Skip to content

Skip to table of contents

Yeˬhawˇbaˬ-euˬ Saˇ kiˇ

Select language Akha

 Dzaw-eu gaˇ kawˆ 2

Bawˬ dzaˬ ngeh Yeˬhawˇbaˬ-ahˇ ja ceuˬ

Bawˬ dzaˬ ngeh Yeˬhawˇbaˬ-ahˇ ja ceuˬ

“Tsawˇ haˬ aˇ maꞈ bymˇ leˇ-euˬ gaˇ, nawˬ-ahˇ ngaˇ guˇ-awˇ ja ceuˬ ma.”—Ja ceuˬ 22:22.

Dawˬ caˇ 59 Ngaˬ nehˬ-ehˇ Yeˬhawˇbaˬ-ahˇ ja ceuˬ

Kawˆ shawˆ *

1. Daˬbiˇ Yeˬhawˇbaˬ-ahˇ aˬ joˆ-ehˇ noeˬ-eu nga? Heu aˬ yawꞈ-ahˇ aˬ jeˬ jahˇ ni laˆ noeˬ nehˬ-eu nga?

Sahˬ paˬ Daˬbiˇ ‘Yeˬhawˇbaˬ huiˬ dui mahˇ dui dui-awˇ, ja ceuˬ dui dui paˬ-ehˇ g’eh-eu meh’ lehˇ boꞈ taˬ-euˬ meh. (Ja ceuˬ 145:3) Daˬbiˇ Yeˬhawˇbaˬ-ahˇ gaˬ-eu miˇ neh, nui gaˬ heu naˇ aˬ yawꞈ-ahˇ “tsawˇ haˬ aˇ maꞈ bymˇ leˇ-euˬ gaˇ” Yeˬhawˇbaˬ-ahˇ ja ceuˬ ni laˆ noeˬ nehˬ-eu meh. (Ja ceuˬ 22:22; 40:5) Nawˇ jiˇ Yeˬhawˇbaˬ-ahˇ gaˬ-awˇ, Daˬbiˇ neh ‘Nga maꞈ-euˬ aˬ poeˬ Yaˬkoˆ-euˬ Miˬyehˇ pyeuꞈ-eu Yeˬhawˇbaˬ-oˇ, mˬ maˬ maˬ byaˆ zaˇ ziˇ nawˬ-ahˇ ja ceuˬ luꞈ-uˇ’ lehˇ ehˇ-euˬ dawˬ-ahˇ nui ma tsaˬ-eu yaw duˬ baw meh.—1 Laˬsaˬbaˬ 29:10-13.

2. (a) Aˬ dui Yeˬhawˇbaˬ-ahˇ aˬ joˆ-ehˇ ja ceuˬ nya-eu nga? (b) Tiˬ g’aˬ na aˬ joˆ-ehˇ noeˬ-eu nga, aˬ dui aˬ jeˬ-euˬ gaˇ kawˆ-ahˇ ja sawˇ-eu nga?

2 Nymˬ-mˇ iˬ nah aˬ dui Yeˬhawˇbaˬ-ahˇ ja ceuˬ nya-eu tiˬ jeˬ naˇ, Ka li zaˬ deuˬ bawˬ dzaˬ gaˇ nui noeˬ nui duˇ biꞈ-eu heu meh. Ehˇ k’awꞈ mehˇ nmˇ tiˬ deuˬ na heu loꞈ-ehˇ jahˇ-eu maˬ awˬ nya lehˇ ehˇ-awˇ, aˬ yawꞈ maꞈ dawˬ k’oꞈ biꞈ mawꞈ-eu k’awꞈ guˆ-eu meh. Toˆ-ehˇ naˇ, aˬ yawꞈ maꞈ maˬ guˆ paˬ-ehˇ aˬ joˆ-ehˇ ya jahˇ-eu nga? Aˬ dui yawˬ g’aˬ na luꞈ-ahˇ g’aˬ biꞈ-eu nui noeˬ nui duˇ biꞈ nya ni caw ba nehˬ-eu aˬ jeˬ nga? Dawˬ k’oꞈ heu-ahˇ maˬ haw mi naˆ-ehˇ, aˬ dui aˬ jeˬ miˇ neh bawˬ dzaˬ gaˇ nui noeˬ nui duˇ biꞈ paˬ-ehˇ g’eh-eu nga lehˇ ehˇ-eu gaˇ kawˆ 4 kawˆ-ahˇ ja sawˇ ma.

Aˬ dui bawˬ dzaˬ ngeh aˬ jeˬ miˇ neh nui noeˬ nui duˇ biꞈ paˬ-ehˇ g’eh-eu nga?

3-5. (a) Heˬbyehˇ 13:15-ahˇ ehˇ taˬ-euˬ loꞈ-ehˇ, aˬ dui bawˬ dzaˬ ngeh aˬ jeˬ miˇ neh nui noeˬ nui duˇ biꞈ paˬ-ehˇ g’eh-eu nga? (b) Aˬ dui yawˬ g’aˬ na luꞈ nui noeˬ nui duˇ aˬ yawˬ tiˬ jeˬ tehꞈ-ehˇ maˬ ngeuˇ naˇ, tiˬ kawˆ di ni ya biꞈ ngaˇ laˬ?

