Spring na inhoud

Spring na inhoudsopgawe

Hulle het hulle gewillig aangebied—In Mexiko

Hulle het hulle gewillig aangebied—In Mexiko

DIT is hartverblydend om te sien hoe al hoe meer jong Getuies hulle lewe vereenvoudig sodat hulle hulle Christelike bediening kan uitbrei (Matt. 6:22). Watter veranderinge bring hulle aan? Voor watter uitdagings kom hulle te staan? Kom ons vind die antwoorde deur party wat tans in Mexiko dien, beter te leer ken.

‘ONS MOES VERANDERINGE AANBRING’

Dustin en Jassa van die Verenigde State is in Januarie 2007 getroud. Kort daarna kon hulle hulle lewenslange droom verwesenlik—om ’n seilboot te besit en heeljaar daarop te woon. Hulle het hulle boot vasgemeer naby Astoria, Oregon, VSA, ’n skilderagtige dorp omring deur woudbedekte heuwels en sneeubedekte berge, wat net ’n entjie van die Stille Oseaan af geleë is. “Waar jy ook al gekyk het”, sê Dustin, “was die uitsig asemrowend!” Die egpaar het gevoel dat hulle ’n eenvoudige lewe lei en op Jehovah vertrou. Hulle het gedink: ‘Ons woon immers op ’n agt meter lange boot, werk deeltyds, behoort aan ’n anderstalige gemeente en dien van tyd tot tyd as hulppioniers.’ Maar ná ’n rukkie het hulle tot die slotsom gekom dat hulle hulleself flous. “Pleks daarvan om die gemeente te ondersteun, het ons die meeste van ons tyd gebruik om ons boot reg te maak”, sê Dustin. “Ons het geweet  dat ons ’n verandering sou moes aanbring as ons Jehovah eerste in ons lewe wou stel.”

Jassa voeg by: “Voordat ek getroud was, het ek in Mexiko gewoon, waar ek in ’n Engelse gemeente was. Ek het dit geniet om daar te dien, en ek wou graag teruggaan.” Om hulle begeerte te versterk om in ’n ander land te gaan dien, het Dustin en Jassa tydens gesinsaanbidding lewensverhale begin lees oor broers en susters wat gaan dien het in lande waar die oes ryp was (Joh. 4:35). “Ons wou dieselfde vreugde ondervind”, sê Dustin. Toe Dustin en Jassa by vriende in Mexiko gehoor het dat ’n nuutgestigte groep hulp nodig het, het hulle finaal besluit. Hulle het uit hulle werk bedank, hulle seilboot verkoop en na Mexiko getrek.

“DIE BESTE DING WAT NOG OOIT MET ONS GEBEUR HET”

Dustin en Jassa het gaan woon in die dorp Tecomán—nog steeds naby die Stille Oseaan, maar sowat 4 300 kilometer suid van Astoria. “In plaas van ’n koel briesie en ’n uitsig op die berge, is daar skroeiende hitte en suurlemoenbome so ver as die oog kan sien”, sê Dustin. Aanvanklik kon hulle nie werk vind nie. Omdat hulle baie min geld gehad het, het hulle twee keer ’n dag, week ná week, rys en boontjies geëet. “Maar net toe ons dieet ondraaglik geword het”, sê Jassa, “het ons Bybelstudente vir ons mango’s, piesangs, papajas en, natuurlik, sakke vol suurlemoene begin gee!” Ná verloop van tyd het die egpaar werk gevind by ’n aanlyn taalskool waarvan die hoofkantoor in Taiwan is. Hulle verdien nou oorgenoeg geld om in hulle daaglikse behoeftes te voorsien.

Hoe voel Dustin en Jassa oor hulle nuwe lewenstyl? “Om te trek, is die beste ding wat nog ooit met ons gebeur het”, sê hulle. “Ons verhouding met Jehovah en met mekaar is sterker as wat ons ons ooit kon voorstel. Elke dag doen ons soveel dinge saam—ons doen velddiens, bespreek hoe om Bybelstudente te help en berei vir vergaderinge voor. En ons is ook vry van die soort druk wat ons in die verlede ondervind het.” Hulle voeg by: “Ons besef nou die waarheid van die belofte in Psalm 34:8: ‘Smaak en sien dat Jehovah goed is’—iets wat ons voorheen nie ten volle verstaan het nie.”

DUISENDE GEWILLIGE WERKERS—WAT MOTIVEER HULLE?

