Skip to content

Skip to table of contents

Yeˬhawˇbaˬ-euˬ Saˇ kiˇ

Select language Akha

Yeˬhawˇbaˬ aˬ dui neh “Aˬmiˬ” lehˇ ehˇ-euˬ dawˬ-ahˇ aˇ poeˬ taˬ baw

Yeˬhawˇbaˬ aˬ dui neh “Aˬmiˬ” lehˇ ehˇ-euˬ dawˬ-ahˇ aˇ poeˬ taˬ baw

Yeˬhawˇbaˬ aˬ dui neh uˬ duˬ tahˬ-eu jeˬ-ahˇ aˇ poeˬ taˬ baw-awˇ, aˬ yawꞈ-euˬ gaˇ mˇ zaˬ deuˬ ngehˬ-eu dawˬ-awˇ naˇ haˬ-eu meh. Miˬyehˇ aˬ dui neh aˬ yawꞈ-euˬ g’aˇ duˬ ui cuiˆ na tehꞈ-ehˇ mˇ nehˬ-euˬ jeˬ-ahˇ k’awꞈ, aˇ poeˬ taˬ baw-eu meh. (Maˬlaˬkiˇ 3:16) Yaw jeˬ ma jeˬ, aˬ dui tiˬ k’ehˬ maˬ taˬ ngehˬ-eu dawˬ tiˬ dawˬ-ahˇ shaˇ noeˬ haw sheˇ. Dawˬ teu naˇ “aˬmiˬ” lehˇ ehˇ-eu dawˬ pyeuꞈ meh. Yeˬhawˇbaˬ yaw nymˇ nymˇ lehˇ g’eh-eu dawˬ heu dawˬ-ahˇ aˇ poeˬ taˬ baw ngaˇ loˇ? Taˬ baw-eu yaw duˬ baw meh. Aˬ jeˬ miˇ neh nga lehˇ siˬ nya-eu g’aˇ duˬ, aˬ dui teu dawˬ aˬ jeˬ-ahˇ ehˇ mawꞈ-awˇ, Jaˇliꞈ laꞈ k’oeˇ aˬ joˆ-ehˇ zmˬ taˬ-euˬ nga lehˇ haw ma.

“Tsawˇ haˬ dawˬ tawˆ luꞈ, ‘Aˬmiˬ’ lehˇ ya ehˇ k’oꞈ meh”

Aˬmiˬ lehˇ ehˇ-eu heu naˇ, “teu loꞈ-ehˇ pyeuꞈ luꞈ-uˇ” maˬ ngeuˇ naˇ, “maˇ maˇ ni” lehˇ ehˇ mawꞈ-eu meh. Dawˬ heu dawˬ Heˬbyehˇ dawˬ pyeuꞈ-awˇ, “saˇ jaˇ ziꞈ-eu”, “nui ma taˬ nya-eu” lehˇ ehˇ mawꞈ-eu meh. Tiˬ poˆ na dawˬ heu dawˬ-ahˇ zahˇ sahˇ k’oꞈ nehˬ-ehˇ taꞈ leˇ-awˇ neh jiˇ zmˬ-eu meh. Tiˬ g’aˬ na kamˬ-eu dawˬ ngehˬ g’aˬ naˇ, aˬ yawꞈ neh ngehˬ-euˬ teu maˇ maˇ ni ngeuˇ-awˇ, teu baˬ da neh pyeuꞈ laˇ-eu jeˬ-ahˇ laꞈ daˬ ma lehˇ bi siˬ-eu g’aˇ duˬ, “aˬmiˬ” lehˇ ehˇ-eu meh. (Bawˇtsahˬ 5:22) Aˬ yawꞈ aˬ cawˬ-euˬ mehˬ shi ehˇ ngeh ngehˬ-ehˇ dzehˬ, ehˇ-euˬ loꞈ-ehˇ ya bi jaˆ-eu meh.—Neˬhaˬmiˇ 5:13.

