Skip to content

Skip to table of contents

Yeˬhawˇbaˬ-euˬ Saˇ kiˇ

Select language Akha

Muiˬ-eu shawˇ-eu yaw sahˇ neh bi sheuˬ g’eh daˆ leꞈ

Muiˬ-eu shawˇ-eu yaw sahˇ neh bi sheuˬ g’eh daˆ leꞈ

“Muiˬ-eu shawˇ-eu yaw sahˇ sheuˬ g’eh-eu mehˬ nah caw teh-awˬ.”—Gaˬlaˬtiˆ 5:16, MS.

Dawˬ caˇ: 22, 75

1, 2. Mehˇ nmˇ tiˬ g’aˬ aˬ yawꞈ aˬ joˆ-ehˇ g’eh luꞈ-eu lehˇ siˬ nya laˇ ngeh, aˬ jeˬ jahˇ-euˬ nga?

Mehˇ nmˇ Loˇbeuꞈ zaˬ guˬ ngeh neh iˇ cuꞈ shawˇ-euˬ meh. Ehˇ k’awꞈ, yaw tsaˬ yaw dawˇ jeˬ naˇ, aˬ yawꞈ-euˬ dehꞈ ziˇ laꞈ k’oeˇ aˇ yeˇ huiˬ dzehˬ-eu jeˬ maˬ ngeuˇ-a. Aˬ yawꞈ ehˇ-eu, “Ngaˇ maˬ mˇ lehˬ haw-aˬ, aˬ jeˬ mˇ k’awꞈ yawˬ nah na ya mˇ-eu loꞈ-ehˇ mˇ-eu tehꞈ ma. Aˬ cawˬ naˇ ngaˬ-euˬ nui jah ziꞈ dah ni g’eh ngaˇ lehˇ noeˬ-eu meh. Ngaˇ aˬ myah luꞈ bawˬ dzaˬ gaˇ iˇ-awˇ, tiˬ k’oꞈ laꞈ k’oeˇ huˬ mehˬ mehˬ-eu g’aˬ 2 poˆ 3 poˆ geuꞈ-eu ma. Ehˇ k’awꞈ, ngaˬ-ahˇ tiˬ jeˬ na loˬ-eu loꞈ-ehˇ duˇ nya.”

2 Loˇbeuꞈ aˬ yawꞈ aˬ jeˬ loˬ-eu lehˇ oeˇ mˇ baˇ dzeuˇ-awˇ neh tehꞈ-ehˇ siˬ nya laˇ-euˬ meh. Aˬ yawꞈ nyaꞈ dzeˇ zaˬ tiˬ g’aˬ tiˇ g’aˬ Jaˇliꞈ-euˬ gaˇ kawˆ naˇ haˬ niˇ g’a ngeh, aˬ yawꞈ-euˬ miˬ zaˬ naˇ, Loˇbeuꞈ naˆ maˬ tseˇ Jaˇliꞈ gaˇ kawˆ siˬ nya dzehˬ-awˇ yaw kawˇ-ehˇ ehˇ k’oꞈ nehˬ nya-eu meh. Ehˇ k’awꞈ, Loˇbeuꞈ naˇ maˬ ehˇ k’oꞈ nya-eu miˇ neh saꞈ dawˇ dui dui-eu meh. Aˬ yawꞈ ehˇ-eu “Ngaˬ-ahˇ naˇ tiˬ jeˬ-iˬ maˬ siˬ nya gaˇ duˇ nya. ‘Nui jah paw ngaˬ-euˬ miˬ zaˬ neh ya bi sheuˬ g’eh nga laˬ leˇ heu’ lehˇ noeˬ laˇ nya. Aˇ, toˆ-ehˇ maˬ geuꞈ nya nga.” Loˇbeuꞈ tiˬ jeˬ paˬ ya jahˇ nga lehˇ noeˬ leˇ-euˬ meh. Aˬ yawꞈ ehˇ-eu, “Ngaˇ Jaˇliꞈ-ahˇ yaw muiˬ-ehˇ poˆ tseˇ haw-euˬ ma. Teu loꞈ-ehˇ jahˇ ngeh, ngaˬ-ahˇ muiˬ daˆ laˇ-awˇ,  Jaˇliꞈ gaˇ kawˆ-ahˇ g’oˆ shaw dzehˬ laˇ-eu uˬ taꞈ, Yeˬhawˇbaˬ nehˬ-ehˇ jiˇ g’oeˇ dzehˬ laˇ-euˬ miˇ-a.”

3. (a) Aˬ dui Loˇbeuꞈ-euˬ gaˇ kawˆ-ahˇ neh aˬ jeˬ ya dzaw-euˬ nga? (b) Heu kawˆ-ahˇ aˇ yeˇ huiˬ-eu aˬ jeˬ gaˇ kawˆ-ahˇ ja sawˇ-eu nga?