Meer as 2 900 broers en susters—getroud en ongetroud, baie van hulle in hulle 20’s en 30’s—het getrek na gebiede in Mexiko waar Koninkryksverkondigers  nog steeds dringend nodig is. Waarom het al hierdie Getuies hierdie uitdaging aanvaar? Toe ’n groep van hulle hierdie vraag gevra is, het hulle drie hoofredes gemeld. Wat was die redes?

Leticia en Hermilo

Om te toon dat jy Jehovah en jou medemens liefhet. Leticia is op 18-jarige ouderdom gedoop. Sy sê: “Toe ek my aan Jehovah toegewy het, het ek verstaan dat dit beteken dat ek hom met my hele hart en siel moet dien. Om my innige liefde vir Jehovah te toon, wou ek meer van my tyd en energie in sy diens gebruik” (Mark. 12:30). Hermilo, wat nou met Leticia getroud is, was in sy vroeë 20’s toe hy getrek het na waar daar nog Koninkryksverkondigers nodig was. Hy sê: “Ek het besef dat die beste manier om liefde vir my naaste te toon, is om mense te help om in hulle geestelike behoeftes te voorsien” (Mark. 12:31). Daarom het hy die welvarende stad Monterrey verlaat, waar hy in ’n bank gewerk het en ’n gerieflike lewenswyse gehad het, en na ’n klein dorp getrek.

Essly

Om ware en blywende vreugde te ervaar. Kort ná haar doop het Leticia ’n maand lank saam met ’n ervare pioniersuster in ’n afgeleë dorp gaan preek. Leticia vertel: “Ek was verbaas. Dit het my soveel vreugde verskaf om te sien hoe gunstig mense op die Koninkryksboodskap reageer. Teen die einde van daardie maand het ek gedink: ‘Dít is wat ek met my lewe wil doen!’” Essly, ’n ongetroude suster wat nou in haar vroeë 20’s is, is ook deur die vreugde wat sy gesien het, na hierdie soort diens aangetrek. Terwyl sy nog op hoërskool was, het sy ’n hele paar ywerige Getuies ontmoet wat gedien het waar daar hulp nodig was. Sy sê: “Die vreugde wat ek op daardie broers en susters se gesigte gesien het, het by my die begeerte gewek om dieselfde lewensweg te volg.” Baie susters voel soos Essly. Trouens, in Mexiko is daar meer as 680 ongetroude susters wat dien waar daar hulp nodig is. Wat ’n uitstekende voorbeeld stel hulle tog vir jonk sowel as oud!

Om ’n sinvolle en bevredigende lewe te lei. Ná hoërskool is Essly ’n beurs aangebied om op universiteit te gaan studeer. Haar portuurs het haar aangespoor om dit te aanvaar en om ’n “normale lewe” te lei—om ’n graad te kry, ’n loopbaan en ’n motor te hê en om tyd te neem om te reis. Maar sy het nie hulle raad gevolg nie. Essly sê: “Baie van my Christenvriende het hierdie dinge nagejaag, en ek het opgelet dat geestelike doelwitte nie meer vir hulle ’n prioriteit was nie. Ek het ook gesien dat die probleme waarmee hulle te kampe gehad het, hulle al hoe meer gefrustreer het namate hulle dieper by hierdie wêreld betrokke geraak het. Ek wou my jeug gebruik om Jehovah ten volle te dien.”

Racquel en Phillip

 Essly het ekstra skoolkursusse geneem wat haar gehelp het om werk te vind sodat sy haar in die pionierdiens kon onderhou, en toe het sy na ’n gebied getrek waar Koninkryksverkondigers dringend nodig is. Sy het selfs die uitdaging aanvaar om die inheemse tale te leer wat deur die Otomi- en Tlapaneco-volk gepraat word. Wanneer sy nou terugkyk op die drie jaar wat sy in afgeleë gebiede gepreek het, sê sy: “Om te dien waar daar hulp nodig is, het my lewe bevredigend en waarlik sinvol gemaak. Bowenal het dit my verhouding met Jehovah versterk.” Phillip en Racquel, ’n egpaar van die Verenigde State in hulle vroeë 30’s, stem saam. “Aangesien die wêreld so vinnig verander, voel baie mense dat daar geen stabiliteit in hulle lewe is nie. Maar om te dien waar ons nog steeds so baie mense vind wat na die Bybel se boodskap luister, gee ons waarlik ’n gevoel van voldoening. Dit is baie bevredigend!”