Dawˬmehˬmehˬ-eu yaw huiˬ 27-ahˇ “aˬmiˬ” heu dawˬ-euˬ gaˇ kawˆ mawˇ duˬ laˇ-eu meh. Iˇsaˬleˬlaˆ deuˬ Miˬyehˇ neh Saˇ jaˇ dzaˬ taˬ-euˬ Miˇ k’ahˬ-ahˇ ahˇ leˇ g’aˬ naˇ, Moˇseˬ-euˬ Zahˇ dawˬ-ahˇ naˇ haˬ le-eu g’aˇ duˬ, Eˇbaˬlaˇ hawˇ-eu Geˬlaˬzmˬ Gawˬ jawˬ yaw kaˬ-ahˇ uiˬ laˇ-euˬ meh. Aˬ yawꞈ maꞈ Zahˇ dawˬ-ahˇ naˇ haˬ le-euˬ tehꞈ maˬ ngeuˇ-a, laꞈ daˬ-eu lehˇ bi siˬ-eu g’aˇ duˬ jiˇ meh. Aˬ yawꞈ maꞈ ehˇ dawˬ maˬ naˇ haˬ-euˬ baˬ da neh pyeuꞈ laˇ-euˬ jeˬ-ahˇ ya gaˬ g’aˬ ngeh, “Aˬmiˬ” lehˇ ehˇ-eu meh. (Dawˬmehˬmehˬ-eu 27:15-26) Tsawˇ k’aˆ maˬ ehˇ, zaˬ maˬ ehˇ, yaw myaˬ lam g’aˬ uiˬ laˇ-awˇ “Aˬmiˬ” lehˇ ehˇ-eu teˇ saˇ-ahˇ shaˇ noeˬ haw sheˇ, aˇ naˆ ni k’aˆ paˬ nga. (Yawˇshuˆ 8:30-35) Aˬ yawꞈ maꞈ teu ngeh nah ehˇ-euˬ dawˬ-ahˇ maˬ ngehˇ leˇ coeˇ-eu yaw duˬ baw-awˇ, aˬ yawꞈ maꞈ neh saˇ jaˇ dzaˬ taˬ-euˬ loꞈ-ehˇ mˇ-euˬ meh. ‘Yawˇshuˆ yaw dehꞈ k’aˇ dehꞈ k’oeˇ keuˆ ni, Iˇsaˬleˬlaˆ deuˬ Sahˬpaˬ Miˬyehˇ-ahˇ uˬ duˬ tahˬ-euˬ meh. Aˬ yawꞈ shiˇ dzeuˇ ngeh k’awꞈ, Iˇsaˬleˬlaˆ deuˬ g’aˇ duˬ Sahˬpaˬ Miˬyehˇ neh mˇ-euˬ yawˬ jeˬ na luꞈ-ahˇ ya mawˇ-euˬ aˬ yuiꞈ aˬ tsu k’oeˇ deuˬ k’aˇ dehꞈ k’oeˇ keuˆ ni, Sahˬpaˬ Miˬyehˇ-ahˇ aˬ yawꞈ maꞈ uˬ duˬ tahˬ-euˬ meh’ lehˇ Jaˇliꞈ ehˇ-eu meh.—Yawˇshuˆ 24:31.

Yeˬsuˇ jiˇ aˬ yawꞈ neh ngehˬ-eu dawˬ maˇ diˇ ngeuˇ-eu lehˇ bi siˬ-eu g’aˇ duˬ, “aˬmiˬ” lehˇ ehˇ-eu meh. Ehˇ k’awꞈ, aˬ yawꞈ naˇ “aˬmiˬ” heu dawˬ aˇ dahˬ beh ngeh zmˬ-awˇ, aˬ cawˬ deuˬ naˇ jiˇ leˇ ngeh zmˬ-eu meh. (Aˬkaˬ Jaˇliꞈ Maꞈtehˬ 5:18 hawˇ-eu Yoˇhaˬ 1:51-ahˇ naˇ, dawˇ coe ni hawˇ-eu maˇ jawˆ ni lehˇ boꞈ taˬ-euˬ meh.)  Tiˬ poˆ na Yeˬsuˇ “aˬmiˬ” lehˇ ehˇ poˆ-eu meh. Yeˬsuˇ tsawˇ haˬ deuˬ-ahˇ, aˬ yawꞈ-euˬ dawˬ maˇ maˇ ni g’eh-eu jeˬ pyeuꞈ-eu lehˇ kamˬ nehˬ-eu meh. Yeˬsuˇ heu loꞈ-ehˇ maˇ jawˆ ni ehˇ nya-eu heu naˇ, aˬ yawꞈ Yeˬhawˇbaˬ saˇ jaˇ k’aˇ dzaˬ taˬ-euˬ jeˬ maˇ diˇ bi byah laˇ-eu baoˬ ahˇ-eu g’aˬ pyeuꞈ-eu miˇ neh meh.—2 Gawˇliˬtu 1:20; Pah mehˬ-eu 3:14.