3 Mehˇ nmˇ Loˇbeuꞈ-euˬ gaˇ kawˆ aˬ dui-ahˇ yaw myaˬ jeˬ mehˬ-eu meh. Aˬ dui Jaˇliꞈ gaˇ kawˆ tiˬ jeˬ na-ahˇ siˬ nya-awˇ aˬ myah luꞈ bawˬ dzaˬ gaˇ iˇ-eu uˬ taꞈ, Miˬyehˇ-euˬ gaˇ mˇ luꞈ k’awꞈ muiˬ-eu shawˇ-eu yaw sahˇ neh maˬ bi sheuˬ g’eh-eu k’awꞈ pyeuꞈ nya meh. Maˬ ngeuˇ naˇ, nymˬ-mˇ aˬ dui muiˬ-eu shawˇ-eu yaw sahˇ neh bi sheuˬ g’eh luꞈ-eu k’awꞈ, aˬ dui yawˬ haˇ yawˬ ha goˬ haw naˇ, paˇ muiˬ daˆ laˇ nya-eu jeˬ-ahˇ ya mawˇ tehꞈ-a. (Piˇliˇpiˆ 3:16) Heu kawˆ laꞈ k’oeˇ aˬ dui aˇ yeˇ huiˬ-eu smˬ k’awˆ-ahˇ ja sawˇ ma. (1) Aˬ dui muiˬ-eu shawˇ-eu yaw sahˇ neh bi sheuˬ g’eh luꞈ-eu lehˇ aˬ joˆ-ehˇ siˬ laˇ-eu nga? (2) Aˬ dui Miˬyehˇ nehˬ-ehˇ g’oeˇ dzehˬ leˇ ni aˬ joˆ-ehˇ ya jahˇ-eu nga? (3) Aˬ dui Miˬyehˇ nehˬ-ehˇ g’oeˇ-eu heu naˇ, aˬ yawꞈ nah yawꞈ dehꞈ daˆ leꞈ-eu jeˬ-ahˇ aˬ joˆ-ehˇ gaˇ dahˇ tsoeˬ-eu nga?

Aˬ dui muiˬ-eu shawˇ-eu yaw sahˇ neh bi sheuˬ g’eh luꞈ-eu lehˇ aˬ joˆ-ehˇ siˬ laˇ-eu nga?

4. Eˇpeˇsu 4:23, 24-ahˇ mehˬ taˬ-euˬ dawˬ, aˬ suˇ g’aˬ-euˬ g’aˇ duˬ nga?

4 Aˬ dui Miˬyehˇ gaˇ mˇ dahˬ beh laˇ ngeh, dehꞈ ziˇ laꞈ k’oeˇ yaw myaˬ jeˬ laˆ paˇ-euˬ ma. Ehˇ k’awꞈ, aˬ dui iˇ cuꞈ shawˇ-awˇ neh tehꞈ-ehˇ maˬ jiˇ-a. Jaˇliꞈ aˬ dui-ahˇ “aˬ myah luꞈ naw maꞈ-euˬ nui ma yaw shuiꞈ bi paˇ laˇ-awˬ” lehˇ ehˇ-eu meh. (Eˇpeˇsu 4:23, 24, MS) Aˬ dui maˬ byah kuꞈ-eu miˇ neh, aˬ myah luꞈ ya beˬ paˇ daˆ leꞈ-eu meh. Aˬ dui Miˬyehˇ gaˇ mˇ-eu yaw myaˬ k’oꞈ byah laˇ-euˬ k’awꞈ, aˬ myah luꞈ Yeˬhawˇbaˬ nehˬ-ehˇ ya g’oeˇ dzehˬ laˇ-eu meh.—Piˇliˇpiˆ 3:12, 13.

5. Aˬ dui muiˬ-eu shawˇ-eu yaw sahˇ neh bi sheuˬ g’eh luꞈ ngaˇ laˬ lehˇ siˬ laˇ-eu g’aˇ duˬ, yawˬ ha-ahˇ aˬ joˆ-ehˇ ya naˇ haˬ-eu nga?

5 Tsawˇ mawˬ zaˬ guˬ deuˬ maˬ ehˇ, yawˬ haˇ yawˬ ha dawˇ coe ni ya pyehˆ tseˇ-eu meh. Aˬ dui yawˬ ha-ahˇ heu loꞈ-ehˇ naˇ haˬ nya meh. ‘Ngaˇ muiˬ-eu shawˇ-eu yaw sahˇ neh bi sheuˬ g’eh luꞈ miˇ-a loˇ? Ngaˇ Yeˬsuˇ loꞈ-ehˇ duˇ leˇ luꞈ miˇ-a loˇ? Bawˬ dzaˬ gaˇ iˇ ngeh, ngaˬ neh noeˬ-awˇ mˇ-eu jeˬ, ngaˇ aˬ joˆ-ehˇ g’eh-eu tsawˇ haˬ pyeuꞈ-eu lehˇ mˇ doˆ laꞈ nya? Ngaˇ ngehˬ-eu jeˬ, ngaˇ aˬ jeˬ geuꞈ mawꞈ-eu lehˇ bi siˬ nya? Ngaˇ gui-eu jeˬ hawˇ-eu ngaˇ dm-eu jeˬ, aˬ cawˬ-ahˇ aˬ jeˬ bi siˬ nga? Ngaˬ-ahˇ bi mˇ bahˬ-eu lehˇ lawˬ haw laˇ ngeh, ngaˇ aˬ joˆ-ehˇ jahˇ nyaˬ? Ngaˇ muiˬ daˆ laˇ-eu Ka li zaˬ pyeuꞈ ni leh jeh luꞈ miˇ-a laˬ?’ (Eˇpeˇsu 4:13) Naˇ haˬ taˬ-euˬ heu deuˬ, aˬ dui Yeˬhawˇbaˬ nehˬ-ehˇ aˇ naˆ ni g’oeˇ-eu lehˇ siˬ laˇ ni caw ba nehˬ-eu meh.

