NDWOKƆ MƆƆ MMƖLANTƖYƐ NƖƖ NƔƐDƐKƐ BEBIZIA
Mɩyɛ Azʋ̃nzɩzɩbɛ Wɔ Awudo—Mɩnla Yɛ Mɩyɛ́ a?
Ɩkɛyɛ kɛɛ abusunwa bela wɔ mmɛla mɔɔ bɛfa bɛyɛ egyima wɔ awudo. Dɩkɛɛ mmɩlɩ mɔ ɩsɛ kɛɛ abiyela ba awudo, mmɩlɩ dʋdʋ mɔɔ bɛkɛva ɩlɛtɩlɔnɩkɩ mahyini bekeli egyima, nɩɩ kezimɔ bɛ nɩɩ mmenii mvʋlɔ keli.
Na sɛ obulu mmɛla yɩ be zʋ sʋ̃ ɛ? Ɔlɔ́kʋla kɛzɩnza mɔɔ izi nɩ, naasʋ̃ sa ɔkʋla yɛ debe na nninyeni iáleli salɛ nu kʋlaa. Odwokɔ eyi kɔwʋwa wʋ ma ɔkɔnwʋ mɔɔ ɛkɛyɛ.
Mɔɔ íni kɛɛ ɛyɛ
Sɛ wʋ awʋvʋlɔ bézi wʋ azʋ̃nzɩzɩbɛ yɩ nwʋ hwɩɩ a, ebiye a ɩkɛyɛ wʋ kɛɛ fa siye bɛ.
Sɛ bézi kɛɛ mɔwʋ yɛ ɛyɛlɩ azʋ̃nzɩzɩbɛ yɩ a, ebiye a ɛkɛva ndwokɔ kɛyɩyɩ wʋ nwʋ munwa anzɛnyɩɩ ɛkɛva nwʋmɔ ɔzʋnɩ kediã abiye zʋ.
Eyimmɔ nu bela lɔ́bʋwa wʋ. Mɩnla ti a? Iluwakɛɛ sɛ ɛfa mɔɔ ɛyɛ nɩ siye anzɛnyɩɩ ɛkɩnhã ndwokɔ be fa yɩyɩ wʋ nwʋ munwa a, ikile kɛɛ ɛlanwʋ la ɛdɩ kuakula na wʋ awʋvʋlɔ kɔnwʋ yɩ kɛɛ wʋ nwʋ lɔ́kʋkwalɩ.
“Awohwi mɛyɩ ɩáwʋwa kʋlaa. Iluwakɛɛ ɩwɔ numɔ la a, wʋ awʋvʋlɔ kɔnwʋ mɔɔ izili ankasa, na mɔɔ bɛkɛva bɛkɛyɛ wʋ nɩ, ɛhanlɩ yɩ ndɛ po a ankɩ ɩdɩyɛnɛ.”—Diana.
Ɔhʋanɩba mɔɔ ɔkɔhʋla koluwa zʋ
De wʋ azʋ̃nzɩzɩbɛ yɩ tiã nu. Bayɩbʋlʋ yɩ kã kɛɛ: “Mɔɔ ɩkɩda yɩ mmɛladʋnlɛ zʋ nɩ, ilési yi bʋwɔ.” (Ɛɣɛlɛwulɛ 28:13) Wʋ awʋvʋlɔ zi kɛɛ, kɛ eɣile bela yɛ ɔkɔhʋla kɛyɛ mɔɔ ɩdɩ baaba a. Naasʋ̃ bekilaa ɔhʋanɩ kɛɛ ɛkɛhã nɔhʋanlɛ.
“Sɛ ɛkã nɔhʋanlɛ a, wʋ awʋvʋlɔ kɔnwʋ wʋ nwɔkɛ na bɛkɛva kɛhyɛ wʋ. Sɛ ɛma bɔnwʋ nɔhʋanlɛ bela mɔɔ ɩwɔ odwokɔ yɩ nu a, bekele wʋ bekeli na bekenyia wu nu anwʋlazʋ eɣile bela.”—Olivia.
