Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 PONJI MIR 7

Ker Pa Mungu Tie Ang’o?

Ker Pa Mungu Tie Ang’o?

1. Ker pa Mungu tie ang’o?

Pirang’o Yesu re m’utie Rwoth m’anzilo?MARKO 1:40-42.

Ker pa Mungu tie bimobim mi polo. Ebicungo kakar bimobim ceke mange mi ng’om man ebiketho yeny pa Mungu utimere i polo man bende iwi ng’om. Lembanyong’a maeno i kum ker pa Mungu tie lembe maber dit akeca. Dhanu tie ku yeny mi bimobim ma ber. Ceng’ni eni, ker pa Mungu bipong’o yeny ma eno. Ebidiko dhanu ceke mi ng’om kara gikwo i acel.Som Daniel 2:44; Matayo 6:9, 10; 24:14.

Ker ceke utie ku rwoth. Yehova bende ung’io wode ma Yesu Kristo kara ebed ni Rwoth mi Ker Pare.Som Lembanyutha 11:15.

2. Pirang’o Yesu re m’utie Rwoth m’anzilo?

Yesu re m’utie Rwoth m’uromo kakare, kum etie ng’atu ma pireber, ma lubo lembe m’atira. (Yohana 1:14) Etie bende ku copo m’ukwaire pi nikonyo dhanu, kum ebibimo wi ng’om niai kud i polo. Ing’ei cer pare, egam eidho i polo man ebedo yor icing Mungu mir acwic pi nikuro nindo ma jubimio kerne i cinge. (Juebrania 10:12, 13) Ing’eye, Mungu ugam umio ire copo mi caku nibimo.Som Daniel 7:13, 14.

3. Yesu bibimo karacelo ku jukani?

Udul mi dhanu ma julwong’o “jumaleng’” re ma bibimo karacelo ku Yesu i polo. (Daniel 7:27) Jukwenda pa Yesu ma weg yioyic re m’ubino jumaleng’ ma kwong’a ma jung’io. Niai eca, Yehova umedre ning’io jumaleng’ mange i  kind dhanu. Calu Yesu, jumaleng’ maeno cer ku kum mi tipo.Som Yohana 14:1-3; 1 Jukorinto 15:42-44.

Dhanu adi m’ubecidho i polo? Yesu ulwong’ogi “Udul ma nyanok.” (Luka 12:32) Wendgi zoo bibedo 144 000. Gibibimo wi ng’om karacelo ku Yesu.Som Lembanyutha 14:1.

4. Lembang’o m’ugam utimere kinde ma Yesu ucaku nibimo?

Ker pa Mungu ucaku nibimo i oro 1914. * Kinde ma Yesu udoko Rwoth, lembe ma kwong’a ma elar etimo ubino nibolo Jok ku pajogi pare piny i ng’om. Lembe nino unyayu kwinyo i Jok man ecaku nitimo lembe ma reco iwi ng’om. (Lembanyutha 12:7-10, 12) Niai eca, peko pa dhanu umedre akeca. Lwiny, ndru kunoke kec, thong’om man digidi gitie theng “lanyuth” ma nia ceng’ni eni Ker pa Mungu bicaku nitelo wi ng’om.Som Luka 21:7, 10, 11, 31.

5. Ker pa Mungu ubetimo ang’o kawono?

Ni kadhu kud i tic mi rweyo lembanyong’a i ng’om zoo, ker pa Mungu udaru nidiko udul dhanu ma dit niai kud i thek ceke, ma gibekwo ku kwiyocwiny i kindgi. Milioni dupa mi jumamol, gibedoko lwak mi ker pa Mungu i the telowic pa Yesu. Ker pa Mungu bigwokogi kinde ma ebinyotho kitlembe ma rac m’utimere kawono iwi ng’om. Pieno, dhanu ceke m’umito ni nwang’u bero mi ker pa Mungu, gicikiri niponjo ni bedo lwak ma wor pa Yesu.Som Lembanyutha 7:9, 14, 16, 17.

Pi oro 1 000, Ker pa Mungu bitimo lembe ma con Mungu ular ukeco pi dhanu. Ng’om zoo bidoko ni Paradiso. Ka oro 1 000 eno bithum, Yesu bidwoko kerne giwon. (1 Jukorinto 15:24-26) Nyo ing’eyo ng’atu moko m’ukwayu ikor ire lembe iwi ker pa Mungu?Som Zaburi 37:10, 11, 29.

 

^ par. 6 Pi ning’eyo kite ma lembila ular uewo pi oro 1914, som mbaya mi 215-218 mi buku Biblia Inafundisha Kabisa Nini?