JINTIAMU 3
Wajuk epegmainaita utugchat
“Tuja juna nagkaesauwa nuuwai puyatjunisa pempeentuniki aneenita duka, aneenita nujaiyai kuashat pegkegchau aidaush pempeentuniki tsagkugdaimaina dushakam.” (1 Pedro 4:8)
Aishmag nuwajai nuwena duka, kuashat utugchatan igkuawai, ¿wagka? Makí makichik betekchau anentaimainau asa nuigtushkam betekchau tsakajaju asa. Nuniau asa utugchat minawai pachiachmau agaaya.
Utugchat akuish idaimainchauwai, tujash Apajuí chichame ichichtamui utugchat akuish epegmainai tusa (Mateo 5:23, 24). Ame Apajuí chichame tawa nunú umiakmek utugchat epegkattame.
1 CHICHASTÁ UTUGCHAT PACHISAM
APAJUÍ CHICHAME TAWAI: “Tsawan jegawai chichaamu” (Eclesiastés 3:1, 7). Tsawan sumamsam chichastá utugchat pachisam; aishmag nuwem akuish dekas chichastá nunú utugchat pachisam wajuk anentaime. Tuké dekas titá (Efesios 4:25). Kajekú akumesh nunú depetkata maanikaig tusam. Kajetsuk aibauk utugchatnak itatsui (Proverbios 15:4).
Ame betek anentaimchakmek nuwem aishum akuish, aneeta; nuniakum tuké iwaintukta anentak ajantusa diiyamu (Efesios 4:29). Epegkata utugchat wamkesam, nuigtush chichatsuk kajegdaikajum pujusaigpajum (Efesios 4:26).
WAJÍ DUTIKMAINAITME:
-
Egaktá tsawan agkan abaunum chichastasam.
-
Amina aishum nuwem chichaakuig, aiktasa waketsuk shiig antugkata. Nii inagnakmatai chichasminum.
2 ANTUKAM NUNIAKUM YAIGTATME
APAJUÍ CHICHAME TAWAI: “Senchi aneenitajum. Nuigtushkam pempentunisjumek ajantusa niiniakjum aan nagkaemas ajantusa niiniamu iwaintuniktasajum kakanmamtajum” (Romanos 12:10). Juka iman antugmainai amina aishum nuwemjai anentaima nunú Apajuí chichame tawai, “ashí betek nuninuk anentaimkau, puyatjus anentaimtunin [...] nuigtush ememachu atajum” (1 Pedro 3:8; Santiago 1:19). Antayaitkum antachua nunin wajaipa. Wají dutikame duka ukuakum antugkata nuwem aishumjai tawa nunú, nuniachkumesh iniasta chichastajai tusam. Amina nuwem aishumjai kumpajum amainai amina shiwajum diisaipa, nuniakum kajegdaikaipa wamkesam (Proverbios 15:1).
WAJÍ DUTIKMAINAITME:
-
Shiig antugkata nuwem aishumjai tujama nunú, amina shiig awatamchakuishkam antugkata.
-
Antukta nii tujama nunú. Diistá wajuk chichawa kajekag atsá wakejusa antumainak chichá nuwem aishumjai.
3 KAKANMAMJATA
APAJUÍ CHICHAME TAWAI: “Pegkeg takata duka mijatkachagmi. Imaní batsatu asá, iish imanisaik batsatkuik tsawan jegakui, ajak ajakmakbau juutia numamtuk Apajuí pegkeg aina nuna sujabau jukitnaitji” (Gálatas 6:9). Ajanum ajakmaik kuashat jutiame anmamtuke ii kakanmamkuik nuwenamunum shiig aneasa pujustatji (Proverbios 13:4). Mai kakanmamtaik, “Apajuí shiig aneas pujustinme tusa yaimpaktatjume” (Juan 13:17).
WAJÍ DUTIKMAINAITME:
-
Anentaimsata wají dutikmainaitme nunú utugchat epegkatasam.
-
Tsawan weakum anentaimsata wajupa yapajinaume nunú.