6. Aˬ dui muiˬ-eu shawˇ-eu yaw sahˇ neh bi sheuˬ g’eh luꞈ-eu lehˇ siˬ laˇ-eu aˬ jeˬ paˇ jaˆ nga siˬ?

6 Aˬ dui muiˬ-eu shawˇ-eu yaw sahˇ neh bi sheuˬ g’eh luꞈ ngaˇ laˬ lehˇ siˬ laˇ-eu g’aˇ duˬ, tiˬ poˆ na aˬ cawˬ neh ya bi caw ba-eu meh. Shiˬ shaˬ jiˇ paw shaˇ noeˬ-eu tsawˇ haˬ Miˬyehˇ nui k’ahˇ shiˇ ni aˬ joˆ-ehˇ ya dehꞈ-eu lehˇ maˬ siˬ nya-a lehˇ Pawˇluˆ ehˇ-eu meh. Ehˇ k’awꞈ, muiˬ-eu shawˇ-eu yaw sahˇ neh bi sheuˬ g’eh-eu tsawˇ haˬ naˇ, Miˬyehˇ ya leˇ-eu jeˬ-ahˇ siˬ nya-awˇ, shiˬ shaˬ jiˇ-euˬ nui noeˬ nui loˆ geuꞈ-eu tsawˇ haˬ-ahˇ Miˬyehˇ maˬ ya leˇ-a lehˇ jiˇ siˬ nya meh. (1 Gawˇliˬtu 2:14-16; 3:1-3, MS) Yeˬsuˇ loꞈ-ehˇ g’eh-eu aˬ yuiꞈ deuˬ mehˇ nmˇ tiˬ g’aˬ na, shiˬ shaˬ jiˇ nui k’ahˇ paw dehꞈ gaˇ ya mawˇ ngeh, mehˇ nmˇ  deuˬ-ahˇ leh jeh-eu laꞈ k’oeˇ caw ba-eu meh. Aˬ yuiꞈ deuˬ aˬ dui-ahˇ caw ba laˇ ngeh, aˬ dui ha geuꞈ-awˇ aˬ yawꞈ maꞈ neh mehˬ nehˬ laꞈ-eu jeˬ-ahˇ mˇ caw ma loˇ? Aˬ dui mˇ caw naˇ, Miˬyehˇ nehˬ-ehˇ g’oeˇ dzehˬ laˇ mawꞈ ngaˇ lehˇ siˬ laˇ-eu meh.—Dawˬtsoˆtsoˆ-eu 7:5, 9.

Miˬyehˇ nehˬ-ehˇ g’oeˇ dzehˬ laˇ

7. Nui jah ziꞈ dah ni bi g’eh-eu g’aˇ duˬ, Jaˇliꞈ-euˬ nui gahˇ ahˇ neh tehꞈ-ehˇ maˬ jiˇ-a lehˇ aˬ dui aˬ joˆ-ehˇ siˬ nya-eu nga?

7 Jaˇliꞈ-euˬ gaˇ kawˆ-ahˇ siˬ nya-awˇ neh tehꞈ-ehˇ muiˬ-eu shawˇ-eu yaw sahˇ neh bi sheuˬ g’eh-eu lehˇ ehˇ mawꞈ-eu maˬ ngeuˇ-a. Sahˬ paˬ Sawˇlaˬmoˬ Yeˬhawˇbaˬ-euˬ gaˇ kawˆ g’awˬ mya jeˬ siˬ nya-awˇ aˬ yawꞈ neh boꞈ-euˬ sahˬ boꞈ k’awꞈ Jaˇliꞈ laꞈ k’oeˇ-euˬ sahˬ boꞈ tiˬ deuˬ pyeuꞈ laˇ-euˬ meh. Ehˇ k’awꞈ, myahˇ laˇ ngeh aˬ yawꞈ Yeˬhawˇbaˬ nehˬ-ehˇ cawˬ cawˬ-eu jeˬ bi cawˆ iˇ-awˇ, saˇ jaˇ maˬ paˇ ziꞈ-euˬ meh. (1 Sahˬpaˬ 4:29, 30; 11:4-6) Teu miˇ neh, aˬ dui Jaˇliꞈ-euˬ nui gahˇ ahˇ-eu tehꞈ-ehˇ maˬ g’aˬ ni, aˬ jeˬ paˇ ya ahˇ nga siˬ? Aˬ dui-euˬ nui jah ziꞈ dah ni ya bi g’eh-eu meh. (Gawˇlawˇsehˇ 2:6, 7) Aˬ joˆ-ehˇ ya jahˇ-eu nga?

8, 9. (a) Aˬ dui-euˬ nui jah ziꞈ ni caw ba nya-eu aˬ jeˬ nga? (b) Aˬ dui dzaw-awˇ shaˬ noeˬ shaˇ sawˇ ngeh, aˬ jeˬ-euˬ g’aˇ duˬ ya bi pyeuꞈ nga?