“Tsawˇ haˬ dawˬ tawˆ luꞈ “Aˬmiˬ” lehˇ ehˇ-awˇ, Sahˬpaˬ Miˬyehˇ-ahˇ ja ceuˬ-euˬ meh”

Iˇsaˬleˬlaˆ deuˬ “aˬmiˬ” lehˇ ehˇ-eu heu dawˬ, Yeˬhawˇbaˬ-ahˇ ja ceuˬ-awˇ guiˬ lahˬ shaˇ ngeh jiˇ zmˬ-eu meh. (Neˬhaˬmiˇ 8:6; Ja ceuˬ 41:13) Guiˬ lahˬ shaˇ dawˬ-ahˇ naˇ haˬ luꞈ-eu deuˬ, guiˬ lahˬ shaˇ g’aˬ ngeh aˬmiˬ lehˇ ehˇ naˇ, aˬ yawꞈ maꞈ shaˇ dawˬ teu-ahˇ nui ma tsaˬ-eu lehˇ bi siˬ-eu jeˬ pyeuꞈ-awˇ, heu naˇ yawˬ g’aˬ na luꞈ mehˬ bawˬ gm-eu laꞈ k’oeˇ Yeˬhawˇbaˬ-ahˇ uˬ duˬ ya tahˬ-eu jeˬ pyeuꞈ meh. Gaˇ kawˆ heu sahˬ paˬ Daˬbiˇ Yeˬluˇsaˬlehˬ meuˬ-ahˇ Yeˬhawˇbaˬ-euˬ saˇ jaˇ Bahˬ keuˆ baꞈ ahˇ leꞈ ngeh pyeuꞈ laˇ-euˬ meh. K’oeˇ gaˇ neh naˇ Iˇsaˬleˬlaˆ deuˬ bawˬ-iˬ jahˇ-awˇ, 1 Laˬsaˬbaˬ 16:8-36-ahˇ boꞈ taˬ-euˬ Daˬbiˇ-euˬ dawˬ caˇ caˇ-euˬ meh. Dawˬ caˇ heu naˇ, nui ma laꞈ k’oeˇ neh doˆ le-euˬ gui lahˬ shaˇ dawˬ pyeuꞈ meh. Aˬ yawꞈ maꞈ Daˬbiˇ-euˬ caˇ dawˬ-ahˇ ya leˇ dui dui-eu miˇ neh, ‘‘Aˬmiˬ’ lehˇ ehˇ-awˇ, Yeˬhawˇbaˬ-ahˇ ja ceuˬ-euˬ meh.’ Heu gaˇ haw ngeh, aˬ yawꞈ maꞈ teu ngeh nah Yeˬhawˇbaˬ-ahˇ uˬ duˬ ya tahˬ-euˬ laˬ k’aˬ cehˇ ngaˇ lehˇ siˬ laˇ-eu meh.

