanyutha 3:17) Wan de saa moko wacopo niwondara nia watie dhanu m’atira ma ke nwang’u watie ngo kumeca.

4 Jakwenda Yakobo ukoro kumae: ‘Tek ng’atu moko ie pido ya en e jakusoma, ma k’ecero lebe ngo enke ebewondo adundene, nwang’u kusoma pa ng’atuno en e mananu.’ (Yakobo 1:26) Wacopo wondara giwa ka waparu nia tekene wabemedara nitimo lembe moko ma cuu ci, Mungu bidieng’ ungo kadok wiwa tek, watie jucac kunoke wacwayu ndra. Lembang’o ma copo konyowa kara kud wawondara giwa?

5 Kinde ma wabenenara i maraya, wacopo neno kite ma watie ko yo woko. Kinde ma wabesomo Biblia, wacopo neno kite ma watie ko yor i iwa. Biblia copo konyowa ning’eyo lembe ma watek i ie man ma wang’ic i ie. Waponjo ning’eyo alokaloka m’ukwayu watim i paru, i timo man i wec mwa. (Som Yakobo 1:23-25.) Re ka wan giwa wayero nia wambe ku racu moko acel de, wacopo nitimo ngo alokaloka m’ukwayere. Pieno wacikara nitio ku Biblia pi ning’iyara cuu mandha. (Ywak 3:40; Hagai 1:5) Rwo bende konyowa ning’eyo kite ma watie ko i andha. Wacopo kwayu Yehova i rwo nia eng’ii iwa man ekonywa wanen ng’ico ma watie ko kara watim alokaloka. (Zaburi 139:23, 24) Wapoi nia “ng’atu ma kit lembe pare mbe, en e ginmajudagu i wang’ Yehova; ento lembapora pare ni ku ju m’atira.”​—Lembrieko 3:32.

BED DHANU M’ATIRA I KWO MI JURUOT

6. Pirang’o nico ku dhaku gicikiri bibedo dhanu m’atira i kindgi?

6 Bedo dhanu m’atira tie lembe ma pire tek lee mandha  i kwo mi juruot. Ka nico ku dhaku gibeweco thwolo thwolo i kindgi, ginwang’u nia gibekwo ku bedomoth man gigeniri andha. Jucopo koso nibedo dhanu m’atira i gamiri i ayi ma tung’ tung’. Ku lapor, ng’atu m’ugamere copo caku bedo ku wang’ mi mer i kum ng’atu mange, nineno pornografi kunoke nipidho i amung’ winjiri mi mer ku ng’atu ma tie ngo jadhoge mi gamiri. Kenen lembe ma jagor zaburi uyero: “Abedo karacelo ku dhanu mi ndra ngo; kadok weg abombi de abimondo karacelo kugi ngo.” (Zaburi 26:4) Tek itie dhanu m’atira ngo ni jadhogi mi gamiri kadok i paru peri, eno binyotho gamiri mwu.

Kwer m’umbe galu gin moko ci ma copo nyotho gamiri peri

 

7, 8. Icopo tio nenedi ku Biblia pi niponjo awiya peri ginyang’ nia pire tie tek nibedo dhanu m’atira?

 7 Awiya bende gicikiri ning’eyo nia bedo dhanu m’atira pire tek. Junyodo copo tio ku Biblia pi niponjo igi lembe maeno. Biblia utie ku lapor mi ju ma gibino ngo dhanu m’atira: Akan, m’udoko jakwo; Gehazi, m’ucwayu ndra kara enwang’ sente man Yuda, m’ukwalu sente man i ng’eye ecibo Yesu pi sente mi tongolo 30.​—Yocuwa 6:17-19; 7:11-25; 2 Ubimo 5:14-16, 20-27; Matayo 26:14, 15; Yohana 12:6.

8 Biblia utie bende ku lapor mapol ma beco mi ju ma gibino dhanu m’atira: Yakobo, m’ung’olo ni wote nia gidwok sente ma ginwang’u; Yefta ku nyare, ma gigwoko lembang’ola migi ni Mungu; man Yesu, m’ubino ng’atu m’atira kadok i wang’ lembe ma tek. (Thangambere 43:12; Jupoklembe 11:30-40; Yohana 18:3-11) Lapor maeno copo konyo awiya ginyang’ nia pire tie tek nibedo dhanu m’atira.

9. Ka junyodo gitie dhanu m’atira, lembuno bikonyo awiya migi nenedi?

9 Junyodo gicopo ponjo lembe lee niai kud i cik mir ukungu ma e mi Biblia: “Ka kumeno in m’iponjo ng’atu mange, iponjri giri ngo? in m’iponjo ya maku dhanu kud ukwal kwo, in e m’idong’ ikwalu kwo?” (Jurumi 2:21) Awiya ging’eyo ka junyodo migi gibed giyero lembe moko ma re gitime ngo. Ka wabed wayero ni awiya mwa nia gibed dhanu m’atira ma wan giwa ke watie ngo dhanu m’atira, wigi bijebere. Kan awiya gibeneno nia junyodo migi cwayu ndra, kadok i lembe ma thindho thindho, gin de gicopo timo lembe ma rom. (Som Luka 16:10.) Tung’ ku maeno, kan awiya gibeneno nia junyodo migi tie dhanu m’atira,  eno bikonyogi nibedo junyodo ma jugeno kinde ma gin de gibinyolo awiya.​—Lembrieko 22:6; Juefeso 6:4.