8 Dahˬ beh-eu Ka li zaˬ deuˬ-ahˇ Pawˇluˆ “huiˬ loˆ laˇ-euˬ tsawˇ haˬ deuˬ loꞈ-ehˇ mehˬ hu paw dzaw daˆ leꞈ kaˇ-euˇ” lehˇ g’aˬ biꞈ-eu meh. (Heˬbyehˇ 6:1) Nymˬ-mˇ iˬ nah aˬ dui Pawˇluˆ-euˬ dawˬ heu-ahˇ aˬ joˆ-ehˇ zmˬ nya-eu nga? Aˇ yeˇ huiˬ-eu tiˬ jeˬ naˇ, Miˬyehˇ-euˬ g’oeˇ-eu gaˬ-eu laꞈ k’oeˇ jawˇ ziꞈ lehˇ ehˇ-eu paˇ dmˬ dzaw-eu heu meh. Heu dmˬ naˇ, aˬ dui Jaˇliꞈ zahˇ dehꞈ ziˇ laꞈ k’oeˇ aˬ joˆ-ehˇ zmˬ iˇ nya nga lehˇ siˬ laˇ ni caw ba nehˬ-eu meh. Nawˇ paˇ dmˬ heu dzaw jiˇ shaw-euˬ naˇ, nawˬ-euˬ nui jah bi ziꞈ-eu g’aˇ duˬ, nawˬ dzaw nya-eu paˇ dmˬ nui deuˬ paˇ jaˆ-a siˬ. (Gawˇlawˇsehˇ 1:23) K’oeˇ naˇ, aˬ dui neh za dzaw-euˬ gaˇ kawˆ deuˬ-ahˇ ya shaˇ noeˬ shaˇ sawˇ-awˇ, aˬ dui-euˬ dehꞈ ziˇ laꞈ k’oeˇ zmˬ iˇ nya ni caw ba nehˬ laꞈ lehˇ Yeˬhawˇbaˬ-ahˇ ya shaˇ-eu meh.

9 Aˬ dui dzaw-awˇ shaˬ noeˬ shaˇ sawˇ ngeh, Yeˬhawˇbaˬ-euˬ ehˇ dawˬ naˇ haˬ-awˇ, aˬ yawꞈ-ahˇ nui k’ahˇ bi shiˇ ni dehꞈ mawꞈ-eu g’aˇ duˬ ya bi pyeuꞈ meh. (Ja ceuˬ 40:8; 119:97) K’oeˇ naˇ, aˬ dui Miˬyehˇ nehˬ-ehˇ cawˬ cawˬ taꞈ-eu jeˬ-ahˇ laˆ cawˆ laˇ-eu yawˬ jeˬ na luꞈ-ahˇ yahˇ nya ni jiˇ ya dzaw-eu meh.—Tiˇtuˆ 2:11, 12.

10. Zaˬ guˬ deuˬ Miˬyehˇ nehˬ-ehˇ aˬ joˆ-ehˇ g’oeˇ dzehˬ leˇ nya-eu nga?

10 Nawˇ zaˬ guˬ pyeuꞈ naˇ, Miˬyehˇ-euˬ gaˇ mˇ-eu paw noeˬ taˬ maˬ loˇ? Beˬdeˬlaˇ-ahˇ jawˇ-eu mehˇ  nmˇ aˬ li tiˬ g’aˬ Tiˬ nah mehˬ bawˬ-ahˇ iˇ cuꞈ shawˇ-eu lehˇ g’eh-eu zaˬ guˬ deuˬ-ahˇ, nawˇ Miˬyehˇ-euˬ gaˇ laꞈ k’oeˇ aˬ jeˬ mˇ-eu lehˇ noeˬ taˬ leˬ lehˇ naˇ haˬ-eu meh. Zaˬ guˬ tiˬ g’aˬ na mehˬ hu paw Miˬyehˇ-euˬ gaˇ laꞈ k’oeˇ aˬ jeˬ mˇ-eu lehˇ yaw muiˬ-ehˇ noeˬ taˬ-euˬ ngaˇ lehˇ ya mawˇ-euˬ meh. Miˬyehˇ-euˬ gaˇ aˇ yamˬ tiˬ byah ni mˇ mawꞈ-eu deuˬ jawˇ-awˇ, tsaꞈ gaˬ-eu tsawˇ haˬ loˬ gaˇ jawˇ iˇ mawꞈ-eu deuˬ jiˇ jawˇ-eu meh. Ehˇ k’awꞈ, zaˬ guˬ tiˬ g’aˬ na maˬ ehˇ k’oꞈ nehˬ nya-a. Aˬ yawꞈ maꞈ Miˬyehˇ-euˬ gaˇ mˇ-eu paw maˬ noeˬ taˬ k’awꞈ geuꞈ nya meh lehˇ noeˬ-eu miˇ neh nga loˇ? Nawˇ zaˬ guˬ pyeuꞈ naˇ, yawˬ haˇ-ahˇ heu loꞈ-ehˇ naˇ haˬ: ‘Ngaˇ bawˬ dzaˬ iˇ-awˇ tsaꞈ gaˬ iˇ-eu heu, ngaˬ da ngaˬ ma bi mˇ mawꞈ-eu miˇ neh nya laˬ? Ngaˇ Miˬyehˇ nehˬ-ehˇ cawˬ cawˬ taꞈ-eu leh jeh miˇ-a loˇ?’ Maˇ diˇ naˇ tsawˇ mawˬ zaˬ guˬ maˬ ehˇ, aˬ dui yawˬ g’aˬ na luꞈ Miˬyehˇ-euˬ gaˇ mˇ-eu paw ya noeˬ taˬ-eu meh. Noeˬ taˬ-eu jeˬ heu naˇ, aˬ dui Miˬyehˇ nehˬ-ehˇ g’oeˇ dzehˬ leˇ ni cawˬ ba nehˬ-eu meh.—Dawˬtsoˆtsoˆ-eu 12:1, 13.

