¿Wajuk yaijatua umiktin tuke auwa dusha kuitamamsa takat aina nuwish? (IWAINAKBAU 4:11.)

1. ¿Wagka Apajuí jintinjuati tusaish atsumnawa aentstish?

Jehuwak, iina najapauwai, iina nagkaetamsau yachai. Nuigtush iina apají asa puyatjupas aneempawai. Tuja minai kanak nigki pujú atí tusag najapachui. Uchi apajin jintinjuati tusa atsuma aatus, aents aidauk atsumawai Apajuí jintintuamu aatatus (Isaías 54:13). Umiktin iman Apajuí chichamen awa duka Apajuí anentag amamui. Ausata 2 Timoteo 3:16.

Chicham umiktin tuja tuke au umiktin iman Jehuwanua duka yaimpawai shiig aneasa pujutnum tuja nuigtush yaimpawai atakea duwish yumig tuke atina dusha wajuk jumainaita nunashkam. Nuigtush nii najapau asa, dakagmawai wakejus umigtukti tusa. Ausata Salmo 19:7, 11; Iwainakbau 4:11.

2. ¿Wají ainawa tuke au umiktin Apajuí chichamen awa dusha?

Umiktin tuke au Apajuí chichamen awa duka dekaskea nuuwai nunin asa yaijatui kuashat utugchat aidaunmashkam wajuk amainaita nuna. Untsu, chicham umiktin Apajuí chichamen awa duka dekaapas mamikis nuwig umiktinun tujamui (Romanos 13:9, 10). Nunú tuke au umiktin Apajuí chichamen awa nunú, shiig dekaa makí makichik wají aidaunum amaina nunú dekau atatakuik ii dekamua duwi shiig anentaimsau amainai (Efesios 5:15). Apajuí chichame jintinjamui nuniak pujutnak Apajuí anentag amasuí tusa. Aatus asamtai umiktin iman tuke auwa nunú yaijatui jujú aidaunum takatnumash jeganmash wekaetanmash kuitamamsa aneaku ata nuna. Ausata Takasbau 17:28.

3. ¿Tuwaita dekas tuke au umiktin jimag imana dusha?

Jisus etsegkauwai jimag umiktin tuke au imana nuna pachis. Dekatkauwa duka dekamtijamui  wakegamujin aents aidautinash wajuk pujustí tujamua nuna: nuigtush Apajuí dekaa, aneamui betek imagnisa umigta nuna. Nuaduí aneaku amainai jujú tuke au umiktina nunú makí makichik ii tumabau aina nuwig (Proverbios 3:6). Ya aidau nuna betek uminawa nunú dekas kumpajig ainawai Apajuin, tuja pujut nagkanchaunash jukiag shiig aneas pujusagtinai. Ausata Mateo 22:36-38.

Tikich jimaja nu tuke au umiktina duka yaijatui tikich aidaujaish wajuk shiijash pujumainaita nuna (1 Corintios 13:4-7). Apajuí aneawai aents aidaunak nunin asamtai niina chichame umiktin tuke auwa nunú umiakuik iwainmamji Apajuijai betek. Ausata Mateo 7:12; 22:39, 40.

4. ¿Wajuk yaijatua tuke au umiktin aidaush?

Umiktin tuke au Apajuí chichamen awa duka imá senchi yaijatui adejattanum tuja shiig ijutkau patajai pujutnum (Efesios 4:32; Colosenses 3:12, 14). Nuigtush yaijatui wajuk kuitamamka pujumainaita nuna, aantsag jintinjamui nuwedaush wajuk pujakua shiig aneas pujumainaita nunashkam. Ausata Génesis 2:24.

Tuke au umiktin Apajuí chichamen awa nu umiamuk yaijatui takasá pujutnumshakam nuigtush wakegat aina nu wegantunmashkam. Nuaduí kuashat takat aina nuwig imá kuashat takau aidau iwainmamainawai tuke au umiktin aina nuna umijus pujamujin, nuniak aents kajintsá diiyam ainawai nuigtush uyumas anentaimin asagmatai (Proverbios 13:4; Hebreos 13:18). Nuigtush Apajuí chichamen jintinjamui nuniak shiig aneasam pujustá wajupauchia dekas atsumamu ajutjamua duwik, tuja nuniakum imá senchi Apajuí kumpají ata wají aidau nagkaesam tusa. Ausata Mateo 6:24, 25, 33; 1 Timoteo 6:8-10.

Umiktin tuke au Apajuí chichamen awa duka yaijatui iina iyashin pegkeg pujuta nuwishkam. Chicham umiktin Apajuinua duka nampekaipa tawai nuigtush ayamjupawai jatanum aantsag pachiashbau uminká jaatai aina nuwishkam (Proverbios 23:20, 29, 30). Aatus asamtai, Jehuwá tujamui umutai nampetai umakmesh dekapmamsam wajumak dekaapam uwagta tusa (Salmo 104:15; 1 Corintios 6:10). Chicham tuke au umiktina duka yaijatui, iina pujutinish anentaimtanmash niimaku ata nuna (Salmo 119:97-100). Aatus asamtai, dekas Jisukristu nemajuina duka ayatak Ajantus diiyak imá senchi dita wakegamun umiktá tabauwa duchauwai; imá pegkeg iina Apají Jehuwá nayaimpinum puja nunú emematta tabauwa nunuwai. Ausata Mateo 5:14-16.