UITDAGINGS—HOE OM DIT DIE HOOF TE BIED

Verónica

Diegene wat dien waar daar Koninkryksverkondigers nodig is, moet natuurlik uitdagings die hoof bied. Een uitdaging is om jou finansieel te onderhou. Jy moet bereid wees om by plaaslike omstandighede aan te pas. Verónica, ’n ervare pionier, verduidelik: “Op een plek waar ek gedien het, het ek goedkoop kitskos voorberei en verkoop. Op ’n ander plek het ek klere verkoop en hare gesny. En op die oomblik maak ek ’n huis skoon en bied ek ’n klas vir nuwe ouers aan, wat hulle help om met hulle kinders te kommunikeer.”

Dit kan ’n groot uitdaging wees om by ’n ander kultuur en ander gebruike aan te pas wanneer jy onder ’n inheemse volk in ’n afgesonderde gebied woon. Dit was die geval met Phillip en Racquel toe hulle in die Nahuatl-veld gedien het. “Die kultuurverskille was baie groot”, sê Phillip. Wat het hulle gehelp om aan te pas? “Ons het gekonsentreer op die positiewe dinge wat ons onder die Nahuatl-mense gesien het—die hegtheid van hulle gesinne, die opregtheid wat hulle toon in hulle handelinge met mekaar sowel as hulle vrygewigheid.” Racquel voeg by: “Om daar te woon en om skouer aan skouer met ons broers en susters in daardie inheemse gemeenskap te dien, het ons baie geleer.”

HOE OM JOU VOOR TE BEREI

Wat kan jy nou doen om jou voor te berei as jy graag wil gaan dien in ’n afgesonderde gebied waar daar hulp nodig is? Broers en susters wat ondervinding het in hierdie soort diens, sê dat jy voordat jy trek, jou lewenswyse moet begin vereenvoudig en moet leer om vergenoeg te wees (Fil. 4:11, 12). Wat kan jy nog doen? Leticia vertel: “Ek het sekulêre werk vermy wat vereis het dat ek lank op een plek bly. Ek wou te eniger tyd kon trek na waar daar ook al hulp nodig is.” Hermilo sê: “Ek het geleer om te kook, wasgoed te was en te stryk.” Verónica vertel: “Terwyl ek met my ouers en broers en susters by die huis gewoon het, het ek gehelp om skoon te maak en geleer om goedkoop maar voedsame maaltye voor te berei. Ek het ook geleer om te spaar.”

Amelia en Levi

Levi en Amelia van die Verenigde State is agt jaar lank getroud en vertel hoe spesifieke gebede hulle gehelp het om hulle voor te berei om in Mexiko te gaan dien. Levi sê: “Ons het uitgewerk hoeveel geld ons nodig sou hê om ’n jaar lank in ’n ander land te gaan dien, en ons het Jehovah toe in gebed gevra om ons te help om daardie presiese bedrag te verdien.” Binne maande kon hulle die bedrag opspaar wat hulle in hulle gebed gemeld het, en hulle het onmiddellik getrek. Levi sê: “Jehovah het ons spesifieke gebed verhoor, en nou was dit ons beurt om ons kant te bring.” Amelia voeg by: “Ons het gedink dat ons net een jaar sou kon bly, maar ons is nou al sewe jaar lank hier, en ons oorweeg dit nie eers om terug te gaan nie! Om hier te woon, laat ons toe om Jehovah se hulp eerstehands te ondervind. Ons sien elke dag bewyse van sy goedheid.”

Adam en Jennifer

Vir Adam en Jennifer, ’n egpaar van die Verenigde State wat in die Engelse veld in Mexiko dien, het gebed ook ’n noodsaaklike rol gespeel. Hulle raai aan: “Moenie vir die volmaakte omstandighede wag nie. Maak jou begeerte om in ’n ander land te dien ’n saak van gebed en tree dan in ooreenstemming met jou gebede op. Vereenvoudig jou lewe, skryf aan die takkantoor in die land waar jy graag wil dien, bereken die koste en trek dan!” * As jy dit doen, wag daar ’n opwindende lewe op jou, en jy sal baie geestelike seëninge geniet.

^ par. 21 Vir meer inligting, sien die artikel “Kan jy ‘oorkom na Masedonië’?” in Ons Koninkryksbediening vir Augustus 2011.