11. (a) Aˬ dui muiˬ-eu shawˇ-eu yaw sahˇ neh bi sheuˬ g’eh-eu g’aˇ duˬ aˬ jeˬ ya jahˇ-eu nga? (b) Aˬ dui aˬ suˇ g’aˬ-ahˇ dzaw geuꞈ nya-eu nga?

11 Aˬ dui laˆ paˇ paˬ-ehˇ g’eh-eu jeˬ-ahˇ mawˇ naˇ nymˇ neh ya laˆ paˇ-eu meh. Heu naˇ dehꞈ-eu jeˬ hawˇ-eu shiˇ-eu jeˬ-ahˇ taꞈ-eu miˇ neh, aˇ yeˇ huiˬ dui dui-eu jeˬ pyeuꞈ meh. (Loˇmaˆ 8:6-8, MS) Yeˬhawˇbaˬ aˬ dui tiˬ byah tiˬ loꞈ mˇ nya jiˇ meh lehˇ maˬ noeˬ tmˬ-eu uˬ taꞈ, aˬ yawꞈ-euˬ muiˬ-eu shawˇ-eu yaw sahˇ neh bi caw ba-eu k’awꞈ, aˬ dui jiˇ ya leh jeh-eu meh. Uˆ lahˇ-eu aˇ muˇ laꞈ k’oeˇ tiˬ g’aˬ pyeuꞈ haw-euˬ mehˇ nmˇ Jawˆ Baˬ, Luˇkaꞈ 13:24 nehˬ-ehˇ taꞈ leˇ-awˇ ehˇ-eu, “Tsawˇ haˬ yaw myaˬ g’aˬ goˆ k’ehˬ yaw suꞈ-ahˇ maˬ le ahˇ nya-a, nui jah paw bi ziꞈ-eu g’aˇ duˬ leh jeh-eu maˬ loꞈ-eu  miˇ neh.” Aˬ dui mˬ taˆ g’aˬ k’ehˇ nehˬ-ehˇ dawꞈ ceh ceh-awˇ guiˬ lahˬ za-euˬ Yaˬkoˆ loꞈ-ehˇ ya g’eh-eu meh. (Aˇdahˬbeh-eu 32:26-28) Tiˬ poˆ na aˬ dui Jaˇliꞈ gui-eu yaw byawˬ k’awꞈ, aˬ poeˬ dawˬ oeˇ loꞈ-ehˇ gui byawˬ-eu tehꞈ ma lehˇ maˬ ya noeˬ-a. Yawˬ ha-ahˇ gaˇ dahˇ tsoeˬ-eu yaw tsaˬ yaw dawˇ poˆ-eu g’aˇ duˬ ya leh jeh-eu meh.

12, 13. (a) Loˇmaˆ 15:5-ahˇ mˇ caw nya ni aˬ dui-ahˇ caw ba nehˬ-eu aˬ jeˬ nga? (b) Pawˇluˆ nehˬ mehˬ-eu jeˬ hawˇ-eu mˇ-euˬ aˬ dui-ahˇ aˬ joˆ-ehˇ caw ba-eu nga? (c) Miˬyehˇ nehˬ-ehˇ g’oeˇ dzehˬ leˇ ni, nawˇ aˬ jeˬ jahˇ le? (“ Miˬyehˇ nehˬ-ehˇ g’oeˇ dzehˬ leˇ ni ya mˇ-eu jeˬ” lehˇ ehˇ-eu oeˬ coeˇ oeˬ bawˬ-ahˇ haw.)

12 Aˬ dui Miˬyehˇ nehˬ-ehˇ g’oeˇ dzehˬ leˇ-eu g’aˇ duˬ leh jeh ngeh, muiˬ-eu shawˇ-eu yaw sahˇ aˬ dui-euˬ nui noeˬ paˇ laˇ ni caw ba nehˬ-awˇ, aˬ dui a lawˆ lawˆ-ehˇ Yeˬsuˇ loꞈ-ehˇ noeˬ nya laˇ-eu meh. (Loˇmaˆ 15:5) Muiˬ-eu shawˇ-eu yaw sahˇ heu naˇ, maˬ muiˬ-eu nui noeˬ-ahˇ laˆ byoˆ nehˬ-awˇ, Miˬyehˇ ya leˇ-eu seu dzeuꞈ aˇ g’ehˇ muiˬ daˆ laˇ ni caw ba nehˬ-eu meh. (Gaˬlaˬtiˆ 5:16, 22, 23, MS) Aˬ dui pyuˇ shuiˇ myawˬ gahˬ hawˇ-eu byawˬ g’a mo g’a-eu jeˬ-ahˇ aˇ dzehˬ-ehˇ taˬ huiˬ dzeuˇ nya lehˇ noeˬ laˇ naˇ, g’aˬ taˬ baˬ. Tsaˬ-eu jeˬ-ahˇ haw tsoꞈ taˬ nya-eu g’aˇ duˬ, muiˬ-eu shawˇ-eu yaw sahˇ biꞈ nehˬ laꞈ lehˇ aˬ myahˬ luꞈ Yeˬhawˇbaˬ-ahˇ shaˇ. (Luˇkaꞈ 11:13, MS) Pawˇluˆ k’awꞈ aˬ myah luꞈ Yeˬsuˇ loꞈ-ehˇ noeˬ-eu maˬ ngeuˇ-a lehˇ taˬ ngehˇ. (Maꞈtehˬ 16:22, 23; Luˇkaꞈ 22:34, 54-62; Gaˬlaˬtiˆ 2:11-14) Ehˇ k’awꞈ, aˬ yawꞈ g’aˬ maˬ baˬ-eu miˇ neh Yeˬhawˇbaˬ aˬ yawꞈ-ahˇ caw ba-euˬ meh. Pawˬluˆ tiˬ poˆ cuiˆ cuiˆ-ehˇ Yeˬsuˇ loꞈ-ehˇ noeˬ nya laˇ-euˬ miˇ neh, aˬ dui jiˇ teu loꞈ-ehˇ jahˇ nya-eu meh.