3 Yeˬhawˇbaˬ aˬ dui yawˬ g’aˬ na luꞈ-ahˇ aˬ yawꞈ-ahˇ bi ja ceuˬ-eu aˬ kawˬ-aˬ biꞈ. (Ja ceuˬ 119:108) Bawˬ dzaˬ ngeh nui noeˬ nui duˇ biꞈ-eu heu naˇ, “Miˬyehˇ-ahˇ ja ceuˬ-eu jeˬ lawˇ nehˬ”-eu tiˬ jeˬ pyeuꞈ-awˇ, aˬ dui tiˬ g’aˬ-iˬ maˬ mˇ dah nya-a. (Heˬbyehˇ 13:15-ahˇ gui.) Ehˇ k’awꞈ Yeˬhawˇbaˬ lawˇ-eu sehˇ-eu jeˬ aˬ yawꞈ tiˬ jeˬ tehꞈ-ehˇ lawˇ nehˬ gaˇ noeˬ tmˬ ngaˇ laˬ? Aˬ dui nui noeˬ nui duˇ aˬ yawˬ tiˬ jeˬ  tehꞈ-ehˇ maˬ ngeuˇ naˇ, tiˬ kawˆ di ni biꞈ gaˇ noeˬ tmˬ ngaˇ laˬ? Aˬ yawꞈ teu loꞈ-ehˇ maˬ noeˬ tmˬ-eu yaw duˬ baw meh.

4 Yeˬhawˇbaˬ aˬ dui yawˬ g’aˬ na luꞈ nya-eu jeˬ hawˇ-eu ya puˬ ya mawˇ-eu jeˬ beu gaˇ-eu lehˇ siˬ nya-awˇ, aˬ yawꞈ aˬ dui neh lawˇ nehˬ nya-eu jeˬ-ahˇ aˇ poeˬ taˬ baw-eu meh. Iˇsaˬleˬlaˆ deuˬ neh lawˇ nehˬ-euˬ jeˬ-ahˇ Miˬyehˇ ha geuꞈ-euˬ gaˇ shaˇ noeˬ haw sheˇ. Tiˬ g’aˬ na, yawˇ maˬ ngeuˇ naˇ ciꞈ myehꞈ lawˇ nehˬ nya k’awꞈ, iˇ shaˬ zaˬ deuˬ naˇ “k’aˬ k’oeˬ nyiˬ mawˇ, maˬ ngeuˇ naˇ, k’aˬ guˬ nyiˬ mawˇ” hawˇ-eu, ‘cehˇ meu tiˬ pehˬ’ lawˇ nehˬ nya meh. (Uˬduˬtahˬ-eu 5:7, 11) Cehˇ meu maˬ poeˬ k’awꞈ, muiˬ dui dui-eu “cehˇ meu” yaw nmˆ pyeuꞈ naˇ, Yeˬhawˇbaˬ aˬ yawꞈ maꞈ neh lawˇ-euˬ jeˬ-ahˇ aˇ poeˬ taˬ baw-eu meh.

5 Yeˬhawˇbaˬ nui ma muiˬ-eu Miˬyehˇ pyeuꞈ-awˇ, nymˬ-mˇ iˬ nah keuˆ ni teu loꞈ-ehˇ g’eh luꞈ-eu meh. Aˬ dui nui noeˬ nui duˇ biꞈ ngeh, Miˬyehˇ aˬ dui dawˬ ngehˬ-eu bym dui dui-eu Aˬpawˇluˆ loꞈ-ehˇ g’eh-awˇ, Pawˇluˆ naˆ ni yaw duˬ duˬ lehˇ dzawˇ nehˬ nya meh lehˇ maˬ noeˬ tmˬ-a. (G’aˬk’ehˇ 18:24; 19:8) Yeˬhawˇbaˬ aˬ dui k’aˇ g’eh nya gaˇ neh muiˬ dui dui-eu dawˬ k’oꞈ bi biꞈ mawꞈ-eu meh. Guiˬ shuiˇ maˇ byaˆ nyiˬ byaˆ damˬ nehˬ-euˬ miˬ coeˬ miˬ ma tiˬ g’aˬ-euˬ gaˇ kawˆ-ahˇ shaˇ noeˬ haw sheˇ. Aˬ yawꞈ k’aˇ g’eh nya gaˇ neh muiˬ dui dui-eu jeˬ damˬ nehˬ-euˬ miˇ neh, Yeˬhawˇbaˬ-euˬ mehˬ shi aˇ poeˬ baw-eu meh.—Luˇkaꞈ 21:1-4.

Nui noeˬ nui duˇ biꞈ-eu heu naˇ aˬ dui-ahˇ maˬ ehˇ, aˬ cawˬ-ahˇ maˬ ehˇ gaˇ dahˇ tsoeˬ (Aˇ deuˆ 6-7-ahˇ haw) *

6. (a) Heˬbyehˇ 10:24, 25-ahˇ ehˇ taˬ-euˬ loꞈ-ehˇ nui noeˬ nui duˇ aˬ dui-ahˇ aˬ joˆ-ehˇ bi g’eh laˇ-eu nga? (b) Aˬ dui aˬ cawˬ neh nui noeˬ nui duˇ biꞈ-euˬ jeˬ-ahˇ aˇ poeˬ taˬ baw-eu lehˇ aˬ joˆ-ehˇ bi siˬ nmˇ?

