Magdiretso sa content

Magdiretso sa secondary menu

Magdiretso sa table of contents

Mga Saksi ni Jehova

Inakeanon

Mayad Nga Balita Halin sa Dyos!

 Leksyon 12

Paano ka Mangin Maeapit sa Dyos?

Paano ka Mangin Maeapit sa Dyos?

1. Ginapamatian gid baea ku Dyos ro tanan nga pangamuyo?

Ginaimbitar it Dyos ro tanan nga klase it mga tawo nga nasyon nga magpaeapit kana paagi sa pangamuyo. (Salmo 65:2) Pero owa na ginapamatian o ginabaton ro tanan nga pangamuyo. Halimbawa, ginabaeabagan ro pangamuyo it eaeaki kon ginamaltrato na ro anang asawang babayi. (1 Pedro 3:7) Tag pauman-uman nga nag-obra it maeain ro mga Israelita, owa ginpamatian it Dyos ro andang pangamuyo. Ngani, isaea gid ka pribilehiyo ro pangamuyo. Ginabaton man ku Dyos ro pangamuyo it mga makasasaea kon maghinuesoe sanda.Basaha ro Binuhatan 3:19.

2. Paano kita magpangamuyo?

Ro pangamuyo parte it aton pagsimba, ngani kinahangean nga mangamuyo eang kita kay Jehova nga atong Manogtuga. (Mateo 4:10; 6:9) Bukon kita it perpekto ngani dapat mangamuyo kita sa ngaean ni Jesus tungod namatay imaw para sa atong mga saea. (Juan 14:6) Owa naila si Jehova it pauman-uman o memoryado nga mga pangamuyo. Gusto na nga mangamuyo kita halin sa atong tagipusuon.Basaha ro Mateo 6:7; Filipos 4:6, 7.

Ginapamatian man it atong Manogtuga bisan ro mahipos nga pangamuyo. (1 Samuel 1:12, 13) Ginaimbitahan na kita nga mangamuyo sa tanan nga oras—pagbugtaw, bago magtueog, bago magkaon ag kon may mga problema.Basaha ro 1 Pedro 5:7; Mateo 15:36.

3. Ham-an nagatipon ro mga Kristyano?

Buko’t madali nga magpaeapit sa Dyos tungod ginapalibutan kita it mga tawo nga owa’t pagtuo sa Dyos ag owa nagapati sa anang ginpromisa nga paghidait sa eugta. (2 Timoteo 3:1, 4; 2 Pedro 3:3, 13) Ngani kinahangean naton nga makig-iba sa atong masigka-Kristyano agod mapalig-on naton ro kada isaea.Basaha ro Hebreo 10:24, 25.

Makapaeapit kita sa Dyos kon nagaiba kita sa mga nagapalangga kana. Paagi sa pagtambong sa mga miting it mga Saksi ni Jehova mapabakod kita ku pagtuo it iba.Basaha ro Roma 1:11, 12.

4. Paano ka mangin maeapit sa Dyos?

Mangin maeapit ka kay Jehova paagi sa pagpamaeandong ku imong natun-an sa Biblia. Isipa ro anang mga gin-obra, eaygay, ag mga promisa. Paagi sa pangamuyo ag pagpamaeandong, maapresyar mo ro anang gugma ag kaaeam.Basaha ro 1 Timoteo 4:15, 16.

Mangin maeapit ka sa Dyos kon nagasalig ka kana ag kon nagatuo ka kana. Pero kinahangean mo nga pabaskugon ing pagtuo. Kon paano nga kinahangean mo nga magkaon it regular agod magbaskog ka, kinahangean mo man nga padayon nga magtuon it Biblia agod magbakod ro imong pagtuo.Basaha ro Mateo 4:4; Hebreo 11:1, 6.

5. Paano ka makabenepisyo sa pagpaeapit sa Dyos?

Nagakabaeaka ro Dyos sa mga nagapalangga kana. Ginaprotektahan na kita sa mga butang nga makahalit ku atong pagtuo ag pag-eaum nga mabuhi it dayon. (Salmo 91:1, 2, 7-10) Ginapaandaman na man kita sa pwedeng maghalit sa atong pang-eawas ag makaduea it atong kalipay. Ginaturo ni Jehova ro pinakamayad nga paagi it pagkabuhi.Basaha ro Salmo 73:27, 28; Santiago 4:4, 8.