13 Dzeuˇ laˇ ngeh Pawˇluˆ aˬ dui ahˇ paˬ-ehˇ g’eh-eu seu dzeuꞈ aˇ g’ehˇ deuˬ-ahˇ ehˇ keuˆ taˬ-euˬ meh. (2 Beˬtuˆluˆ 1:5-8-ahˇ gui.) Aˬ dui yawˬ ha-euˬ nui ma-ahˇ g’aˬ leˇ-eu jeˬ, oˇ oꞈ-eu jeˬ, mehˇ nmˇ deuˬ-ahˇ gaˬ-eu jeˬ hawˇ-eu seu dzeuꞈ aˇ g’ehˇ nui deuˬ ahˇ-eu g’aˇ duˬ ya leh jeh dui dui-eu meh. Aˬ dui yawˬ g’aˬ na luꞈ yawˬ ha-ahˇ heu loˆ-ehˇ naˇ haˬ nya meh. ‘Ngaˇ Miˬyehˇ nehˬ-ehˇ bi g’oeˇ dzehˬ leˇ-eu g’aˇ duˬ, iˬ nah ngaˇ aˬ jeˬ-euˬ seu dzeuꞈ aˇ g’ehˇ mˇ doˆ laꞈ-euˬ nga?’

Yawˬ nah na luꞈ Jaˇliꞈ zahˇ-ahˇ mˇ caw

14. Aˬ dui Miˬyehˇ nehˬ-ehˇ g’oeˇ-eu jeˬ, yawˬ nah na luꞈ dehꞈ-eu jeˬ nehˬ-ehˇ aˬ joˆ-ehˇ taꞈ-eu nga?

14 Aˬ dui Yeˬsuˇ loꞈ-ehˇ noeˬ-eu heu naˇ, gaˇ mˇ ngeh maˬ ehˇ sahˬ boꞈ dzaw iˇ ngeh maˬ ehˇ, aˬ dui neh noeˬ-awˇ mˇ-eu jeˬ nehˬ-ehˇ taꞈ-awˇ, aˬ yawꞈ nah yawꞈ noeˬ tsehˆ-eu jeˬ nehˬ-ehˇ jiˇ taꞈ-eu meh. Aˬ dui neh noeˬ tsehˆ-euˬ jeˬ, aˬ dui Yeˬsuˇ-ahˇ dzaw geuꞈ luꞈ-eu lehˇ bi mawˇ laꞈ-awˇ, aˬ dui Miˬyehˇ nehˬ-ehˇ g’oeˇ-eu cawˬ pyeuꞈ-eu miˇ neh, aˬ yawꞈ nehˬ-ehˇ cawˬ cawˬ-eu cawˆ iˇ paˬ-ehˇ g’eh-eu jeˬ aˬ dui maˬ mˇ mawˬ-a. Aˬ dui-ahˇ bi mˇ bahˬ-eu lehˇ lawˬ haw laˇ ngeh, aˬ dui Miˬyehˇ-euˬ g’oeˇ-eu cawˬ pyeuꞈ naˇ oˇ dzeuˇ nya meh. K’oeˇ naˇ, aˬ dui tiˬ jeˬ na-euˬ gaˇ kawˆ-ahˇ noeˬ tsehˆ-eu lehˇ g’eh ngeh, tiˬ k’ehˬ na-awˇ, ‘Yeˬhawˇbaˬ nui k’ahˇ shiˇ ni ngaˇ aˬ joˆ-ehˇ ya noeˬ tsehˆ-eu nga?’ lehˇ yawˬ ha-ahˇ naˇ haˬ. Aˬ dui heu loꞈ-ehˇ ya noeˬ dzaw taˬ-eu meh. Nymˬ-mˇ aˬ dui gaˇ kawˆ tiˬ jeˬ na-ahˇ haw iˇ ma. Gaˇ kawˆ heu deuˬ-ahˇ ya noeˬ tsehˆ ngeh Jaˇliꞈ zahˇ aˬ geu deuˆ zmˬ-eu tsaˬ nga lehˇ haw ma.

