“Curi na gēvē . . . vimeari, ma vikâawa, ma vipèsari, ma vië, ma kieo.”—Kolose 3:12

Rha viöyö wè nâ tö ka rhavû ke pètömâ rha vami. Nâ avâr̃i, êr̃ê, nè dè bâ wii nâ vimear̃i mâ vi pèkau yè duaër̃i vē, ae rhavû xinâ wè kamö ka vikoèji, röa bwêjë, rö wênenâ xēvē wè kui vē. Rèi bör̃i, nè yè kau yè bör̃i vami xēvē ka tö vè ûbwa mi, nâ ke yè cëi ketöne re. Rhaxârö, nâ wii nâ pâr̃â dâ mi xè Pèci Ar̃ii pè nââbee vē cèki wii nâ nâânevâ rö i mor̃u xēvē mâ rö pwar̃a pâr̃â kâmö paxa tö vè ubwa xēvē.

 1 DÈ BÂ TÂNEXÂI KÂÂ KA Ē YÈ DUAËR̃I VĒ

NÂ ÊR̃Ê NÂ PÈCI AR̃II, ÊR̃Ê: “Pèkau pēva xii ma pani i.” (Efeso 6:2) Nâki gëvē dowa utö beâr̃i, gëvē yè dè bâ pèkau duaër̃i vē. Tânexâi wa kui vē, êr̃e, cē bar̃ē wè nâ tö pwar̃a-e nâ ke yè yamwâiwaa duaër̃i-ē. “Vimear̃i we na da tawai weguru,” koa tânexâi bèr̃e, êr̃ê, nè kâvèyane viöyö xēvē nâ vimear̃i kui vē vèki pâr̃â vami xiē.—1 Korenito 13:4; Galatia 5:26.

NÂ PÂR̃I VĒ NÂ KE YÈ WAA:

  • Koa yè pè vèkēvē mêr̃ê a’ ka ûr̃û â, êr̃ê, “vami xii wè nâ da pèkau nya” utö “pâni xii wè nâ da ka rhivèē pâr̃â kââ re gö waa”

  • Ae waatörhû rhö vitânexâi kui vē

 2 TÖMÂ MÖR̃Ö RÖ I DÂ NÂKI PÂR̃I

NÂ ÊR̃Ê NÂ PÈCI, ÊR̃Ê: “Nè yè kâyâi pēva xiē mâ pâni xiē nâ wi, mâ vi rhuvia r̃u cur̃u bwè xiē, nâ bör̃i rhaxâ nâ kar̃ö r̃u.” (Genèse 2:24) Tèi nedè viöyö xēvē, duaër̃i vē wè cur̃u yè tânexâi, êr̃ê, nâ pâr̃i r̃e nâ ke yè vicâwâ rö lewe viöyö xēvē.

Nâ dè tö pwar̃a-u duawè nâ ke yè pèrivea yè duaër̃i xiu lee vicâwâ xi-r̃u, bör̃i tëvë yè-r̃u rö i wênenâ ka kièo, koa yè tëvë rö i rhoê. (Proverbes 15:1) Vipèyar̃i, yör̃a ka ē, mâ kièo ē wè cer̃e yè nââbee vē cèki ör̃ö ē nâ nō xēvē vèr̃i pâr̃â vami xēvē, nâ bör̃i pâr̃i vē nâ ke yè “tö vèrhaxâ xar̃a vimeari.”—Efeso 4:2.

NÂ PÂR̃I VĒ NÂ KE YÈ WAA:

  • Nâki göu nênâwer̃e xè i ke bar̃i vicâwâ i duaër̃i xiu rö i mor̃u xiu, tëvë vèrhaxâ nâ göu duawè rö i wênenâ ka kièo cèki göu kâvètâri nō xiu

  • Mèyè vèrhaxâ mâ pâbiri vèki-u dexâ kââ re yè kâvètâri nō xiu