6 Nui noeˬ nui duˇ biꞈ-eu jeˬ, tiˬ g’aˬ tiˇ g’aˬ g’aˬ biꞈ-eu jeˬ pyeuꞈ. (Heˬbyehˇ 10:24, 25-ahˇ gui.) Aˬ dui bawˬ dzaˬ ngeh ya gaˬ-eu g’awˬ mya jeˬ lehˇ g’eh-eu nui noeˬ nui duˇ deuˬ-ahˇ aˇ poeˬ taˬ baw-eu ma. Aˬ dui zaˬ deuˬ neh nui ma laꞈ k’oeˇ neh yaw awˬ awˬ lehˇ dawˬ k’oꞈ biꞈ gaˇ ya leˇ-awˇ, yaw shuiꞈ shuiꞈ lehˇ g’eh-eu yaw tsaˬ yaw dawˇ-euˬ dawˬ k’oꞈ-ahˇ ya gaˬ ngeh jiˇ g’aˬ za laˇ-eu meh. Aˬ dui shaꞈ dawˇ deuˬ hawˇ-eu nymˬ-mˇ hawˇ-eu aˬ dui-euˬ dawˬ dzaw laˇ-euˬ deuˬ neh “k’aˬ duˬ ni” dawˬ k’oꞈ biꞈ-euˬ jeˬ-ahˇ ja ceuˬ ma. (1 Teˇsaˬloˇni 2:2, YS 97) Aˬ dui aˬ yawꞈ maꞈ neh leh jeh-euˬ jeˬ-ahˇ aˇ poeˬ taˬ baw-eu lehˇ aˬ joˆ-ehˇ bi siˬ nmˇ? Bi siˬ nya-eu tiˬ jeˬ naˇ, bawˬ dzaˬ g’aˬ ngeh guiˬ lahˬ huiˬ miˇ-a lehˇ ehˇ nehˬ-eu heu meh. Nyiˬ jeˬ aˬ yawꞈ jeˬ naˇ, aˬ dui dawˬ k’oꞈ biꞈ-eu heu meh. Teu miˇ neh aˬ dui bawˬ dzaˬ iˇ ngeh, aˬ dui g’aˬ za laˇ ni tehꞈ-ehˇ maˬ ngeuˇ-eu, aˬ cawˬ-ahˇ jiˇ g’aˬ ya biꞈ-eu meh.—Loˇmaˆ 1:11, 12.

7. Aˬ dui nui noeˬ nui duˇ biꞈ naˇ, aˬ joˆ-ehˇ gaˇ dahˇ tsoeˬ-eu nga?

7 Aˬ dui nui noeˬ nui duˇ biꞈ naˇ gaˇ dahˇ  tsoeˬ-eu jeˬ za. (Iˇsaˬyaˇ 48:17) Aˬ joˆ-ehˇ? Dahˬ beh-eu jeˬ, aˬ dui nui noeˬ nui duˇ biꞈ ma lehˇ noeˬ naˇ, yaw muiˬ-ehˇ lehˬ hmˬ-eu meh. Aˬ dui yaw muiˬ-ehˇ lehˬ hmˬ naˇ, Miˬyehˇ-euˬ dawˬ-ahˇ naꞈ suiˇ ni siˬ nya laˇ-awˇ, ngehˬ-ehˇ siˬ nya laˇ naˇ ngehˬ-ehˇ yaw muiˬ-ehˇ zmˬ iˇ nya-eu meh. Nyiˬ jeˬ aˬ yawꞈ jeˬ, aˬ dui jiˇ bawˬ dzaˬ gaˇ nui noeˬ nui duˇ ya biꞈ-euˬ miˇ neh laˬ k’aˬ cehˇ-eu meh. Smˇ jeˬ aˬ yawꞈ jeˬ naˇ, aˬ dui nui noeˬ nui duˇ biꞈ-eu g’aˇ duˬ ya leh jeh-euˬ miˇ neh, bawˬ dzaˬ g’aˬ-euˬ k’awꞈ, aˬ dui neh ngehˬ-euˬ jeˬ-ahˇ g’awˬ myahˇ ni noeˬ taˬ nya-eu meh.

8-9. (a) Maˬlaˬkiˇ 3:16-ahˇ ehˇ-eu loꞈ-ehˇ Yeˬhawˇbaˬ aˬ dui nui noeˬ nui duˇ biꞈ ngeh aˬ joˆ-ehˇ noeˬ-eu nga? (b) Tiˬ g’aˬ na aˬ joˆ-ehˇ g’eh luꞈ nga siˬ?

8 Aˬ dui-euˬ nui jah mˇ mawˇ ngeh Yeˬhawˇbaˬ nui k’ahˇ shiˇ. Yeˬhawˇbaˬ aˬ dui neh bawˬ dzaˬ gaˇ leh jeh-awˇ nui noeˬ nui duˇ biꞈ-euˬ jeˬ-ahˇ naˇ haˬ-awˇ aˇ poeˬ taˬ baw meh lehˇ, aˬ dui jah ziꞈ nya meh. (Maˬlaˬkiˇ 3:16-ahˇ gui.) Miˬyehˇ teu-ahˇ aˇ poeˬ taˬ baw-eu g’aˇ duˬ, aˬ dui neh aˬ yawꞈ nui k’ahˇ shiˇ ni leh jeh-awˇ mˇ-euˬ jeˬ-ahˇ guiˬ lahˬ biꞈ-eu meh.—Maˬlaˬkiˇ 3:10.

9 Heu gaˇ haw ngeh tiˬ jawˇ, aˬ dui aˬ jeˬ miˇ bawˬ dzaˬ ngeh nui noeˬ nui duˇ biꞈ paˬ-ehˇ g’eh-eu muiˬ-eu gaˇ kawˆ g’awˬ mya jeˬ-ahˇ ya mawˇ-euˬ ma. Ehˇ k’awꞈ, aˬ laꞈ maˬ baꞈ diˇ peuˬ-eu deuˬ jiˇ jawˇ-a siˬ. Nawˬ-ahˇ toˆ-ehˇ g’eh naˇ g’aˬ taˬ baˬ siˬ. Aˬ dui Jaˇliꞈ zahˇ tiˬ hmˬ na-ahˇ maˬ ehˇ, tiˬ g’aˬ na-euˬ gaˇ kawˆ-ahˇ maˬ ehˇ, bawˬ dzaˬ ngeh nui noeˬ nui duˇ biꞈ nya laˇ ni caw ba nehˬ-eu tiˬ jeˬ na-ahˇ maˬ ehˇ haw ma.

