Diistá awa nui

Awin papí diistá

Diistá ajawai

Jehuwá etsegtin aidau

awajún

¡Pegkeg chicham Apajuinu minawai!

 Jintiamu 13

¿Wajintua Apajuí chichamesh atakesh Apajuí nemagbaush wajukatnai tawa?

¿Wajintua Apajuí chichamesh atakesh Apajuí nemagbaush wajukatnai tawa?

1. ¿Ashí pegkegkek aina Apajuí nemagjai tuina dusha?

Ashí Apajuí nemagji tuina nuwishkam aents pegkeg umin kakagchaushkam awai. Nunú aents aidaunak Apajuik eme anentus diiyawai. Tujash shiig kuashat wají pegkegchau aidaun takainawai Apajuí nemagji tabau daajin (2 Corintios 4:3, 4; 11:13-15). Kuashat chicham etsegbaunum dekanui Apajuí nemagji tuina nuwiya ijutkau takaina nu magkagtin aidaujai, tuja maaniamunmashkam, nuigtush uchi depetki pegkegchau awagmamunmashkam duwi. ¡Wajukuskait tusa anentaimainawai aents pegkejan anentaimkau aina nunú! Ausata Mateo 24:3-5, 11, 12.

Tuja Apajuí nemajin dekaskea duka ajantus diinawai Jehuwanak, tujash dekas nemajuinatsu duka Apajuinak ekajenawai. Ditak jintinatsui dekaskea nunak Apajuinunak nunin asag tsanumainawai jakaush wajukeawa nuna pachisash, aantsag jintinawai Apajuí chichamen atsau aidaunashkam. Tujash Jehuwak wakegawai aents dekaskea nuna dekaatnume tusa niina pachisa. Ausata Ezequiel 18:4; 1 Timoteo 2:3-5.

2. ¿Wajintua Apajuí chichamesh wajukatnai tawa atakesh Apajuí nemagbaush?

Apajuinak tsanumainchau ainawai Apajuí nemagjai tuina duka, wagki aneajai tuinayatak imá senchi ju nugkanmayan Iwanch wakegamun aneedau asag (Santiago 4:4). Apajuí chichame ashí nemagjai tuina nuna ijumag adayak tawai “yaakat muun Babilonia”, junak naamkauwai yaunchuk yaakat nagkamchak najaneuwa duwi nagkamsag wait Apajuí nemagjai tabau aajakua nuna tuja Noé pujai abau nagkaemakiuwa imadui. Shiig waamak Apajuí emegkaktatui pachiachmau wait Apajuí nemagjai tabau aentsú tsanuak pegkegchau ema nunak. Ausata Iwainakbau 17:1, 2, 5, 16, 17; 18:8.

Jehuwak kajimattsui aents pegkeg shiig esegag anentaimkau aidau ashí nugkanum Apajuí nemagjai tuina nunuí pa chitkau aina nunak tuja nunin asa ijumui nunin aidaun. ¿Tujash wajuk? Jintintak dekaskea nuna. Ausata Miqueas 4:2, 5.

Dekaskea nunú Apajuí nemagbauk yaijatui ijutkau atan

3. ¿Wajina dutikmainaita aents shiig esegag anentaimkaush?

Jehuwak aneawai aents aidaunak dekaskea nu aneamui pegkegnak takaina nuna. Duwi tujamui ukuktá apajuí nemagjai tabau waita duka tusa. Dekas aneakug, wakesa kakanmamainai yapajina niina shiig awakatasa. Ausata Iwainakbau 18:4.

Jisusa saataiji aidau etsegkajui, yamajam chichaman nunitai, kuashat aents shiig esegag anentaimkau wakejus antugkau ainawai. Jehuwá jintintuawai nunú aents aidaunak shiig aneasa dakunkut pujutan tuja nuigtush dakamunmashkam. ditajai betek, jutiishkam wakejusa yamajam chichama duka antumainaitji nuniaku dekatkau Apajuí wakegamua umimainaitji. Ausata 1 Tesalonicenses 1:8, 9; 2:13.

Jehuwá wakejus juwawai ya Apajuí nemagji tabau waita nuna ukuak dekaskea nuna nemajua nunak. Nunú aidauk Apajuí kumpají wenawai, tuja aneeninawai ashí Jisukristu nemajuina nujaig nuigtush dakainawai tuke pujutai atina nunashkam. ¿Wakegamek jukitasamesh nunú yumig? Ausata Marcos 10:29, 30; 2 Corintios 6:17, 18.

4. ¿Wajina dutikattawa Apajuí agkan shiig aniamu ashí nugkanum atí tusash?

Jehuwá emegkaktatui Apajuí nemagjai tabau waita nunak, nuniak itatnai shiig aneamu nugkanum. Nunuwa duka tsanugchatnai aentsnak tuja nuigtush akanjag emashtinai. Ashí aents nugkanmayag ememattinai imá Apajuí dekaskea nunak. ¿Nunú pegkeg chichamchaukait? Ausata Iwainakbau 18:20, 21; 21:3, 4.