15, 16. Yeˬsuˇ loꞈ-ehˇ noeˬ-eu heu naˇ, aˬ dui gaˇ kawˆ heu deuˬ-ahˇ yaw gahˇ gahˇ-ehˇ noeˬ tsehˆ nya ni aˬ joˆ-ehˇ caw ba nehˬ-eu nga? (a) oeˇ mˇ baˇ-eu aˇ gu tseˇ ngeh (b) cawˬ tseˇ ngeh

15 Oeˇ mˇ baˇ-eu aˇ gu tseˇ-eu gaˇ kawˆ. Jaˇliꞈ zahˇ 2 Gawˇliˬtu 6:14, 15-ahˇ haw nya meh. (Gui.) Muiˬ-eu shawˇ-eu yaw sahˇ neh bi sheuˬ g’eh-eu tsawˇ haˬ shiˬ shaˬ jiˇ nui k’ahˇ mˇ-eu tsawˇ haˬ nehˬ-ehˇ beu gaˇ meh lehˇ Pawˇluꞈ maˇ jawˆ ni ehˇ taˬ-euˬ meh. Jaˇliꞈ zahˇ heu deuˆ oeˇ mˇ baˇ-eu aˇ gu tseˇ ngeh, aˬ joˆ-ehˇ caw ba nehˬ-eu nga?

16 Cawˬ tseˇ-eu gaˇ kawˆ. Jaˇliꞈ zahˇ 1 Gawˇliˬtu 15:33-ahˇ haw nya meh. (Gui.) Muiˬ-eu shawˇ-eu yaw sahˇ neh bi sheuˬ g’eh-eu tsawˇ haˬ, aˬ yawꞈ-euˬ nui jah-ahˇ laˆ cawˆ laˇ-eu deuˬ nehˬ-ehˇ cawˬ maˬ cawˬ taꞈ-a. Jaˇliꞈ zahˇ heu  nawˇ gaˇ kawˆ tiˬ jeˬ na-ahˇ ya noeˬ tsehˆ ngeh, aˬ joˆ-ehˇ zmˬ iˇ nya nga lehˇ shaˇ noeˬ haw sheˇ. Yaw jeˬ ma jeˬ, nawˇ iˇteuꞈnehꞈ zmˬ ngeh aˬ joˆ-ehˇ caw ba-eu nga? Nawˇ maˬ siˬ nya-eu tsawˇ haˬ nehˬ-ehˇ keˆ awˆlai niˇ g’a ma laˬ, lehˇ noeˬ tsehˆ ngeh, aˬ joˆ-ehˇ caw ba nehˬ-eu nga?

Ngaˇ noeˬ tsehˆ-eu jeˬ, muiˬ-eu shawˇ-eu yaw sahˇ neh bi sheuˬ g’eh-eu jeˬ pyeuꞈ ngaˇ laˬ? (Aˇ deuˆ 17-ahˇ haw)

17-19. Nawˇ Miˬyehˇ-euˬ yaw sahˇ neh bi sheuˬ g’eh naˇ, gaˇ kawˆ heu deuˬ-ahˇ aˬ joˆ-ehˇ caw ba-eu nga (a) gaˇ dahˇ maˬ tsoeˬ-eu mˇ jeˬ shaˇ kawˆ-ahˇ yahˇ-eu? (b) muiˬ-eu aˇ pyaˇ daˬ-eu (c) aˬ cawˬ nehˬ-ehˇ gaˇ kawˆ jaˆ-eu?

17 Miˬyehˇ nehˬ-ehˇ cawˬ cawˬ-eu jeˬ-ahˇ deuˬ laˇ-eu mˇ jeˬ shaˇ kawˆ. Heu kawˆ-ahˇ saˇ tiˇ biꞈ-eu Jaˇliꞈ zahˇ Heˬbyehˇ 6:1-ahˇ haw nya meh. (Gui.) Heu deuˆ-ahˇ haw ngeh, aˬ dui maˬ mˇ paˬ-ehˇ g’eh-eu “gaˇ dahˇ maˬ tsoeˬ-eu” aˬ geu jeˬ-ahˇ ya mawˇ leˬ? Mˇ jeˬ shaˇ kawˆ heu deuˬ naˇ, aˬ dui-ahˇ Miˬyehˇ nehˬ-ehˇ maˬ bi g’oeˇ dzehˬ leˇ-a. Jaˇliꞈ zahˇ heu deuˆ aˬ dui dehꞈ ziˇ laꞈ k’oeˇ pyeuꞈ laˇ-eu gaˇ kawˆ deuˬ-ahˇ dawˬ k’oꞈ biꞈ laꞈ-eu meh. Yaw jeˬ ma jeˬ, ‘Mˇ jeˬ shaˇ kawˆ heu hmˬ “gaˇ dahˇ maˬ tsoeˬ-eu” jeˬ pyeuꞈ ngaˇ laˬ? Ngaˇ gaˇ heu mˇ paˬ-ehˇ g’eh ngaˇ laˬ? Ngaˇ miˇ k’ahˬ-ahˇ laˆ paˇ-eu leh jeh-eu deuˬ-ahˇ aˬ jeˬ miˇ neh g’aˬ maˬ ya biꞈ-eu nga?’

