Vi nâ ka törhû pâr̃â nemè pèci

Vi nâ ka törhû pâr̃â nemè pèci ka tö eria

Vi nâ ka törhû pâr̃â nemè pèci e yu rö ka rhavû

Témoins i Iehova

Ajië

Pâr̃â Virherhi Ka ē Xèi Mi Bâō!

 Viapagùr̃ù 4

Jae Nâ Iesu Keriso?

Jae Nâ Iesu Keriso?

Roi yër̃ë Iesu, jië re waa, cèki gère bar̃i tövè ubwa xiē?—MATAIO 11:29; MAREKO 10:13-16.

1. Nâ rhavu tâi nâ mor̃u i Iesu?

Nâ da virù vèr̃i kâmö nâ Cē; Iesu wè nâ mor̃u vè mwââ rö i ko baayêr̃i ke yè tövèa xiē roa boejë. (Ioane 8:23) Cē re ka rhavu ê yaxai i Bâō, nâ bör̃i nââbee Pēvā xiē rö i ke yaxai xiē pâr̃â kââ wânii. Dè Cē rhar̃hi re ê yaxai i Iehova; ökâre, e ayè O xiē “ka rhaxârö.” (Ioane 1:14) Cē re tëvë rö Ne Bâō, e bör̃i ayè bar̃ē “Nō.”Vâr̃â Proverbes 8:22, 23, 30; Kolose 1:15, 16; Heberu 1:2.

2. Xiye re nâ viria mi nâ boejë nâ Iesu?

Nâ kâyâi mi O xiē nâ Bâō cèki tövea rö lewe dexâ bwè dowa rö Yuda, Ne nâ Maria. Tö ökâre, Iesu nâ da Pēvā xiē nâ kâmö. (Luka 1:30-35) Nâ viria mi nâ boejë (1) cèki apâgùr̃ù yère avâr̃i rö i Bâō, (2) rö i ke waa xiē, nâ apâgùr̃ù yère ke yè waa rhivèē i Bâō tèi bomè ka ē, mâ bar̃ē tèi nedaa ka tâcerè, mâ (3) cèki nââ mor̃u xiē katö wânii “pèurhi yane.”Vâr̃â Mataio 20:28.

3. Kiye re nâ dö kââ vèkere nâ pèurhi yane?

Pèurhi yane, wè pane re e nââ cèki pè orua dexâ kâmö xèi pèime. (Exode 21:29, 30) Tö ka rhavu, nâ da tö vitânexâi Bâō nâ pèime, mâ vibeâr̃i vèki pâr̃â kâmö. Gère tâwai tâi? Bâō na êr̃ê yè Adamu, kâmö ka baayê, êr̃ê, nâki da pwêr̃êwa-e, nè yè bör̃i waa “nō ka yane,” nè yè bör̃i pèime. Nâki da waa mâ nō ka yane nâ Adamu, nè yè bör̃i da pèime. (Genèse 2:16, 17; 5:5) Nâ êr̃ê nâ Pèci Ar̃ii, êr̃ê, cē re “pûû” pèime roa boejë, katö i pâr̃â kâmö. Nâ bör̃i we kâxâi yè pâr̃â pâlè wânii yane, mâ pèime. Nâ dö kââ yère nâ pèurhi yane, cèki cö virai yane mâ pèime mi xèi Adamu.Vâr̃â Roma 5:12; 6:23.

 Jae re yè nââ kwâvâr̃â pèurhi yane, cèki pè orua re xèi pèime? Nâ da pâr̃i re nâ ke yè urhi yane i bor̃i kâmö, wè gère rhau pâr̃â kâmö paxa yane, wè nâki gère pèime, gère dè urhi rö pâr̃â yane xere.Vâr̃â Peci Salamo 49:7-9.

4. Kiye re nâ pèime nâ Iesu?

Nâ da ur̃u re nâ Iesu, wè Cē wè rha kâmö ka yèri yane rö xiē. Kiye re nâ pèime vèki yane, ae nâ dè yèri yane rö xiē, mâ nâ da waa kââ ka yane? Nâ pèime nâ Cē vèki pâr̃â yane i pâr̃â kâmö wânii. Bâō wè nâ pèrivea vimear̃i vibwir̃i rö i ke kâxâi mi O xiē cèki pèime vèkere. Iesu bar̃ē wè nâ pèrivea yère vimear̃i xiē, wè nâ pwêr̃êwa Pēvā xiē rö i ke nââ mor̃u xiē, pèurhi pâr̃â yane xere.Vâr̃â Ioane 3:16; Roma 5:18, 19.

5. Nâ waa jië nâ Iesu xinâ?

Tèi nedaa re nâ tö boejë nâ Iesu, nâ bör̃i waa ē paxa pèi, pèmor̃u paxa me, nââbee pâr̃â kâmö paxa boepë. Nâ pèrivea rö pâr̃â ke waa xiē, pâr̃â kââ re nè yè waa rèi pâr̃â nedaa ka yè pwami, vèki pâr̃â kâmö paxa pwêr̃êwa-e. (Mataio 15:30, 31; Ioane 5:28) Tèi nedè ke pèime xiē, nâ bör̃i pèmor̃u-e të nâ Bâō rö i ko. (1 Petero 3:18) Nâ bör̃i târ̃i rö ekar̃ae egamë i Iehova, cèmèrua, nâ ke mâ nââ ka viwinō yè nâ Iehova cèki Or̃okau rö boejë wânii. (Heberu 10:12, 13) Xinâ, wè nâ viwinō rö nekö ae pâr̃â pa pâgùr̃ù xiē wè cer̃e vivā i virherhi ka ē ne mwâcir̃i re roa boejë.Vâr̃â Daniel 7:13, 14; Mataio 24:14.

Nâ we tövè ubwa, Iesu Kaviwinō, wè nè yè rhōr̃u boejë mâ kâvèyèri pâr̃â boepë, mâ pâr̃â kâmö re pûû pâr̃â boepë re. Ae pâr̃â kâmö re tânewèi yè, rö i ke pwêr̃êwa xer̃e, wè cer̃e yè mâ mor̃u rö paradaiso roa boejë.Vâr̃â Peci Salamo 37:9-11.