Guˆ-eu nui ma-ahˇ g’aˬ leˇ

10. (a) Aˬ dui g’awˬ mya g’aˬ aˬ jeˬ-ahˇ guˆ-eu nga? (b) Nawˇ dawˬ k’oꞈ maˬ biꞈ peuˬ-eu teu naˇ aˬ jeˬ baˬ daˬ pyeuꞈ nya-eu nga?

10 Nawˇ dawˬ k’oꞈ biꞈ-eu g’aˇ duˬ aˬ laꞈ baꞈ diˇ-eu tehꞈ k’awꞈ yaw dzuˬ dzuˬ miˇ-a loˇ? Dzuˬ naˇ, nawˇ tiˬ g’aˬ tehꞈ maˬ ngeuˇ-a. Maˇ diˇ naˇ aˬ dui myaˬ tiˬ paˆ dawˬ k’oꞈ biꞈ ngeh toˆ-ehˇ g’eh meh. Teu-ahˇ g’aˬ leˇ-eu g’aˇ duˬ, aˬ dui aˬ jeˬ miˇ neh guˆ-eu gaˇ kawˆ-ahˇ jeˬ hu ya siˬ nya-eu meh. Nawˇ dawˬ k’oꞈ maˬ biꞈ peuˬ-eu teu naˇ, dawˬ k’oꞈ-ahˇ ngehˇ gaˇ hawˇ-eu ngehˬ bahˬ gaˇ guˆ-eu miˇ neh de laˬ? Maˬ ngeuˇ naˇ, aˬ cawˬ loꞈ-ehˇ yaw muiˬ muiˬ lehˇ maˬ biꞈ nya nya lehˇ guˆ-eu miˇ neh de laˬ? Tiˬ poˆ na teu loꞈ-ehˇ guˆ-eu k’awꞈ yaw muiˬ meh. Teu naˇ, nawˇ taˬ aw-awˇ, aˬ cawˬ deuˬ yawˬ ha naˆ  maˬ tseˇ muiˬ meh lehˇ haw-eu miˇ neh, toˆ-ehˇ g’eh gaˇ Yeˬhawˇbaˬ k’awꞈ ya leˇ-eu meh. (Ja ceuˬ 138:6; Piˇliˇpiˆ 2:3) Ehˇ k’awꞈ Yeˬhawˇbaˬ nawˬ-ahˇ aˬ yawꞈ-ahˇ bi ja ceuˬ mawꞈ-awˇ, bawˬ dzaˬ gaˇ jawˇ luꞈ-eu mehˇ nmˇ deuˬ-ahˇ k’awꞈ g’aˬ bi biꞈ mawꞈ-eu meh. (1 Teˇsaˬloˇni 5:11) Aˬ yawꞈ nawˬ-ahˇ gaˬ-awˇ loˬ-eu nui k’aˬ biꞈ nehˬ laꞈ-eu meh.

11. Jaˇliꞈ aˬ dui-ahˇ aˬ jeˬ saˇ tiˇ biꞈ-eu nga?

11 Jaˇliꞈ laꞈ k’oeˇ-euˬ saˇ tiˇ dawˬ tiˬ hmˬ na-ahˇ shaˇ noeˬ haw sheˇ. Jaˇliꞈ-ahˇ aˬ dui yawˬ g’aˬ na luꞈ ngehˬ-eu dawˬ hawˇ-eu ngehˬ jeˬ ngehˬ kawˆ neh mˇ lehˬ nya meh lehˇ ehˇ taˬ-euˬ meh. (Yaˬkoˆ 3:2) Ehˇ k’awꞈ Yeˬhawˇbaˬ aˬ dui byah kuꞈ-eu gaˇ maˬ noeˬ tmˬ-eu loꞈ-ehˇ, mehˇ nmˇ deuˬ jiˇ aˬ dui-ahˇ toˆ-ehˇ maˬ noeˬ tmˬ-a. (Ja ceuˬ 103:12-14) Aˬ yawꞈ maꞈ aˬ dui-euˬ nymˇ jiˇ pyeuꞈ-awˇ, aˬ dui-ahˇ gaˬ-eu meh. (Maˬkuˆ 10:29, 30; Yoˇhaˬ 13:35) Tiˬ poˆ na aˬ dui neh biꞈ-euˬ nui noeˬ nui duˇ yaw k’aˆ-ehˇ maˬ ngeuˇ leˇ-euˬ k’awꞈ, aˬ yawꞈ maꞈ g’oˆ shaw nehˬ laꞈ-eu meh.

12-13. Aˬ dui Neˬhaˬmiˇ hawˇ-eu Yawˇnaˆ-euˬ gaˇ kawˆ-ahˇ neh aˬ jeˬ ya siˬ-euˬ nga?

