Skip to content

Skip to table of contents

Yeˬhawˇbaˬ-euˬ Saˇ kiˇ

Select language Akha

 Ka li zaˬ-euˬ dehꞈ ziˇ

‘Pawˇluˆ nui ma g’aˬ ahˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ’

‘Pawˇluˆ nui ma g’aˬ ahˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ’

Loˇmaˆ meuˬ-ahˇ-euˬ mehˇ nmˇ deuˬ Pawˇluˆ oe keuˆ mehˬ lehˇ ya gaˬ ngeh, Pawˇluˆ-ahˇ haw mawˇ le-eu g’aˇ duˬ, aˬ yawꞈ maꞈ-euˬ dahˬ zaˇ gaˇ ma 40 laˇ (64 kiˬloˬmiˬteuˬ) dawˬ peh kaˬ gaˇ neh bi oeˬ-euˬ meh. Aˬ yawꞈ maꞈ-euˬ nui ga heu Pawˇluˆ-ahˇ aˬ joˆ-ehˇ bi g’eh leˇ-euˬ nga? “Aˬ yawꞈ maꞈ-ahˇ Pawˇluˆ ya mawˇ ngeh, nui ma g’aˬ tiˬ tiˆ paˇ ahˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh.” (K’ehˇ 28:15) Pawˇluˆ aˬ yawꞈ g’a iˇ-eu aˇ muˇ deuˬ-ahˇ g’aˬ biꞈ k’awꞈ, nymˬ-mˇ aˬ yawꞈ tawˬ-ahˇ uˇ luꞈ-eu miˇ neh, mehˇ nmˇ deuˬ g’aˬ biꞈ-euˬ jeˬ-ahˇ loˬ-eu meh.—2 Gawˇ 13:10.

Nymˬ-mˇ iˬ nah aˇ maꞈ-ahˇ sheuˬ g’eh-eu deuˬ aˇ muˇ doe ni g’a iˇ-awˇ mehˇ nmˇ deuˬ-ahˇ g’aˬ biꞈ-eu meh. Aˬ yawꞈ maꞈ k’awꞈ Miˬyehˇ gaˇ mˇ zaˬ nui deuˬ loꞈ-ehˇ, tiˬ poˆ na g’aˬ doeˇ doeˇ-awˇ noeˬ shaˬ k’ahˬ lahˇ-eu uˬ taꞈ, g’aˬ baˬ laˇ-eu lehˇ jiˇ baw-eu meh. Nyaˆ taꞈ poˆ aˇ maꞈ-ahˇ sheuˬ g’eh-eu g’aˬ hawˇ-eu aˬ yawꞈ miˬ zaˬ nawˬ-euˬ aˇ muˇ-ahˇ g’a laˇ ngeh, nawˇ aˬ yawꞈ maꞈ-ahˇ g’aˬ aˬ joˆ-ehˇ biꞈ nya-eu nga? Heu loꞈ-ehˇ jahˇ-eu heu naˇ, “nyiˬ paw luꞈ” g’aˬ biꞈ-eu jeˬ pyeuꞈ meh.—Maˆ 1:11, 12.

  • Tsaꞈ gaˬ-eu g’aˇ duˬ bawˬ dzaˬ gaˇ gm leˇ. Aˇ maꞈ-ahˇ sheuˬ g’eh-eu g’aˬ aˬ yawꞈ g’a leˇ-eu jaw-ahˇ mehˇ nmˇ deuˬ gaˇ dahˇ tsoeˬ-eu jeˬ-ahˇ za nya ni leh jeh gaˇ ya mawˇ ngeh, g’aˬ ahˇ leˇ-eu meh. (1 Teˇ 1:2, 3; 2:20) Aˬ yawꞈ g’a laˇ ngeh siˬ-ahˇ tiˬ poˆ na huˬ mehˬ mehˬ-eu g’aˬ geuꞈ nya meh. K’oeˇ naˇ, aˬ yawꞈ nya nehˬ-ehˇ tsaꞈ gaˬ iˇ-eu maˬ ngeuˇ naˇ, Jaˇliꞈ dzaw zaˬ jawˇ gaˇ sheuˬ g’a-iˇ-eu za meh loˇ? Aˬ yawꞈ nyaꞈ mehˇ nmˇ yaw shuiꞈ nehˬ-ehˇ maˬ ehˇ, tsaꞈ gaˬ ngeh teu naˆ naˆ maˬ ngehˬ nya-eu deuˬ nehˬ-ehˇ maˬ ehˇ, mehˇ nmˇ nui deuˬ nehˬ-ehˇ maˬ ehˇ ya tsaꞈ gaˬ-euˬ laˬ k’aˬ cehˇ-eu meh.

  • Lmˇ boˬ ni ha nehˬ. Nawˇ aˬ yawꞈ nyaꞈ-ahˇ nawˬ-euˬ iˇ kahˇ-ahˇ bi yaꞈ laˇ-eu, maˬ ngeuˇ naˇ hawˬ tiˬ byawˇ na bi dzaˬ-eu za meh loˇ? Heu naˇ nawˇ aˬ yawꞈ nyaꞈ-ahˇ gaˬ-eu lehˇ mˇ mawˇ-eu jeˬ pyeuꞈ meh. Aˬ yawꞈ nyaꞈ g’awˬ mya jeˬ maˬ loˬ-a, yaw awˬ awˬ lehˇ jahˇ nehˬ naˇ g’aˬ meh.—Luˇ 10:38-42.

  • Ehˇ dawˬ naˇ haˬ-awˇ, dawˬ mehˬ dawˬ tsoˆ-ahˇ mˇ caw. Aˇ maꞈ-ahˇ sheuˬ g’eh-eu deuˬ naˇ, aˬ dui Miˬyehˇ gaˇ mˇ-eu paw bym laˇ ni nui gaˬ keuˆ-eu laꞈ k’oeˇ caw ba nehˬ mawꞈ-eu miˇ neh, tiˬ poˆ na dawˇ coe ni mehˬ nehˬ tsoˆ nehˬ laˇ-eu meh. (1 Gawˇ 5:1-5) Aˬ dui aˬ yawꞈ maꞈ-euˬ ehˇ dawˬ naˇ haˬ-awˇ uˆ lahˇ-eu uˬ moˆ jawˇ naˇ, aˬ dui jiˇ laˬ k’aˬ cehˇ nui saˇ oꞈ-eu meh.—Heˬ 13:17.

  • Aˇ poeˬ taˬ baw-eu lehˇ bi siˬ. Aˇ maꞈ-ahˇ sheuˬ g’eh-eu g’aˬ hawˇ-eu aˬ yawꞈ-euˬ miˬ zaˬ-ahˇ, aˬ yawꞈ nyaꞈ neh leh jeh-euˬ jeˬ nawˬ-ahˇ aˇ naˆ ni gaˇ dahˇ tsoeˬ nya lehˇ, dawˬ neh maˬ ngeuˇ naˇ sahˬ boꞈ boꞈ-awˇ ehˇ nehˬ.—Sehˇ 3:15.