Dahˬ beh-euˬ Ka li zaˬ deuˬ jiˇ ni Yeˬhawˇbaˬ-ahˇ ja ceuˬ ngeh “Aˬmiˬ” lehˇ ehˇ-eu meh. Jaˇliꞈ boꞈ-euˬ yaw myaˬ g’aˬ aˬ yawꞈ maꞈ-euˬ sahˬ boꞈ laꞈ k’oeˇ dawˬ heu dawˬ tiˬ k’ehˬ maˬ taˬ boꞈ ahˇ taˬ-euˬ meh. (Loˇmaˆ 1:25; 16:27; 1 Beˬtuˆluˆ 4:11) Mˬ taˆ jawˇ-eu deuˬ Yeˬhawˇbaˬ-ahˇ ciˬ huiˬ ciˬ mahˇ-eu g’aˇ duˬ, “Aˬmiˬ. Miˬyehˇ-ahˇ ja ceuˬ-awˬ” lehˇ ehˇ-eu meh lehˇ Pah mehˬ-eu sahˬ boꞈ-ahˇ ngehˬ keuˆ taˬ-euˬ meh. (Pah mehˬ-eu 19:1, 4) Dahˬ beh-eu Ka li zaˬ deuˬ bawˬ dzaˬ ngeh, guiˬ lahˬ shaˇ g’aˬ naˇ, “aˬmiˬ” lehˇ ehˇ-eu meh. (1 Gawˇliˬtu 14:16) Ehˇ k’awꞈ dawˬ heu naˇ tiˬ jeˬ-iˬ maˬ shaˇ noeˬ ni ngehˬ doˆ leꞈ-eu dawˬ maˬ ngeuˇ-a.

Nawˬ neh “Aˬmiˬ” lehˇ ehˇ-euˬ dawˬ aˬ jeˬ miˇ neh aˇ yeˇ huiˬ-eu nga?

Miˬyehˇ gaˇ mˇ zaˬ deuˬ dawˬ heu dawˬ-ahˇ gaˇ hu aˬ joˆ-ehˇ zmˬ yaꞈ-euˬ nga lehˇ haw ngeh, aˬ dui guiˬ lahˬ shaˇ g’aˬ ngeh aˬ jeˬ miˇ neh “aˬmiˬ” lehˇ ya ehˇ nga lehˇ siˬ laˇ-eu meh. Aˬ dui guiˬ lahˬ shaˇ g’aˬ ngeh dawˬ heu dawˬ ngehˬ-eu heu naˇ, aˬ dui maˇ diˇ teu loꞈ-ehˇ ehˇ  mawꞈ-eu lehˇ bi siˬ-eu jeˬ pyeuꞈ-awˇ, aˬ cawˬ guiˬ lahˬ shaˇ ngeh aˬ dui “aˬmiˬ” lehˇ teˇ saˇ maˬ ngehˬ doˆ leꞈ k’awꞈ, aˬ yawꞈ maꞈ-euˬ shaˇ dawˬ-ahˇ nui ma tsaˬ-eu lehˇ bi siˬ-eu jeˬ pyeuꞈ meh. “Aˬmiˬ” lehˇ ehˇ-eu heu aˬ joˆ-ehˇ aˇ yeˇ huiˬ nga lehˇ paˇ haw ma siˬ.

Aˬ dui nui ma keuˆ-eu laꞈ k’oeˇ Yeˬhawˇbaˬ-ahˇ uˬ duˬ tahˬ mawꞈ-eu lehˇ bi siˬ. Aˬ dui Yeˬhawˇbaˬ-ahˇ guiˬ lahˬ shaˇ-eu laꞈ k’oeˇ uˬ duˬ tahˬ-eu heu naˇ, “aˬmiˬ” lehˇ ehˇ ngeh tehꞈ maˬ ngeuˇ-a. Guiˬ lahˬ shaˇ-eu g’aˬ shaˇ luꞈ gaˇ yaw muiˬ-ehˇ naˇ haˬ gaˇ jiˇ ehˇ mawꞈ-eu meh. Aˬ dui aˬmiˬ lehˇ ehˇ-eu heu dawˬ nui ma laꞈ k’oeˇ neh bi doˆ le mawꞈ-eu miˇ neh, tsaˬ-eu nui noeˬ ya bi ahˇ-awˇ, shaˇ dawˬ-ahˇ yaw muiˬ-ehˇ ya naˇ haˬ-eu meh.