Pa kyɛbɛ. Bayɩbʋlʋ yɩ kã kɛɛ: “Bɛhã bɔ nwʋ azɩ bɛma bɔ nwʋ nkʋ̃ nkʋ̃.” (1 Pita 5:5) Sɛ ɔwɔ kãnwʋazɩ a, ɩlɛ́yɛ sɩ ɩkɛma wʋ kɛɛ ɛkɛhã “Mɩpa kyɛbɛ wʋ,” na ɛlɛ́fa ndwokɔ kɛyɩyɩ wʋ nwʋ munwa sʋ̃.
“Bɛzabɛ mɔɔ bɛta bɛfa ndwokɔ bɛyɩyɩ bɔ nwʋ munwa nɩ, ɩkʋla ɩsɩkɛ be tiwʋwaba. Meti ikodwu dɩka be nɩ, bedi tanɩ po a, ɩáhã bɛ po na bɛali nwʋmɔ ɛyɛkɛ.”—Heather.
De mɔɔ ɩzʋ̃ numɔ kɛɣa bela tiã nu. Bayɩbʋlʋ yɩ kã kɛɛ: “Tiye ɛdɩnyɩanlɛ.” (Ɛɣɛlɛwulɛ 8:33) Mátɩndɛlɩ wʋ avʋ̃ tʋ, mfomi de azʋ̃nlɩhwɩnlɛ bela mɔɔ wʋ awʋvʋlɔ kɛva kɛma wʋ nɩ de tiã nu.
“Sɛ ɛtɩndɛlɩ azʋ̃nlɩhwɩnlɛ mɔɔ bɛva bɛma wʋ nɩ nwʋ sʋ̃maa a, ɛkɛzɩkɛ wu odwokɔ yɩ kʋlaa. Sɛ bezi wʋ ɔhʋanɩ wɔ nninyeni be nwʋ a, bɔ mmɔdɩnɩ de tiã nu. Máfa wʋ adwɩnɩ siye mɔɔ ivi wʋ sa nɩ zʋ sʋ̃maa.”—Jason.
Yɛ nninyeni mɔɔ ɩkɛma bekele wʋ keli dɔkʋ̃. Bayɩbʋlʋ yɩ kã kɛɛ: ‘Bodú bo subanɩ dadampɔ nɩ mɔɔ ɩmanlɩ bɔwɔlɩ ɛbɩla mɔɔ bɛzabɛ bɛpɛ yɩ nɩ bogua.’ (Ɛfɩsɛsɩmaa 4:22) Bɔ mmɔdɩnɩ kɛɛ ɔkɔwɔ yɩ tʋ kezizi abɔkɔ mɔɔ nɣɛlɛbɛ wɔ nu, na ɩkɛma wʋ awʋvʋlɔ kenyia wu nu anwʋlazʋ dɔkʋ̃.
“Sɛ ɔkɔ zʋlɔ sizi abɔkɔ mɔɔ nɣɛlɛbɛ wɔ nu, na ɛma wʋ awʋvʋlɔ nwʋ yɩ kɛɛ, mfʋmɩ mɔɔ elili nɩ, ɛlɛ́yɛ dɔkʋ̃ a, bekezia bekele wʋ keli dɔkʋ̃.”—Karen.
ADWƖNƖHILELƐ: Mɔɔ wʋ awʋvʋlɔ pɛ kɛɛ ɛyɛ nɩ, yɛ ma ɩdɛla zʋlɔ kʋlaa. Mɛyɩ kɛyɛ dasɩlɛ mɔɔ ikile kɛɛ sa bɔkʋla bede wʋ bedi. Kɛ ndianwʋ nɩ, mmɩlɩ fʋlɔ mɔ ekevinde nɩ, sɛ ɛlɛ́kyɛ po a, fʋlɔ wʋ awʋvʋlɔ kã kile bɛ kɛɛ oluwa ɔhʋanɩ zʋ ɛbaa. Ɛyɛ zɔ a, nɩ ɛkãã kehile bɛ kɛɛ, ‘Mɩpɛ kɛɛ bede mɩ bedi dɔkʋ̃.’