12 Nawˇ dawˬ k’oꞈ maˬ biꞈ peuˬ naˇ, Jaˇliꞈ laꞈ k’oeˇ-euˬ tiˬ g’aˬ na-euˬ gaˇ kawˆ-ahˇ shaˇ noeˬ haw. Neˬhaˬmiˇ naˇ, baoˬ huiˬ dui dui-eu sahˬ paˬ tiˬ g’aˬ-euˬ nymˇ hawˇ-ahˇ gaˇ mˇ-awˇ, Yeˬluˇsaˬlehˬ meuˬ-euˬ meuˬ lahˇ hawˇ-eu laˇ g’oˆ deuˬ byaˆ iˇ taˬ-euˬ gaˇ kawˆ-ahˇ ya gaˬ ngeh nui ma cawˆ-eu meh. (Neˬhaˬmiˇ 1:1-4) Shaˇ noeˬ haw sheˇ, nawˇ aˬ jeˬ miˇ nui ma cawˆ luꞈ de lehˇ sahˬ paˬ naˇ haˬ ngeh, aˬ yawꞈ aˇ naˆ ni yaw dzuˬ dzuˬ paˬ nga. Teu ngeh aˬ yawꞈ guiˬ lahˬ kawˇ ma-ehˇ shaˬ-awˇ, sahˬ paˬ-ahˇ dawˬ k’oꞈ biꞈ nehˬ-eu meh. Dawˬ k’oꞈ teu baˬ da neh, Miˬyehˇ-euˬ tsawˇ haˬ deuˬ g’aˇ duˬ sahˬ paˬ g’awˬ mya jeˬ mˇ nehˬ-euˬ meh. (Neˬhaˬmiˇ 2:1-8) K’oeˇ naˇ Yawˇnaˆ-euˬ gaˇ kawˆ-ahˇ jiˇ shaˇ noeˬ haw sheˇ. Miˬyehˇ aˬ yawꞈ-ahˇ Niˇnaˬbeˬ meuˬ-ahˇ bi iˇ ngeh aˬ yawꞈ guˆ dui dui-eu miˇ neh yawˬ paw yawˬ cehˆ-euˬ meh. (Yawˇnaˆ 1:1-3) Ehˇ k’awꞈ Yeˬhawˇbaˬ aˬ yawꞈ-ahˇ caw ba nehˬ-euˬ miˇ neh, aˬ yawꞈ gaˇ mˇ luiˆ nya-euˬ meh. K’oeˇ naˇ, aˬ yawꞈ neh ngehˬ-euˬ dawˬ teu jiˇ Niˇnaˬbeˬ meuˬ zaˬ deuˬ-ahˇ buˬ-iˇ ni caw ba nehˬ-euˬ meh. (Yawˇnaˆ 3:5-10) Heu nyiˬ g’aˬ-euˬ gaˇ kawˆ-ahˇ neh aˬ dui aˬ jeˬ dzaw geuꞈ nya-eu nga? Neˬhaˬmiˇ gaˇ kawˆ-ahˇ neh dzaw geuꞈ nya-eu jeˬ naˇ, aˬ dui dawˬ k’oꞈ maˬ biꞈ mi naˆ-ehˇ guiˬ lahˬ shaˇ-eu heu aˇ yeˇ huiˬ-eu jeˬ pyeuꞈ-awˇ, Yawˇnaˆ-euˬ gaˇ kawˆ-ahˇ neh naˇ, aˬ dui aˇ naˆ ni guˆ k’awꞈ Yeˬhawˇbaˬ aˬ dui-ahˇ aˬ yawꞈ-euˬ gaˇ mˇ nya ni caw nehˬ nya ngaˇ lehˇ ya siˬ-euˬ ma. Maˇ diˇ naˇ aˇ muˇ laꞈ k’oeˇ Niˇnaˬbeˬ meuˬ zaˬ loꞈ-ehˇ guˆ laˇ paˬ-ehˇ g’eh-eu mehˇ nmˇ tiˬ g’aˬ-iˬ maˬ jawˇ-eu maˬ ngeuˇ-a laˬ?

13 Nawˬ-ahˇ bawˬ dzaˬ gaˇ g’aˬ za laˇ paˬ-ehˇ g’eh-eu nui noeˬ nui duˇ biꞈ nya ni caw ba nehˬ-eu aˬ jeˬ jeˇ nga? Aˬ dui nui noeˬ nui duˇ tiˬ jeˬ na-ahˇ haw kaˇ-euˇ.

14. Aˬ dui aˬ jeˬ miˇ neh mehˬ bawˬ g’aˇ duˬ, yaw muiˬ-ehˇ ya lehˬ hmˬ-eu nga? Aˬ dui aˬ geu ngeh neh lehˬ hmˬ nya-eu nga?

14 Bawˬ dzaˬ-eu g’aˇ duˬ yawˬ poˆ na luꞈ lehˬ hmˬ. Nawˇ maˬ keuˆ laˇ mi naˆ-ehˇ yaw muiˬ-ehˇ lehˬ hmˬ taˬ naˇ, nui noeˬ nui duˇ yaw muiˬ-ehˇ biꞈ nya meh. (Dawˬdaˬ 21:5) Aˬ dui yawˬ g’aˬ na luꞈ aˇ yamˬ biˇ taˬ-eu maˬ duˇ leˇ-a. 80 k’oꞈ k’awˆ laˇ-euˬ miˬ coeˬ miˬ ma pyeuꞈ-eu Ehˇloiˆ-suiꞈ, Loꞈ-eu nymˇgoˇ jawˇ nah dzeuˇ tiˬ nah nyiˬ nah-ahˇ  neh lehˬ hmˬ taˬ-eu ma lehˇ ehˇ-awˇ, “Aˇ cuiˆ yaw naꞈ-ehˇ g’eh ngeh neh lehˬ hmˬ taˬ naˇ, bawˬ dzaˬ ngeh laˬ k’aˬ cehˬ dzehˬ nya” lehˇ ehˇ-eu meh. Aˇ yamˬ tiˬ byah ni gaˇ mˇ-awˇ Loꞈ-eu nymˇgoˇ jawˇ nah dzeuˇ k’oꞈ nah-ahˇ lehˬ hmˬ-eu Jaw-iˬ jiˇ, “Bawˬ dzaˬ-eu keuˆ laˇ-awˇ neh tehꞈ-ehˇ lehˬ hmˬ naˇ, ngaˬ-ahˇ noeˬ taˬ nya dzehˬ nya” lehˇ ehˇ-eu meh. Gaˇ myaˬ-eu sheuˬ g’eh-eu g’aˬ pyeuꞈ-awˇ huˬ mehˬ mehˬ-eu Aiˇ-keuˬ “Ngaˬ-ahˇ naˇ tiˬ poˆ tehꞈ-ehˇ maˬ lehˬ hmˬ jiˇ ni, tiˬ jaw laꞈ k’oeˇ tiˬ poˆ cuiˆ cuiˆ-ehˇ lehˬ hmˬ-eu heu muiˬ dzehˬ nya” lehˇ ehˇ-eu meh.