BED DHANU M’ATIRA I COKIRI

10. Wacopo bedo dhanu m’atira nenedi i wec mwa ku Jukristu wadwa?

10 Wacikara bende nibedo dhanu m’atira ku Jukristu wadwa ma gitie umego ku nyimego. Etie yot iwa niketho wec mwa ma kubang’ ceng’ udok ni yero nying’. Ka wabedok iwi lembe moko ma wang’eyo ngo ka nyo etie lemandha, wacopo nyayu vupo. Etie ber mandha nia ‘wacer dendhogwa.’ (Lembrieko 10:19) Nibedo ng’atu m’atira nyutho ngo nia wayer lembe moko ci ma waparu, ma wang’eyo kunoke ma wawinjo. Kadok lembe ma wabeciyero tie lemandha, re ecopo bedo lembe mwa ngo, kunoke ecopo bedo ber ungo nia wayere ni jumange. (1 Jutesaloniki 4:11) Dhanu moko becero bang’ tegowic migi ku paru ma nia, “an lembe ma rac ayero.” Ento wa dhanu pa Yehova, saa ceke wamito wec mwa ubed ma kadu uromo man ma ber.​—Som Jukolosai 4:6.

11, 12. (a) Ka ng’atu moko m’udubo ubeyero ngo lembe i atira, eno copo dwoko lembe pare doko rac magwei nenedi? (b) Ka wanwang’u nia jarimbwa moko utimo dubo ma pek, wacikara niurara i kum paru makani? (c) Wacopo nyutho nenedi nia watie atira ku dilo pa Yehova?

11 Yehova umio ni judong cokiri rwom mi konyo cokiri. Etie yot ni judong cokiri nikonyowa ka watie igi dhanu m’atira. Pirang’o? Kan iberemo, iyenyo ka dokta kara ukonyi, nyo icopo koro pi remo perine moko ire moko ke ikanu? Kan ikanu moko, dong’ ebikonyi ke nenedi? Kumeno bende, ka watimo dubo moko  ma pek, wacikara ngo nicwayu ndra. Tung’ ku maeno, wacikara nicidho i bang’ judong cokiri man niyero igi lembene ngbeng’ ngbeng’. (Zaburi 12:2; Tic mi Jukwenda 5:1-11) Kawoni kelund ipar kumae: Icopo timo ang’o kan inwang’u nia jarimbi moko utimo dubo ma pek? (Lembe mi Julawi 5:1) Nyo ibiwacu kumae: “Kan atie andha jarimbe, ukwayu aling’ iwi lembene”? Kunoke nyo ibipoi nia judong cokiri gitie pi nikonye kara eyik man edwok winjiri pare ku Yehova udok tek?​—Juebrania 13:17; Yakobo 5:14, 15.

12 Wan bende ukwayu wabed dhanu m’atira ku dilo pa Yehova kinde ma wabedwoko rapor ma tung’ tung’, calu ve rapor mi tic mi lembanyong’a. Man wabed dhanu m’atira kinde ma watimo tic pa jayab yo kunoke tic mange.​—Som Lembrieko 6:16-19.

13. Ka watimo tic ku Jukristu wadwa, wacopo nyutho nenedi nia watie dhanu m’atira?

13 Umego ku nyimego ma gitie Jukristu gicikiri nikoyo kind lembe mi kuloka ku lembe mi tipo. Ku lapor, kinde ma watie i Ot Ker kunoke i tic mi lembanyong’a, watimo ngo kuloka. Watio ngo kud umego ku nyimego i ayi ma cuu ngo pi ninwang’u faida lee. Kan iketho Jumulembe pa Yehova ubetimo tic peri, culgi i saa m’ukwayere, culgi sente ma wuwinjuru i wie, man mii igi kony ceke ma cik ubekwayu. Eno copo bedo assurance mi yath, kunoke nicule saa m’etie i yom. (1 Timoteo 5:18; Yakobo 5:1-4) Man tekene itimo tic i bang’ Jamulembe wedu, kud igen nia ebitimo kudi i ayi moko masegi. (Juefeso 6:5-8) Nen nia itimo tic pi saa ma wuwinjuru pire man tim tic ma jubeculi pire.​—2 Jutesaloniki 3:10.