Ngaˇ noeˬ tsehˆ-eu jeˬ, Miˬyehˇ gaˇ mˇ paw aˇ pyaˇ daˬ taˬ-eu jeˬ pyeuꞈ ngaˇ laˬ? (Aˇ deuˆ 18-ahˇ haw)

18 Miˬyehˇ-euˬ gaˇ mˇ-eu gaˇ kawˆ. Yeˬsuˇ gawˬ jawˬ k’oeˇ taˆ dawˬ mehˬ mehˬ ngeh, aˬ dui aˇ pyaˇ daˬ taˬ paˬ-ehˇ g’eh-eu gaˇ kawˆ mehˬ nehˬ-euˬ meh. (Maꞈtehˬ 6:33) Muiˬ-eu shawˇ-eu yaw sahˇ neh bi sheuˬ g’eh-eu tsawˇ haˬ naˇ, aˬ yawꞈ maꞈ-euˬ dehꞈ ziˇ laꞈ k’oeˇ Miˬyehˇ Miˇk’ahˬ gaˇ kawˆ-ahˇ naˬ ba tiꞈ taˬ-eu meh. Jaˇliꞈ zahˇ heu deuˆ aˬ dui gaˇ kawˆ heu-ahˇ noeˬ tsehˆ ngeh aˬ joˆ-ehˇ caw ba nehˬ-eu nga? Yaw jeˬ ma jeˬ, ‘Ngaˇ tseˇ nyiꞈ daˇ dzaw jiˇ ngeh, paˇ dzaw tawꞈ leꞈ paˇ-ehˇ g’eh ngaˇ laˬ? Ngaˇ gaˇ heu mˇ paˬ-ehˇ g’eh ngaˇ laˬ?’

Ngaˇ noeˬ tsehˆ-eu jeˬ, aˬ cawˬ nehˬ-ehˇ tsaˬ leˇ tsoeˇ leˇ-eu jeˬ pyeuꞈ ngaˇ laˬ? (Aˇ deuˆ 19-ahˇ haw)

19 Aˬ cawˬ nehˬ-ehˇ gaˇ kawˆ jaˆ ngeh. Pawˇluˆ neh Loˇmaˆ miˇ k’ahˬ-ahˇ jawˇ-eu Ka li zaˬ deuˬ-ahˇ mehˬ nehˬ-eu dawˬ, aˬ dui-ahˇ jiˇ caw ba nya-eu meh. (Loˇmaˆ 12:18) Aˬ dui Yeˬsuˇ-ahˇ dzaw geuꞈ naˇ, “yawˬ g’aˬ na luꞈ nehˬ-ehˇ tsaˬ leˇ ni” leh jeh-eu meh. Aˬ dui aˬ cawˬ nehˬ-ehˇ gaˇ kawˆ jaˆ ngeh aˬ joˆ-ehˇ jahˇ le? Aˬ cawˬ-ahˇ laꞈ oꞈ awꞈ nehˬ-eu yaw shaˬ nya lehˇ noe nya laˬ? Maˬ ngeuˇ naˇ, aˬ dui aˬ cawˬ nehˬ-ehˇ tsaˬ leˇ ni leh jeh-eu tsawˇ haˬ pyeuꞈ meh lehˇ aˬ cawˬ siˬ nya meh laˬ?—Yaˬkoˆ 3:18.

20. Aˬ dui aˬ jeˬ miˇ neh Miˬyehˇ neh ya bi sheuˬ g’eh nga?

20 Yaw jeˬ ma jeˬ heu deuˬ, Jaˇliꞈ zahˇ aˬdui-ahˇ yaw muiˬ-ehˇ noeˬ tsehˆ nya ni caw ba nehˬ ngaˇ lehˇ siˬ laˇ-awˇ, aˬ dui Miˬyehˇ-euˬ yaw sahˇ neh bi sheuˬ g’eh luꞈ-eu lehˇ mˇ mawˇ-eu jeˬ pyeuꞈ meh. Aˬ dui Miˬyehˇ neh bi sheuˬ g’eh-awˇ, aˬ yawꞈ nehˬ-ehˇ yaw g’oeˇ g’oeˇ lehˇ jawˇ naˇ, dehꞈ ziˇ laꞈ k’oeˇ laꞈ k’aˬ cehˇ nui saˇ oꞈ meh. Dahˬ beh ngeh ehˇ keuˆ taˬ-euˬ Loˇbeuꞈ ehˇ-eu, “Ngaˇ Miˬyehˇ nehˬ-ehˇ g’oeˇ dzehˬ laˇ ngeh, muiˬ-eu k’aˬ dzeˇ zaˬ hawˇ-eu muiˬ-eu aˬ da pyeuꞈ laˇ-euˬ ma. Nymˬ-mˇ ngaˬ-ahˇ maˇ diˇ laꞈ k’aˬ cehˇ nui saˇ oꞈ miˇ-a.” Aˬ dui k’aˇ g’eh nya gaˇ neh Miˬyehˇ neh bi sheuˬ g’eh naˇ, gaˇ dahˇ tsoeˬ-eu g’awˬ mya jeˬ-ahˇ za-awˇ, nymˬ-mˇ neh laꞈ k’aˬ cehˇ nui saˇ oꞈ-eu uˬ taꞈ, aˇ kaˇ mehˬ hu paw “maˇ maˇ ni g’eh-eu dehꞈ-eu jeˬ”-ahˇ za-eu meh.—1 Tiˆmoˇseˬ 6:19.