15. Mehˬ bawˬ g’aˇ duˬ yaw muiˬ-ehˇ lehˬ hmˬ nya ni nawˇ aˬ jeˬ jeˇ ya jahˇ-eu nga?

15 Mehˬ bawˬ g’aˇ duˬ yaw muiˬ-ehˇ lehˬ hmˬ mawꞈ naˇ, nawˇ aˬ jeˬ jeˇ ya jahˇ-eu nga? Nawˇ yawˬ poˆ na luꞈ dahˬ beh ngeh Yeˬhawˇbaˬ-euˬ muiˬ-eu shawˇ-eu yaw sahˇ shaˇ paˬ-ehˇ g’eh-eu meh. (Luˇkaꞈ 11:13; 1 Yoˇhaˬ 5:14) K’oeˇ naˇ, aˇ yamˬ cuiˆ zmˬ-awˇ gaˇ kawˆ uˬ dzah, uˬ dzah zaˬ, aˇ baˇ deuˬ, oeˬ coeˇ oeˬ bawˬ, heu deuˬ-ahˇ kawˆ shawˆ-ehˇ haw. K’oeˇ naˇ nawˇ tiˬ deuˆ saˇ-i tiˬ deuˆ gui ngeh, k’aˇ g’eh nya gaˇ neh Jaˇliꞈ aˇ deuˆ deuˬ-ahˇ gui-awˇ, nawˇ nui noeˬ nui duˇ biꞈ lehˇ g’eh-eu tsahˇ-ahˇ yaw muiˬ-ehˇ haw. Ngehˬ-ehˇ lehˬ hmˬ muiˬ naˇ ngehˬ-ehˇ gaˇ dahˇ tsoeˬ-awˇ dawˬ k’oꞈ biꞈ-eu jiˇ yaw awˬ meh.—2 Gawˇliˬtu 9:6.

16. Aˬ dui mehˬ bawˬ g’aˇ duˬ lehˬ hmˬ gaˇ caw ba nehˬ-eu aˬ jeˬ jeˇ-euˬ keu ka jaˆ-eu nga? Nawˇ aˬ joˆ-ehˇ zmˬ de?

16 Nawˬ-ahˇ yehꞈ-eu dawˬ neh jaˆ-eu keu ka deuˬ-ahˇ zmˬ. Yeˬhawˇbaˬ aˬ dui-ahˇ mehˬ bawˬ g’aˇ duˬ lehˬ hmˬ nya ni, aˇ maꞈ aˇ muˇ-ahˇ neh keu ka g’awˬ mya jeˬ biꞈ nehˬ taˬ-euˬ meh. JW Laiˇbaˬliˬ ehˆ heu naˇ, aˬ dui dzaw-eu gaˇ kawˆ deuˬ, tehˇbehˬ-lehꞈ hawˇ-eu naˬ gaˬ-ahˇ daoˇloˆ ahˇ nya ni caw ba nehˬ-eu meh. Heu naˇ aˬ dui aˬ geu gaˇ jawˇ ngeh maˬ kaˬ, lehˬ hmˬ nya ni, gui nya ni, naˇ haˬ nya ni caw ba nehˬ-eu meh. Tiˬ deuˬ na keu ka heu-ahˇ zmˬ-awˇ, gaˇ mˇ duˬ-ahˇ maˬ ehˇ, sahˬ boꞈ dzaw nymˇ-ahˇ maˬ ehˇ, nah g’ahˇ hawˬ dzaˬ ngeh lehˬ hmˬ-awˇ, tiˬ deuˬ na naˇ gaˇ ma doˆ-iˇ ngeh lehˬ hmˬ-eu meh. G’awˇ-ciˬtaoˬbeuˇ Laiˇbaˬliˬ hawˇ-eu G’awˇ-ciˬtaoˬbeuˇ awˆlai Laiˇbaˬliˬ heu naˇ, aˬ dui siˬ duˬ mawꞈ-eu gaˇ kawˆ deuˬ-ahˇ yaw awˬ-ehˇ poˆ mawˇ nya ni caw ba nehˬ-eu meh.

Mehˬ bawˬ g’aˇ duˬ nawˇ aˬ geu ngeh lehˬ hmˬ de? (Aˇ deuˆ 14-16-ahˇ haw) *

17. (a) Dawˬ k’oꞈ g’awˬ mya hmˬ lehˬ hmˬ taˬ-eu aˬ jeˬ miˇ neh muiˬ-eu nga? (b) Yeˬhawˇbaˬ nehˬ-ehˇ cawˬ cawˬ laˇ—Bawˬ dzaˬ ngeh, yaw muiˬ-ehˇ naˇ haˬ lehˇ ehˇ-eu biˬdiˬoˬ-ahˇ neh aˬ jeˬ ya dzaw geuꞈ-eu nga?

