Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 PONJI MIR 1

Lembanyong’a Tie Ang’o?

Lembanyong’a Tie Ang’o?

1. Lembanyong’a makani m’uai i bang’ Mungu?

Mungu ubemaru nia dhanu ukwo kud anyong’a iwi ng’om. Ecwiyo ng’om ku piny ceke mi ie kum emaru dhanu. Ceng’ni eni, ebiketho dhanu mi ng’om ceke ubed ku kwo mir anyim maber. Ebidaru gin ceke m’ucikunyayu can i kum dhanu.Som Yeremia 29:11.

Bimobim kunoke gavumenti acel de mbe m’udaru nidaru magwei nek, remokum man tho. Ento lembe mir anyong’a unuti. Ceng’ni eni, Mungu bikabu bimobim ceke mi dhanu, man ebiketho bimobim ma pare re m’ucungi kakargi. Lwak dhanu mi the bimobim ma pa Mungu bikwo ku kwiocwiny man ku leng’kum maber.Som Isaya 25:8; 33:24; Daniel 2:44.

2. Pirang’o lembanyong’a ma eno pire tie tek akeca tin?

Can bithum nang’u ndhu Mungu ukabu jutimrac ceke kud iwi ng’om. (Zefania 2:3) Lembe maeno bitimere awene? Lembe pa Mungu ular uyero pi peko ceke m’ubeungo dhanu i nindo mwa eni. Lembe ma tung’tung’ ma reco m’ubetimere kawono i ng’om unyutho nia nindo ma Mungu bidaru i ie can, udhingo ceng’ni.Som 2 Timoteo 3:1-5.

3. Ukwayu watim ang’o?

Ukwayu waponj iwi Mungu nikadhu kud i lembe pare Biblia. Biblia tie iwa calu waraga ma wego m’umaru awiya pare oro igi. Enyutho iwa kite ma wacopo kwo ko kud anyong’a tin, man rondo ku rondo iwi ng’om i nindo m’ubino. Ng’ei cu nia, saa moko dhanu moko copo foyo ngo nineno nia jubekonyi ni nyang’ i Biblia. Ento kan iweko lworo mi dhanu unegi ci, e ibikoso ni nwang’u bero mi nindo m’ubino.Som Lembrieko 29:25; Lembanyutha 14:6, 7.