14. Jukristu gicikiri nitimo ang’o i wang’ nicaku timo kuloka karacelo?

 14 Dong’ tek wabetimo kuloka kud umego kunoke nyamego moko ke? Lembe maeno copo ketho i ie nidiko sente i kuloka kunoke lon. I lembe ma kumeno, watie ku cik mir ukungu mi Biblia ma copo konyowa: Wukiew lembe ceke akiewa! Kinde ma jabila Yeremia ung’iewo ng’om moko, ekiewo karatasi ario mi winjiri migi, ebedo ku karatasi acel ma jusadeni giketho cing’gi i there, man egwoko karatasi arione ceke pi nindo ma cen. (Yeremia 32:9-12; som bende Thangambere 23:16-20.) Jumoko paru nia nikiewo winjiri akiewa copo nyutho ve nia ng’atini ugeno ngo umin. Ento i andha, nikiewo winjiri akiewa copo cero koso winjiri, turcwiny man teliri i kindjo. Poi nia kadok i lembe mi kuloka, kwiocwiny mi cokiri pire tie tek nisagu kuloka.​—1 Jukorintho 6:1-8; som Thenge ma jumedo, namba 30.

NIBEDO NG’ATU M’ATIRA I NG’OM MAENI

15. Yehova tie ku nen makani iwi timo ma tung’ tung’ mi kwalu dhanu i kuloka?

15 Wacikara nibedo dhanu m’atira ni dhanu ceke, kadok ni dhanu ma gitie ngo Jumulembe pa Yehova. Pire tie tek lee mandha i wang’ Yehova nia wabed dhanu m’atira. “Mukero mi ndra en e ginmajudagu ni Yehova; ento mukero ma cu en e mutoro pare.” (Lembrieko 11:1; 20:10, 23) I rundi ma con mi Biblia, jubed jutio ku mukero kunoke kilo wang’ mapol i lembe mi kuloka. Ento jukuloka moko gibed gikwalu jurung’iew migi, gibed gimio igi piny nyanok ma nwang’u ke giwinjiri ngo kumeca kunoke gibed giketho gicul lee nisagu. Calu i rundi ma con mi Biblia, tin bende kwo usagu lee mandha i lembe mi kuloka. Calu  yang’ con Yehova ugam udagu kwalu dhanu i lembe mi kuloka, tin bende edagu.

16, 17. Wacikara nicerara i kum koso bed’atira makanigi m’unyai tin?

16 Wan ceke saa moko wanwang’ara i lembe ma copo ketho wakoso bed’atira, ecopo bedo i tic, pong’o karatasi pa leta kunoke timo ekzame i somo. Dhanu mapol paru nia erac ungo niwondo, nimedo kor lembe kunoke nidwoko ngo wang’ penji ma tap. Eno tie ngo lembe mi zungo. Biblia ular uyero nia i nindo mi kajik ceng’, dhanu bibedo “ma ng’atuman bimare gire en, man bimare gire en, gibibedo jumar sente, . . . ku ju m’udagu gin ma ber.”​—2 Timoteo 3:1-5.

17 Saa moko ebed enen nia dhanu ma gitie atira ngo gibenwang’u faida lee mandha i ng’om maeni. (Zaburi 73:1-8) Tic copo weko Jakristu, jucopo ng’ondo sente pare kunoke jucopo time rac i tic kende kende pilembe emito ebed dhanu m’atira. Ento bed’atira pire tie tek nisagu. Pirang’o?

MUGISA MA BED’ATIRA MIO

18. Pirang’o pire tie tek lee ning’eyiri ni dhanu m’atira?

18 I ng’om ma tin, ju ma ging’eyiri ni dhanu m’atira, ma jugeno man m’umbe awondi pigi tie tek lee, man dhanu ma kumeno ginok. Wan ceke ecopere iwa nibedo kit dhanu ma kumeno. (Mika 7:2) Andha, dhanu moko copo ceyi pilembe itie dhanu m’atira man gicopo yero nia rieko peri mbe. Ento jumange gibifoyi pi bed’atira peri man gibigeni. I ng’om zoo, Jumulembe pa Yehova ging’eyiri nikum bed’atira migi. Judong tic moko bemaru nimio tic ni Jumulembe pa Yehova pilembe ging’eyo nia gibibedo dhanu m’atira. Man kinde ma juriemo jurutic mange kud i tic pilembe  gitie ngo dhanu m’atira, wang’ mapol juweko Jumulembe pa Yehova.

Wacopo yungo Yehova nikadhu kud i tic ma tek ma wabetimo

19. Bedo dhanu m’atira bibedo ku matoke makani iwi winjiri peri ku Yehova?

19 Nibedo dhanu m’atira biketho ibibedo ku pidocwiny ma ber man ku kwiocwiny i paru. Wacopo bedo calu Jakwenda Paulo, m’ukiewo kumae: “Wageno andha nia wabedo ku pidocwiny ma ber.” (Juebrania 13:18) M’usagu zoo, Yehova, Wuru mir amara, bineno man ebifoyi pi kero m’ibetimo kara ibed dhanu m’atira i gin ceke.​—Som Zaburi 15:1, 2; Lembrieko 22:1.