Vi nâ ka törhû pâr̃â nemè pèci

Vi nâ ka törhû pâr̃â nemè pèci ka tö eria

Vi nâ ka törhû pâr̃â nemè pèci e yu rö ka rhavû

Témoins i Iehova

Ajië

Nâ Pâr̃i Vami Xēvē Nâ Ke Yè Vior̃o

 VIA’PÂGÜR̃Ü 8

Nâki Pwa Nâ Bwêpë

Nâki Pwa Nâ Bwêpë

“Gēvē vior̃o ve kau xei, ae gēvē ye see xina roi para sesè re pono na nō ne.”—1 Petero 1:6

Avâr̃i, êr̃ê, göu yè pèmör̃ö-u cèki vior̃o nâ viöyö xiu mâ vami xiu ae koa yè tânenui, êr̃ê, nâ pâr̃i ke yè pwa udâ yè-u bârē nâ vi nenââwere. Nè bör̃i kau yè-u nâ ke yè töxar̃a vè mör̃ö vior̃o xiu. (Ecclésiaste 9:11) Bâō wè nâ kââwaa re mâ nââbee re nâki pwayèr̃i re nâ pâr̃â kââ ka tâcerè. Nâki göu pwêr̃ê mâ waa köiwaa pâr̃â dâ mi xè Pèci Ar̃ii, nè bör̃i pâr̃i-u mâ vami xiu nâ ke yè tömâ mör̃ö yè pâr̃â vi nenââwêr̃ê.

 1 TÂNEWÈI YÈ IEHOVA

NÂ ÊR̃Ê NÂ PÈCI AR̃II, ÊR̃Ê: “Kayai yè para see xēvē wanii, we na dè samaiwa vē na cē.” (1 Petero 5:7) Rhîxâgür̃ü bar̃ē nâ gëvē, êr̃ê, Bâō wè nâ da pûû pâr̃â yēyè re pwa yè pâr̃â kâmö. (Iakobo 1:13) Nâki gëvē vâr̃â vè ubwa i Bâō, nè bör̃i nââbee vē ē rö i ketöne ka ē au. (Isaïe 41:10) “Pisowi wenena xēvē ro nemè e.”—Pèci Salamo 62:9.

Nâki gëvē vâr̃â mâ a’pâgür̃ü bar̃ē Pèci Ar̃ii rèi pâr̃â nedaa wânii, nè yè bör̃i tö pwar̃a vē nâ vikââwaa i Bâō. Tö okâre, gëvē yè bör̃i rhîxâgür̃ü, êr̃ê, Iehova re “vi naabe ve ro para boepë xeve wanii.” (2 Korenito 1:3, 4; Roma 15:4) Nâ vikîbō nâ Cē, êrê, nè nââ yè vē “naaneva mi xei Bao, we, kâa ka vikoeji rai para vitapagùrù wanii.”—Filipi 4:6, 7, 13.

NÂ PÂR̃I VĒ NÂ KE YÈ WAA:

  • Pwaer̃ö mâ për̃i yè Iehova cèki nââbee vē rö i târâdâ mâ nââ yè vē pâr̃â vitânexâi ka korhî

  • Tânexâi wa pâr̃â kââ re, bör̃i pâbir̃i vèkēvē pâr̃â kââ ka ē au

2 YAMÂIWAA VĒ MÂ PÂR̃Â VAMI XĒVĒ

NÂ ÊR̃Ê NÂ PÈCI AR̃II, ÊR̃Ê: “Wênenâ i kâmö ka tâpâgür̃ü wè nâ tö pwar̃a-e nâ virhîxâgür̃ü ae bode pa gamë we cer̃e mèyè virhîxâgür̃ü.” (Proverbes 18:15) Mèyè ke yè rhîxâgür̃ü okâ re tö wênenâ mâ pâr̃â rhivèē i pâr̃â kâmö re tö lewe vami xēvē. Tëvë vèrhaxâ nâ gëvē. Töpwêr̃ê r̃e.—Proverbes 20:5.

E tâi ke waa nâki pèime nâ rha bee vē? Koa yè bar̃a rai pèrivea pâr̃â vi nenââwêr̃e xēvē. Tânexâi ē, êr̃ê, Iesu bar̃ē wè “nâ tâa.” (Ioane 11:35; Ecclésiaste 3:4) Kââ ka dö kââ wè tânexâi ke yè tâmui ē mâ kur̃u ē. (Ecclésiaste 4:6) Nè yè bör̃i pâr̃i vē nâ ke yè tömâ mör̃ö rö i pâr̃â kââ ka tâcerè re.

NÂ PÂR̃I VĒ NÂ KE YÈ WAA:

  • Bayêr̃i ke yè pwa i pâr̃â kââ ka tâcerè, dè bâ tëvër̃i vèrhaxâ göu duawè mâ pâr̃â palè-u. Wè nâki pwa mi nâ kââ ka tâcerè, nè yè bör̃i mâmâ yè r̃e nâ ke yè cîî wênenâ xer̃e yè-u

  • Tëvë vèrhaxâ vèr̃i bör̃i kâmö re wê pwayèr̃i r̃e nâ pâr̃â kââ re pwa yè-u

 3 MÈYÈ MÂ CËI VI NÂÂBEE VÈKĒVĒ

NÂ ÊR̃Ê NÂ PÈCI AR̃II, ÊR̃Ê: “Rha kaveâi ka avâr̃i wè nâ mear̃i rèi pâr̃â nedaa wânii mâ rha wi bee vèki pâr̃â nedaa ka tâcerè.” (Proverbes 17:17) Cer̃e pôr̃ô nâ pâr̃â pâ bee vē re bar̃i nââbee vē ae cer̃e da tâwai êr̃ê, e tâi nâ ke yè waa. Ki da wii nâ pè rèwir̃i vē, ae êr̃êvea yè r̃e pâr̃â rivhèē re tö wênenâ xēvē. (Proverbes 12:25) Mèyè bar̃ē pè nââbee vē rö i ko ar̃ii rö pwar̃a paxa tâpâgür̃ü Pèci Ar̃ii. Pâr̃â nō ka mi xè Pèci Ar̃ii re cer̃e yè nââ yè vē wè pè nââbee vē bar̃ē.—Iakobo 5:14.

Gëvē yè pwayèr̃i bar̃ē mör̃ö, ka tâmwer̃e vèkēvē, nâki gëvē dè bâ tövè ubwa i mi pâr̃â kâmö paxa tânewèi, rö i avâr̃i, yè Bâō mâ rö i pâr̃â vikibō xiē. Nè yè mâmâ bar̃ē nâ wênenâ xēvē nâki gëvē vi kââwaa pâr̃â kâmö paxa vi nenââwer̃e mâ tëvër̃i yè r̃e tânewèi xēvē rö i Iehova mâ rö i pâr̃â vikibō xiē. Ki tö wênenâ xēvē nâ ke yè nââbee pâr̃â kâmö paxa vi nenââwer̃e ae koa yè cuè rhar̃i rai paxa mear̃i vē mâ yamwâiwaa vē.—Proverbes 18:1; 1 Korenito 15:58.

NÂ PÂR̃I VĒ NÂ KE YÈ WAA:

  • Tëvë göu rha bee xii ka tö vè ubwa i mi mâ koa yè tēyù vi nââbee re nè nââ yè-i

  • Tëvë târi mâ êr̃êvea rö i avâr̃i pâr̃â rhivèē xēvē