Aˬ dui-ahˇ nui ma tiˬ siˬ tehꞈ-ehˇ taˬ-eu laꞈ k’oeˇ Miˬyehˇ-ahˇ uˬ duˬ tahˬ-eu deuˬ bi pyeuꞈ laˇ. Tiˬ g’aˬ na guiˬ lahˬ shaˇ gaˇ sheuˬ g’eh nehˬ laꞈ ngeh, aˬ dui yawˬ g’aˬ na luꞈ gaˇ kawˆ tiˬ kawˆ-ahˇ tehꞈ-ehˇ shaˇ noeˬ-eu meh. (G’aˬk’ehˇ 1:14; 12:5) Aˬ dui mehˇ nmˇ deuˬ nehˬ-ehˇ tiˬ kawˆ loꞈ-ehˇ “aˬmiˬ” lehˇ ehˇ ngeh, mehˬ bawˬ gm dzehˬ laˇ-eu meh. Aˬ dui “aˬmiˬ” lehˇ teˇ saˇ ehˇ doˆ leꞈ-eu maˬ ehˇ, nui ma laꞈ k’oeˇ neh ehˇ-eu maˬ ehˇ, yawˬ g’aˬ na luꞈ tiˬ kawˆ loꞈ-ehˇ ehˇ ngeh, aˬ dui-euˬ shaˇ dawˬ-ahˇ Yeˬhawˇbaˬ naˇ haˬ nehˬ laꞈ ni laˆ noeˬ-eu k’awꞈ pyeuꞈ nya meh.

Aˬ dui “aˬmiˬ” lehˇ ehˇ ngeh Yeˬhawˇbaˬ-ahˇ ja ceuˬ luꞈ-eu jeˬ pyeuꞈ

Yeˬhawˇbaˬ-ahˇ ja ceuˬ-eu jeˬ pyeuꞈ. Yeˬhawˇbaˬ aˬ dui aˬ yawꞈ-ahˇ uˬ duˬ tahˬ-eu yawˬ jeˬ na luꞈ-ahˇ yaw muiˬ-ehˇ haw-eu meh. (Luˇkaꞈ 21:2, 3) Aˬ yawꞈ aˬ dui aˬ jeˬ noeˬ-awˇ aˬ jeˬ baˬ da neh jahˇ nga lehˇ siˬ nya-eu meh. Aˬ dui mehˬ bawˬ-ahˇ naˬ gaˬ paw neh ya naˇ haˬ ngeh k’awꞈ, taˬ aw-eu laꞈ k’oeˇ “aˬmiˬ” lehˇ ehˇ naˇ, Yeˬhawˇbaˬ haw mawˇ-awˇ gaˬ-eu yaw duˬ baw-awˇ, bawˬ dzaˬ nymˇ laꞈ k’oeˇ mehˇ nmˇ deuˬ nehˬ-ehˇ Yeˬhawˇbaˬ-ahˇ ja ceuˬ luꞈ-eu jeˬ jiˇ pyeuꞈ meh.

Aˬ dui neh “aˬmiˬ” lehˇ ngehˬ-eu dawˬ aˇ poeˬ maˬ baw gaˇ duˇ k’awꞈ, maˇ diˇ naˇ aˇ yeˇ huiˬ dui dui-eu meh. Jaˇliꞈ dawˬ tsuiꞈ puiˇ hawˬ-eu paˇ dmˬ tiˬ dmˬ-ahˇ “Miˬyehˇ-euˬ gaˇ mˇ zaˬ deuˬ dawˬ heu dawˬ neh, aˬ yawꞈ maꞈ jah-eu, nui ma tsaˬ-eu, maˇ diˇ ha geuꞈ-eu lehˇ mˇ mawˇ nya-awˇ, nui ma laꞈ k’oeˇ noeˬ tmˬ-eu jeˬ jiˇ mˇ mawˇ nya-eu meh” lehˇ ehˇ-eu meh. Teu miˇ neh aˬ dui neh yaw poˆ na luꞈ “aˬmiˬ” lehˇ ehˇ-euˬ heu dawˬ, Yeˬhawˇbaˬ-ahˇ nui k’ahˇ shiˇ-eu jeˬ bi pyeuꞈ luꞈ-uˇ.—Ja ceuˬ 19:14.