Maleagi 3:1-18

  • Ware Heer kom om sy tempel te reinig (1-5)

    • Boodskapper van verbond (1)

  • Aansporing om na Jehovah terug te keer (6-12)

    • Jehovah verander nie (6)

    • “Keer terug na my, en ek sal na julle terugkeer” (7)

    • ‘Bring hele tiende, en Jehovah sal seëninge uitstort’ (10)

  • Regverdige en goddelose (13-18)

    • Gedenkboek voor God geskryf (16)

    • Verskil tussen regverdige en goddelose (18)

3  “Kyk! Ek stuur my boodskapper, en hy moet ’n weg vir my voorberei.+ En die ware Heer, na wie julle soek, sal skielik na Sy tempel kom,+ en die boodskapper van die verbond sal kom, na wie julle vreugdevol uitsien. Kyk! Hy sal beslis kom,” sê Jehovah van die leërmagte.  “Maar wie sal die dag van sy koms kan verduur, en wie sal kan staan wanneer hy verskyn? Want hy sal wees soos die vuur van iemand wat metaal suiwer* en soos die seep van iemand wat klere was.+  En hy sal sit as iemand wat silwer suiwer en reinig,*+ en hy sal die seuns van Levi reinig. Hy sal hulle suiwer* soos goud en soos silwer, en hulle sal beslis vir Jehovah mense word wat ’n offergawe in regverdigheid aanbied.  En die offergawe van Juda en van Jerusalem sal Jehovah se goedkeuring hê,* soos in die verlede.+  “Ek sal nader kom na julle toe vir die oordeel, en ek sal gou wees om te getuig teen die towenaars,+ teen die egbrekers, teen dié wat ’n valse eed aflê,+ teen dié wat die gehuurde werker bedrieg,+ teen dié wat die weduwee en die weeskind* onderdruk+ en teen dié wat weier om die uitlander te help.*+ Hulle het my nie gevrees nie,” sê Jehovah van die leërmagte.  “Want ek is Jehovah, en ek verander nie.*+ Julle is kinders van Jakob, en julle het nog nie aan julle einde gekom nie.  Van die dae van julle voorvaders af het julle my wetsvoorskrifte verlaat en dit nie gehoorsaam nie.+ Keer terug na my, en ek sal na julle terugkeer,”+ sê Jehovah van die leërmagte. Maar julle vra: “Hoe is ons veronderstel om terug te keer?”  “Sal ’n blote mens God beroof? Maar julle beroof my.” En julle vra: “Hoe het ons u beroof?” “In die tiendes en in die bydraes.  Julle is beslis vervloek,* want julle beroof my – ja, die hele nasie doen dit. 10  Bring die hele tiende in die stoorkamer in,+ sodat daar voedsel in my huis kan wees,+ en toets my asseblief in hierdie verband,” sê Jehovah van die leërmagte, “om te sien of ek nie vir julle die sluise van die hemel sal oopmaak+ en ’n seën op julle sal uitstort* totdat julle niks kortkom nie.”+ 11  “En ek sal die een bestraf wat verslind,* en hy sal nie die opbrengs van julle land verwoes nie, en julle wingerde sal ook nie sonder vrug wees nie,”+ sê Jehovah van die leërmagte. 12  “Al die nasies sal julle as gelukkige mense moet beskou,+ want julle land sal ’n aangename land word,” sê Jehovah van die leërmagte. 13  “Julle het harde woorde teen my gespreek,” sê Jehovah. En julle vra: “Hoe het ons onder mekaar teen u gepraat?”+ 14  “Julle sê: ‘Dit help niks om God te dien nie.+ Hoe het dit ons bevoordeel deurdat ons ons verpligtinge teenoor hom nakom en treurend voor Jehovah van die leërmagte rondloop? 15  Nou dink ons dat vermetele* mense gelukkig is en dat mense wat slegte dinge doen, suksesvol is.+ Hulle waag dit om God te toets, en hulle kom daarmee weg.’” 16  Toe het die mense wat Jehovah vrees, met mekaar gepraat, elkeen met sy metgesel, en Jehovah het aandag bly skenk en bly luister. En ’n gedenkboek is voor hom geskryf+ vir dié wat Jehovah vrees en vir dié wat oor sy naam nadink.*+ 17  “En hulle sal myne wees,”+ sê Jehovah van die leërmagte, “op die dag dat ek hulle my spesiale eiendom* maak.+ Ek sal medelye* aan hulle betoon, soos ’n man medelye* betoon aan sy seun wat hom dien.+ 18  En julle sal weer die verskil sien tussen ’n regverdige persoon en ’n goddelose persoon,+ tussen iemand wat God dien en iemand wat hom nie dien nie.”

Voetnote

Of “’n louteraar”.
Of “’n louteraar van silwer”.
Of “louter”.
Of “sal vir Jehovah aangenaam wees”.
Lett. “vaderlose seun”.
Of “wat die uitlander sy regte ontsê”.
Of “ek het nie verander nie”.
Of moontlik “Met ’n vloek vervloek julle my”.
Lett. “leegmaak”.
Verwys blykbaar na insekplae.
Iemand is vermetel as hy iets doen wat hy nie die reg of gesag het om te doen nie.
Of “peins”. Of moontlik “dié vir wie sy naam kosbaar is”.
Of “’n kosbare besitting”.