17 G’eh nya naˇ nui noeˬ nui duˇ biꞈ-eu g’aˇ duˬ, yaw myaˬ tsahˇ lehˬ hmˬ taˬ. Aˬ jeˬ miˇ neh? Aˬ jeˬ miˇ neh ehˇ naˇ, aˬ dui aˬ laꞈ k’aˇ baꞈ diˇ ngeh kuˇ laˇ-eu maˬ ngeuˇ-a, aˬ cawˬ deuˬ k’awꞈ baꞈ diˇ-eu miˇ neh. K’oeˇ naˇ, sheuˬ g’eh-eu g’aˬ aˇ yamˬ laꞈ k’oeˇ mˇ jiˇ nya-eu g’aˇ duˬ, tiˬ deuˆ laꞈ k’oeˇ aˇ myaˆ g’aˬ-ahˇ tehꞈ-ehˇ kuˇ-eu lehˇ laˆ bawˬ taˬ-eu k’awꞈ pyeuꞈ nya meh. Teu miˇ neh nawˬ-ahˇ dahˬ beh ngeh maˬ kuˇ nga lehˇ nui ma taˬ pehˇ, g’aˬ taˬ baˬ siˬ. Nawˇ dawˬ k’oꞈ g’awˬ mya hmˬ lehˬ hmˬ taˬ naˇ, dawˬ k’oꞈ ya biꞈ-eu yaw duˬ baw meh. Nawˇ dawˬ k’oꞈ lehˬ hmˬ ngeh, Jaˇliꞈ aˇ deuˆ gui-eu g’aˇ duˬ lehˬ hmˬ-eu k’awꞈ pyeuꞈ nya-awˇ, g’eh nya naˇ yawˬ ha-euˬ dawˬ neh dawˬ k’oꞈ biꞈ. *

18. Aˬ jeˬ miˇ neh dawˬ k’oꞈ yaw nymˇ nymˇ lehˇ ya biꞈ-eu nga?

 18 Dawˬ k’oꞈ yaw nymˇ nymˇ lehˇ biꞈ. G’aˬ za laˇ-eu dawˬ k’oꞈ naˇ, yaw nymˇ yaw awˬ awˬ lehˇ g’eh-eu dawˬ k’oꞈ pyeuꞈ meh. Teu miˇ neh yaw nymˇ nymˇ lehˇ tiˬ peu-ahˇ maˬ keuˆ leˇ ni tiˬ peu-euˬ tiˬ paˆ tehꞈ-ehˇ dawˬ k’oꞈ biꞈ nya ni leh jeh. (Dawˬdaˬ 10:19; 15:23) Nawˇ dawˬ k’oꞈ biꞈ laꞈ-euˬ yaw myaˬ k’oꞈ byah laˇ-euˬ naˇ, yaw nymˇ nymˇ lehˇ aˬ cawˬ dzaw geuꞈ nya ni mˇ mehˬ nehˬ-eu aˇ yeˇ huiˬ meh. Nawˇ dawˬ k’oꞈ yaw kaꞈ yaw siˇ-ehˇ g’awˬ mya peu biꞈ naˇ, aˬ cawˬ deuˬ nawˇ loꞈ-ehˇ maˬ jahˇ nya nya lehˇ noeˬ-eu miˇ neh dawˬ k’oꞈ maˬ biꞈ peuˬ ni k’awꞈ pyeuꞈ nya meh. Yaw nymˇ nymˇ lehˇ dawˬ k’oꞈ biꞈ-eu heu naˇ, yaw myaˬ g’aˬ dawˬ k’oꞈ biꞈ-eu doˆ laˇ-awˇ, nawˬ-ahˇ kuˇ dahˬ beh laˇ naˇ ngehˬ-ehˇ dzehˬ, yaw awˬ awˬ lehˇ k’aˇ naˇ haˬ-euˬ loꞈ-ehˇ tehꞈ-ehˇ ya biꞈ-eu meh. Aˇ deuˆ laꞈ k’oeˇ-euˬ yaw tsahˇ na luꞈ-ahˇ ngehˬ keuˆ-eu lehˇ maˬ ya g’eh-a. Aˬ cawˬ deuˬ aˇ yeˇ huiˬ-eu tsahˇ-ahˇ ngehˬ dzeuˇ-euˬ naˇ, nawˇ k’awꞈ ngehˬ lahˬ nya meh.—“ Ngaˇ aˬ jeˬ jeˇ nui noeˬ nui duˇ biꞈ nya-eu nga?” lehˇ ehˇ-eu oeˬ coeˇ oeˬ bawˬ-ahˇ haw.

19. Sheuˬ g’eh-eu g’aˬ nawˇ dawˬ k’oꞈ biꞈ nya ni aˬ joˆ-ehˇ caw ba nehˬ-eu nga? Ehˇ k’awꞈ, nawˇ aˬ jeˬ ya jahˇ-eu nga?

19 Nawˇ aˬ geu deuˆ-ahˇ dawˬ k’oꞈ biꞈ mawꞈ nya lehˇ sheuˬ g’eh-eu g’aˬ-ahˇ ehˇ nehˬ. Nawˇ heu loꞈ-ehˇ jahˇ mawꞈ naˇ, bawˬ dzaˬ dahˬ maˬ beh laˇ mi naˆ-ehˇ sheuˬ g’eh-eu g’aˬ-ahˇ ehˇ nehˬ taˬ paˬ-ehˇ g’eh-eu meh. K’oeˇ naˇ nawˇ dawˬ k’oꞈ biꞈ-eu deuˆ-ahˇ iˇ keuˆ ngeh, sheuˬ g’eh-eu g’aˬ mawˇ nya paˬ-ehˇ yaw kawˇ kawˇ ma-ehˇ aˬ laꞈ yaw goˇ goˇ lehˇ baꞈ diˇ.

