Magdiretso sa content

Magdiretso sa secondary menu

Magdiretso sa table of contents

Mga Saksi ni Jehova

Inakeanon

Mayad Nga Balita Halin sa Dyos!

 Leksyon 13

Ano ro Mayad nga Balita Parti sa Relihiyon?

Ano ro Mayad nga Balita Parti sa Relihiyon?

1. Mayad baea ro tanan nga relihiyon?

May mga sinsero gid nga mga tawo sa tanan nga relihiyon. Mayad ra nga balita nga nakita sanda ku Dyos ag nagakabaeaka imaw kanda. Pero makasueobo nga ginagamit it iba ro relihiyon sa pag-obra it maeain. (2 Corinto 4:3, 4; 11:13-15) Ginabalita nga may unang mga relihiyon nga nadaeahig sa terorismo, pag-ubos it rasa, inaway, ag pag-abuso sa mga unga. Nasub-an gid kara ro mga sinsero nga nagatuo sa Dyos.Basaha ro Mateo 24:3-5, 11, 12.

Kon ginapadunggan ku matuod nga relihiyon ro Dyos, kahuy-anan mat-a ro ginatao it buko’t matuod nga relihiyon. Ro andang ginaturo hay owa sa Biblia, pareho ku saea nga pagturo parti sa Dyos ag sa mga patay. Pero gusto ni Jehova nga masayran naton ro kamatuoran parti kana.Basaha ro Ezequiel 18:4; 1 Timoteo 2:3-5.

2. Ano ro mayad nga balita parti sa relihiyon?

Indi madaya ro Dyos ku mga relihiyon nga gapangangkon nga palangga nanda imaw, pero ro matuod ginapalangga nanda ro kalibutan ni Satanas. (Santiago 4:4) Ginatawag it Biblia ro buko’t matuod nga mga relihiyon nga “Bantug nga Babilonia.” Ro Babilonia ro siyudad anay kato nga ginhalinan it buko’t matuod nga relihiyon pagkatapos ku Anaw sa panahon ni Noe. Maeapit eon nga tapuson it Dyos rayang mga relihiyon nga nagapataeang ag nagadaug-daog sa mga tawo.Basaha ro Pahayag 17:1, 2, 5, 16, 17; 18:8.

May una pa gid nga mayad nga balita. Ginadumdom ni Jehova ro sinsero nga mga tawo nga una sa buko’t matuod nga relihiyon sa bilog nga kalibutan. Ginatipon na sanda paagi sa pagturo kanda it kamatuoran.Basaha ro Juan 6:45.

 3. Ano ro dapat obrahon ku mga sinsero nga tawo?

Ro matuod nga relihiyon nagahugpong sa mga tawo

Interesado gid si Jehova sa mga naga-obra it tama ag mayad. Ginapalig-on na sanda nga magguwa sa buko’t matuod nga relihiyon. Ro nagapalangga sa Dyos hay handa gid magbag-o agod mapasadya imaw.Basaha ro Pahayag 18:4.

Kat nabatian ku mga sinsero nga tawo ku unang siglo ro mayad nga balita sa mga apostoles, masadya nga ginbaton nanda ra. Natun-an nanda kay Jehova ro bag-o nga paagi ku pagkabuhi, ro kabuhi nga may katuyuan ag may pag-eaum. Mayad sanda nga halimbawa katon makaron tungod ginbaton nanda ro mayad nga balita paagi sa pag-una kay Jehova sa andang kabuhi.Basaha ro 1 Tesalonica 1:8, 9; 2:13.

Ginabaton ni Jehova sa anang pamilya ro mga nagguwa sa buko’t matuod nga relihiyon. Kon batunon mo ro imbitasyon ni Jehova, mangin amigo mo imaw, mangin parte ka it mapinalanggaon nga pamilya nga nagasimba kay Jehova, ag mabuhi it owa’t katapusan.Basaha ro Marcos 10:29, 30; 2 Corinto 6:17, 18.

4. Paano paabuton ku Dyos ro kalipay sa eugta?

Mayad nga balita ro gapaeapit nga paghukom it Dyos sa buko’t matuod nga relihiyon. Maduea eon ro pag- eupig sa bilog nga kalibutan. Indi eon mapataeang ag mabahin-bahin ku buko’t matuod nga relihiyon ro mga tawo. Mahugpong ro tanan sa pagsimba sa matuod nga Dyos.Basaha ro Pahayag 18:20, 21; 21:3, 4.