Nen video ma nwang'ere

Nen lembe ma nwang'ere i ie

Jumulembe pa Yehova

Ng'ii Dhok Alur

 THENGE MIR 8

Ka lembe mi can uwok

Ka lembe mi can uwok

“Anyong’a negowu dit i gin maeni, kadok kawono mi nindo ma nyanok, tek ebedo kumeno, juketho can unegwu i abidhe ma kwonde tung’ tung’.”1 Petro 1:6

Kadok itimo kero peri ceke nibedo ku gamiri man ot mir anyong’a de, peko moko ma wok rek copo nitundo man niketho ebed tek iri nimediri nibedo kud anyong’a. (Eklizia 9:11) Ku mer, Mungu mio iwa kony kinde ma wabenwang’ara ku peko. Kan itio ku juk mi Biblia ma nwang’ere piny e, in ku juruot peri wubinwang’u kero mi ciro peko, kadok peko ma lee rukani de.

 1 JENGIRI IWI YEHOVA

LEMBE MA BIBLIA YERO: ‘Wubol adieng’acwinyu ceke i wie, kum ie bepido piwu.’ (1 Petro 5:7) Saa ceke wii kud uwil nia utie ngo Mungu re m’ubenyayu peko ma tung’ tung’ i kumi. (Yakobo 1:13) Kan ibecoro ceng’ni i vute, ebikonyi i ayi maber akeca. (Isaya 41:10) “Wukonj adundewu woko i wang’e.”Zaburi 62:8.

Ibinwang’u bende juk kan ibesomo man ibeponjo Biblia peri kubang’ ceng’. Kan itimo kumeno, ibineno in giri ayi ma Yehova ‘juko ko wa i can mwa ceke.’ (2 Jukorinto 1:3, 4; Jurumi 15:4) Eng’olo nia ebimio iri “kwiocwiny pa Mungu, ma sagu ng’eyong’ec ceke.”Jufilipi 4:6, 7, 13.

LEMBE M’ICOPO TIMO:

  • Rwo ni Yehova kara ekonyi ibed ma cwinyi kwio man ipar lembe i ayi m’ukwayere

  • Nyam cu i lembe ceke m’ibeparu man ing’i lembe maber akeca re m’ilubi

2 GWOKIRI GIRI MAN GWOK BENDE JURUOT PERI

LEMBE MA BIBLIA YERO: “Adunde won pidoic nwang’u ng’eyong’ec; man ith jarieko yengo ng’eyong’ec.” (Lembrieko 18:15) Kepim ninyang’ cu iwi yeny ceke pa ng’atuman i ot peri. Wec kugi man winjgi.Lembrieko 20:5.

Ka tho wok ke? Kudi lworo negi niywak. Poi nia kadok Yesu de ugam ‘uywak.’ (Yohana 11:35; Eklizia 3:4) Bende, pire tek nia ibed iyom man inindi lee. (Eklizia 4:6) Eno bikonyi kara icir lembe mi can m’uwok i wi.

LEMBE M’ICOPO TIMO:

  • Ma fodi peko wok ungo, bed ku ng’iyo mi weco karacelo ku juruot peri; kara kinde m’ebin ewok, gibiweco kudi yot yot

  • Wec ku dhanu mange ma saa moko nyo peko marom udaru niwok i wigi

 3 YENY KONY

LEMBE MA BIBLIA YERO: “Jarimo [mandha] bedo ku mer i nindo ceke” man etie umego ma junyolo pi nindo mi can. (Lembrieko 17:17) Jurimoni copo maru nikonyi, ento nyo ging’eyo ngo lembe ma gicopo nitimo iri. Kud ilwor ninyutho igi yeny peri mandha. (Lembrieko 12:25) Bende, sai kony mi tipo ibang’ ju m’unyang’ i Biblia. Juk ma gicopo mio iri niai kud i Biblia bikonyi.Yakobo 5:14.

Ibinwang’u kony m’itie ko ku yenyne ka nja ibecokiri ku dhanu m’utie ku yioyic mandha iwi Mungu man m’utie ku genogen iwi lembang’ola pare. Ibinwang’u bende juk lee kan ibekonyo dhanu m’utie ku yeny mi tielocwiny. Kor igi pi yioyic peri iwi Yehova man iwi lembang’ola pare. Bed ku ng’iyo mi konyo dhanu m’utie ku yeny mi kony, man kud ikoiri cen ku dhanu m’umeri man m’udieng’ piri.Lembrieko 18:1; 1 Jukorinto 15:58.

LEMBE M’ICOPO TIMO:

  • Wec ku jarimo peri ma ceng’ni man wek ekonyi

  • Kor ire yeny peri thwolo thwolo man i andha