20. Mehˬ bawˬ cawˬ nehˬ-ehˇ hawˬ dzaˬ-euˬ loꞈ-ehˇ aˬ joˆ-ehˇ duˇ leˇ-eu nga?

20 Nawˇ mehˬ bawˬ-ahˇ cawˬ nehˬ-ehˇ hawˬ dzaˬ taꞈ-eu loꞈ-ehˇ haw. Nawˬ-euˬ aˇ muˇ laꞈ k’oeˇ-euˬ cawˬ hawˬ dzaˬ taˬ gaˇ nawˬ-ahˇ g’awˬ nyoeˇ ui cuiˆ na yuˇ leꞈ lehˇ ehˇ naˇ nawˇ aˬ joˆ-ehˇ jahˇ de? Nawˇ ui cuiˆ na k’ahˬ lahˇ nya meh. Ehˇ k’awꞈ yawˬ g’aˬ na luꞈ bi ya leˇ-eu g’aˇ duˬ, nawˇ k’aˇ jahˇ kuiˇ nya-eu jahˇ-awˇ yuˇ leꞈ tehꞈ-a. Yeˬhawˇbaˬ nymˇ sahˇ pyeuꞈ-awˇ, mehˬ bawˬ-ahˇ hawˬ jeh k’oeˇ taꞈ dzaˇ tiˬ byah ni lehˬ hmˬ nehˬ taˬ-euˬ meh. (Ja ceuˬ 23:5; Maꞈtehˬ 24:45) Aˬ dui k’aˇ g’eh nya gaˇ neh muiˬ-eu jeˬ biꞈ gaˇ Miˬyehˇ nui k’ahˇ shiˇ-eu meh. Teu miˇ neh mehˬ bawˬ g’aˇ duˬ yaw muiˬ-ehˇ lehˬ hmˬ leꞈ-awˇ, k’aˇ g’eh nya gaˇ neh dawˬ k’oꞈ biꞈ. Toˆ-ehˇ jahˇ naˇ, nawˇ Yeˬhawˇba-euˬ hawˬ jeh-ahˇ dzaˬ le-euˬ tehꞈ-ehˇ maˬ ngeuˇ-eu, aˇ muˇ laꞈ k’oeˇ-euˬ mehˇ nmˇ deuˬ-ahˇ jiˇ yaw muiˬ jeˬ biꞈ nehˬ le-euˬ meh.

Dawˬ caˇ 2 Nawˬ-euˬ tsawˇ myahˇ Yeˬhawˇbaˬ

^ Yaw zaˬ 5 Ja ceuˬ sahˬ boꞈ boꞈ-euˬ Daˬbiˇ loꞈ-ehˇ duˇ ni, aˬ dui yawˬ g’aˬ na luꞈ Yeˬhawˇbaˬ-ahˇ gaˬ-awˇ aˬ yawꞈ-ahˇ ya ja ceuˬ-eu laˬ k’aˬ cehˇ-eu meh. Aˬ dui Miˬyehˇ-ahˇ uˬ duˬ tahˬ-eu g’aˇ duˬ bawˬ dzaˬ gaˇ iˇ ngeh, aˬ yawꞈ-ahˇ gaˬ-eu lehˇ mˇ mawˇ-eu muiˬ dui dui-eu aˇ yamˬ jaˆ-eu ma. Ehˇ k’awꞈ tiˬ g’aˬ na bawˬ dzaˬ gaˇ nui noeˬ nui duˇ biꞈ-eu yaw shaˬ nya lehˇ noeˬ-eu meh. Nawˇ toˆ-ehˇ g’eh-eu tiˬ g’aˬ naˇ, heu kawˆ laꞈ k’oeˇ nawˇ aˬ jeˬ miˇ neh nui noeˬ nui duˇ maˬ biꞈ peuˬ-eu lehˇ bi siˬ laꞈ-awˇ, nui noeˬ teu-ahˇ aˬ joˆ-ehˇ g’aˬ leˇ nya nga lehˇ jiˇ siˬ laˇ ni caw ba nehˬ-eu meh.

^ Yaw zaˬ 17 Yeˬhawˇbaˬ nehˬ-ehˇ cawˬ cawˬ laˇ—Bawˬ dzaˬ ngeh, yaw muiˬ-ehˇ naˇ haˬ lehˇ ehˇ-eu biˬdiˬoˬ, Jaˇliꞈ mehˬ-eu jeˬ > Zaˬ deuˬ lehˇ boꞈ taˬ-euˬ gaˇ haw.

^ Yaw zaˬ 63 Aˇ baˇ-euˬ gaˇ kawˆ: Aˇ muˇ tiˬ muˇ-euˬ mehˇ nmˇ deuˬ Loꞈ-eu nymˇgoˇ ja sawˇ gaˇ laˬ k’aˬ cehˇ luꞈ.

^ Yaw zaˬ 65 Aˇ baˇ-euˬ gaˇ kawˆ: Aˇ muˇ teu muˇ-euˬ mehˇ nmˇ deuˬ, aˬ yawꞈ maꞈ-euˬ dah-eu aˇ yamˬ maˬ duˇ leˇ k’awꞈ mehˬ bawˬ g’aˇ duˬ, Loꞈ-eu nymˇgoˇ jeˬ hu lehˬ hmˬ luꞈ.