“O cē re rhavu saxai kamo, we, na saxai wi ma boè.”—Mataio 19:4

Iehova * Bâō re pètömâ viöyö rö ka rhavû. Nâ êr̃ê nâ Pèci Ar̃ii, êr̃ê, tèi nedè ke yaxai i-ē bwè, nâ bör̃i “pè i-ē wa kui xiē.” Nâ kau au nâ vior̃o i Adamu nâ bör̃i êr̃ê: “O kââ ju-e mi xè i ju nya pie-ē mi xè i pie nya.” (Genèse 2:22, 23) Nâ dè bâ rhivèē nâ Iehova cèki cur̃u vior̃o nâ duawè.

Nâki gëvē öyö, gëvē bör̃i tânexâi, êr̃ê, nè da pwayèr̃i vē nâ kââ ka yane. Ae nō ka avâr̃i wè nâ êr̃ê, êr̃ê, nâki cur̃u rhivèē r̃u mâ öyö nâ kar̃u kâmö, nè yè bör̃i pwayèr̃i r̃u bar̃ē nâ bwêpë. (1 Korenito 7:28) Rö brochure-a, gëvē yè pwayèr̃i pâr̃â dâ mi xè Pèci Ar̃ii. Nâki gëvē waa köiwaa r̃e, nè yè bör̃i vior̃o nâ viöyö mâ vami xēvē.—Pèci Salamo 19:8-11.

 1 CËI NÊR̃Ê VĒ RE NÂ ADÂ NÂ IEHOVA

NÂ ÊR̃Ê NÂ PÈCI AR̃II, ÊR̃Ê: Nâ goâ bwè nâ kui xiē. —Efeso 5:23.

Ae, gëvē pâr̃â pâi, nâ rhivèē nâ Iehova cèki gëvē yamwâiwaa pâr̃â bwè xēvē. (1 Petero 3:7) Nâ yaxai i-ē cèki pè nââbee vē ka virù vèr̃i vē mâ rhivèē cèki gëvē waatörhû-e rö i vipèkau mâ vimear̃i. (Genèse 2:18) Mear̃i vè kau mâ waa ē bayê pâr̃â nekwêr̃ê-e rai pâr̃â nekwêr̃ê vē.—Efeso 5:25-29.

Ae gëvē pârâ bwè, nâ rhivèē nâ Iehova, cèki gëvē pèkau pâr̃â kui vē mâ nââbee cèki waa vè ē nêr̃ê-e. (1 Korenito 11:3; Efeso 5:33) Köiwaa pâr̃â vitânexâi xiē mâ wakè vèrhaxâ nâ göu. (Kolose 3:18) Nâki gëvē waa ûr̃û re, gëvē bör̃i yè ē rö nemè kui vē mâ rö nemè Iehova.—1 Petero 3:1-6.

NÂ PÂR̃I VĒ NÂ KE YÈ WAA:

  • Ërëwaa kui vē, êr̃ê, ûr̃û wè nâ ke yè waa ne, cèki gö yè rha wi ka ē au utö rha bwè ka ē au. Töpwêr̃ê ē pè a’cëi xiē mâ waa köiwaa ka pâr̃i xiu cèki ē nâ mör̃u xiu.

  • Târ̃âdâ vidù nâ göu. Nè yè mwââ vèr̃i nâ pâr̃â nedaa rö i vi a’pâgür̃ü xiu, cèki göu rhau vior̃o

2 KÂÂWAA RÖ I AVÂR̃I VITÂNEXÂI XIU VIDÚ

NÂ ÊR̃Ê NÂ PÈCI AR̃II, ÊR̃Ê: Mèyè mâ waatörhû bayê pâr̃â nekwêr̃ê kui vē. (Filipi 2:3, 4) Törhû kui vē ûr̃û kââ ka dö kââ mâ tânexâi ē, êr̃ê nâ rhivèē nâ Iehova cèki pâ kâmöyar̃i xiē wè cer̃e yè “kièo yè pâr̃â kâmö wânii.” (2 Timoteo 2:24) “Nâ dè wii nâ bör̃i kâmö re tëvë ûr̃û tawa ka kè, ae mer̃e a’ i pa gamë wè nâ nââ mör̃ö.” Bör̃i pâbir̃i ē pâr̃â nō i vē. (Proverbes 12:18) Ko ar̃ii i Iehova wè nè yè nââbee vē cèki gëvē tëvë rö i câwa ka ē mâ vimear̃i. —Galatia 5:22, 23; Kolose 4:6.

NÂ PÂR̃I VĒ NÂ KE YÈ WAA:

  • Bayêr̃i ke yè tëvë rö i rha nō ka dö kââ, pwaer̃o yè Bâō cèki nââ yè vē târ̃âdâ mâ cîî wenenâ xēvē

  • Tânexâi ē wa kââ re gëvē yè êr̃ê mâ ûr̃û wè nâ ke yè êr̃ê ne

 3 WAKÈ VÈRHAXÂ

NÂ ÊR̃Ê NÂ PÈCI AR̃II, ÊR̃Ê: Nâki gëvē öyö, gëvē wê “rhaxârhö kar̃o” vèr̃i kui vē. (Mataio 19:5) Ae göu dè bâ kar̃u kâmö, mâ göu dè töxar̃a vidù pâr̃â vitânexâi xiu ka da virù. Göu yè bör̃i a’pâgür̃ü ki yè rhaxârö rö vitânexâi mâ vinenâ xiu. (Filipi 2:2) Tânexâi vèrhaxâ bayêr̃i ke yè waa xiu rha kââ. Nâ êr̃ê nâ Pèci Ar̃ii; êr̃ê: “Tëvë vèrhaxâ nâ göu, cèki yēxèvè nâ pâr̃â wakè.” (Proverbes 20:18) Kâyâi yè pâr̃â dâ re tö Pèci Ar̃ii, cèki cer̃e vicâwâ rö i pâr̃â kââ ka dö kââ re göu yè pâbir̃i vèki mör̃u xiu.—Proverbes 8:32, 33.

NÂ PÂR̃I VĒ NÂ KE YÈ WAA:

  • Ka yè tëvë rhar̃i rhö rö i pâr̃â nō ka mâmâ mâ pâr̃â vitânexâi xēvē vidù ae êr̃êvea bar̃ē pâr̃â kââ re tö dö wênenâ xēvē yè kui vē

  • Tëvë vèrhaxâ nâ göu bayêr̃i ke yè waa rha kââ ka dö kââ

^ pal. 4 * Iehova wè nee Bâō re e pètovèa rö Pèci Ar̃ii.