Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 PONJI MIR 11

Wacopo Nwang’u Bero Makani ka Waworo Cik Mir Ukungu mi Biblia?

Wacopo Nwang’u Bero Makani ka Waworo Cik Mir Ukungu mi Biblia?

1. Pirang’o wa dhanu watie ku yeny mi telowic?

Cik mir ukungu mi Biblia copo konyowa nenedi kara wagwokra i kum ret ma wok i kumwa?ZABURI 36:9.

Jacwic mwa tie ku rieko ma nikadhu mwa. Mungu dieng’ piwa calu wego ma jamer. Bende, ecwiowa ngo ma nia wajengra i wiwa giwa. (Yeremia 10:23) Pieno, romrom calu nyatin ma nyanok tie ku yeny mi telowic pa junyodo pare, wan bende watie ku yeny mi telowic pa Mungu. (Isaya 48:17, 18) Cik mir ukungu mi Biblia mio iwa telowic m’anzilo, telowic maeno tie giramia m’uai i bang’ Mungu.Som 2 Timoteo 3:16.

Cik pa Yehova man cik pare mir ukungu ponjowa kite mandha ma wacopo kwo ko i nindo mwa maeni, man kite ma wacopo nwang’u kudo sukulia mi nja ku nja i nindo m’ubino. Calu Mungu re m’ucwiowa, eber akeca nia wawor telowic pare.Som Zaburi 19:7, 11; Lembanyutha 4:11.

2. Cik mir ukungu mi Biblia tie ang’o?

Cik mir ukungu mi Biblia tie andha ma lokre ngo man ma pigi tek akeca. Ento cik, jucopo tio kudo kendekende pi nindo moko kunoke pi lembe moko ma copo wok. (Poi mi Cik 22:8) Pieno, ukwayu watii ku copo mi lurolembe kara wanyang’ cu ka nyongo wacopo tio ku cik mir ukungu ma kani i lembe ma copo wok. (Lembrieko 2:10-12) Ku lapor, Biblia ponjo nia kwo tie giramia m’uai i bang’ Mungu. Cik mir ukungu maeno copo konyowa i kakare mi tic, i pacu mwa, kinde ma wabewotho ku mutukari, pikipiki kunoke gari. Ka wapoi i kum cik maeno mir ukungu, wacopo nigwokra kara kud wanwang’ ret.Som Tic mi Jukwenda 17:28.

3. Cik mir ukungu makani ario ma pigi tek akeca?

Yesu uweco pi cik mir ukungu ario ma pigi tek m’usagu zoo. Ma kwong’a nyutho iwa thelembe  mi kwo pa dhanu, niwacu nig’eyo Mungu, ni mare man nitimo ire cu cu cu. Wacikra nitio ku cik mir ukungu ma kwong’a eno saa ceke ma wabetimo ng’iong’ic. (Lembrieko 3:6) Dhanu ceke m’utio ku cik mir ukungu maeno i kwo migi, ginwang’u bero mi bedo jurimb Mungu, mi bedo ku mutoro i kwo migi man mi nwang’u kwo ma rondo ku rondo.Som Matayo 22:36-38.

Cik mir ukungu mir ario copo konyowa nikwo ku dhanu mange kud akwiacwiny. (1 Jukorinto 13:4-7) Tio ku cik mir ukungu maeni mir ario uketho i ie nitio ku dhanu mange kite ma Mungu bende tio kudo ku dhanu.Som Matayo 7:12; 22:39, 40.

4. Bero makani ma wacopo nwang’u ka wabetio ku cik mir ukungu mi Biblia?

Cik mir ukungu mi Biblia ponjo juruot kite ma mer copo diko kogi i i acel. (Jukolosai 3:12-14) Lembe pa Mungu gwoko juruot pilembe eponjogi ku cik mange mir ukungu ma copo telo wigi. Cik maeno uwacu nia gamiri ukwayu ubed mi nja.Som Thangambere 2:24.

Lubo ponji mi Biblia copo gwokowa kara wabed ma kumwa leng’ man ma cwinywa kwio. Ku lapor, saa ceke judongo mi tic ma tung’ tung’ maru nitimo tic ku jurutic m’uworo cik mir ukungu mi Biblia m’uweco iwi timo tic i atira man kud amora. (Lembrieko 10:4, 26; Juebrania 13:18) Lembe pa Mungu ponjowa bende nifoyo kende kende ku piny ma pigi tek akeca pi kwo mwa man nineno ribri mwa ku Mungu ni gin ma pire tek akeca ni kadhu jambcing.Som Matayo 6:24, 25, 33; 1 Timoteo 6:8-10.

Tio ku cik mir ukungu mi Biblia copo gwoko leng’kum mwa. (Lembrieko 14:30; 22:24, 25) Ku lapor, woro cik pa Mungu m’ukwero mero, gwokowa i kum twoyo ma copo ninegowa man i kum ret macopo wok i kumwa. (Lembrieko 23:20) Yehova yio wamadh kong’o, ento nikadhu mukero ngo. (Zaburi 104:15; 1 Jukorinto 6:10) Cik mir ukungu pa Mungu tie ku bero iwa pilembe cikne ponjowa nigwoko timo mwa man paru mwa. (Zaburi 119:97-100) Ento, jukristo mandha woro cik mir ukungu pa Mungu, kende kende ngo kara ginwang’ bero. Giworo bende pi nimio woro ni Yehova.Som Matayo 5:14-16.