Jesaja 59:1-21

  • Israel se sondes skei hulle van God (1-8)

  • Sondes bely (9-15a)

  • Jehovah kom op vir dié wat berou toon (15b-21)

59  Kyk! Die hand van Jehovah is nie te kort om te red nie,+en sy ore is nie toe sodat hy nie kan hoor nie.+   Julle eie oortredings het julle van julle God geskei.+ Julle sondes het veroorsaak dat hy sy gesig van julle af wegdraai,en hy weier om na julle te luister.+   Want julle hande is vol bloed,+en julle vingers is vol oortreding. Julle lippe vertel leuens,+ en uit julle mond kom slegte dinge.   Niemand roep uit ter wille van regverdigheid nie,+en niemand praat die waarheid wanneer hy hof toe gaan nie. Hulle vertrou op iets wat nie bestaan nie*+ en praat oor waardelose dinge. Hulle beplan verkeerde dinge, en daarom doen hulle wat sleg is.+   Hulle broei die eiers van ’n giftige slang uit,en hulle weef ’n spinnerak.+ Enigiemand wat hulle eiers eet, sal sterf,en uit die eier wat stukkend gedruk is, sal ’n adder kom.   Hulle kan nie hulle spinnerak as ’n kledingstuk gebruik nie,en hulle kan hulle nie bedek met wat hulle maak nie.+ Hulle doen skadelike dinge,en hulle hande is vol geweld.+   Hulle voete hardloop na goddeloosheid,en hulle is vinnig om onskuldige mense dood te maak.+ Hulle gedagtes is skadelike gedagtes. Hulle veroorsaak verwoesting en laat mense ly.+   Hulle ken nie die weg van vrede nie,en daar is geen geregtigheid in hulle spore nie.+ Hulle maak hulle paaie krom. Niemand wat hulle volg, sal vrede vind nie.+   Daarom is geregtigheid ver van ons afen bereik regverdigheid ons nie. Ons bly hoop op lig, maar kyk! daar is duisternis,en op helder lig, maar ons pad bly donker.+ 10  Soos blindes loop ons voel-voel al langs die muur. Ons steek ons hande uit soos dié wat nie oë het nie.+ Ons struikel in die middel van die dag asof dit nag is. Onder die sterkes is ons net soos die dooies. 11  Ons almal grom aanhoudend soos bere,en soos duiwe bly ons droewig koer. Ons hoop op geregtigheid, maar dit is nie daar nie,op redding, maar dit is ver van ons af. 12  Want ons het dikwels teen u in opstand gekom.+ Elkeen van ons sondes getuig teen ons.+ Want ons besef hoe opstandig ons was,en ons is bewus van ons oortredings.+ 13  Ons het oortree en was ontrou aan Jehovah. Ons het ons rug gedraai op ons God. Ons het van onderdrukking en opstand gepraat.+ Ons het in ons hart leuens uitgedink en dit versprei.+ 14  Daar is nie meer geregtigheid nie,+en regverdigheid is ver van ons af.+ Niemand praat die waarheid* op die openbare plein nie,en daar is nie plek vir eerlikheid nie. 15  Die waarheid* het verdwyn,+en enigiemand wat wegdraai van wat sleg is, word ’n slagoffer. Jehovah het dit gesien, en hy was ontevrede,*want daar was geen geregtigheid nie.+ 16  Hy het gesien dat daar niemand was nie,en hy was verstom dat niemand tussenbeide getree het nie. Daarom het hy redding* gebring,en sy regverdigheid het hom beweeg om op te tree. 17  Toe het hy regverdigheid soos ’n pantser* aangetrek,en hy het die helm van redding* op sy kop gesit.+ Hy het die klere van wraak aangetrek,+en hy het ywer soos ’n mantel* om hom gehang. 18  Hy sal hulle hulle verdiende loon gee:+ woede vir sy teenstanders, straf vir sy vyande.+ En hy sal die eilande terugbetaal vir wat hulle gedoen het. 19  Waar die son ondergaan, sal hulle die naam van Jehovah vrees,en waar die son opkom, sal hulle hom verheerlik,want hy sal kom soos ’n magtige rivierwat deur die gees van Jehovah aangedryf word. 20  “Die Terugkoper+ sal na Sion kom,+na dié in Jakob wat ophou om goddelose dinge te doen,”+ sê Jehovah. 21  “Wat my betref,” sê Jehovah, “dít is my verbond met hulle:+ My gees wat op jou is en die woorde wat ek aan jou gegee het om oor te dra, sal van nou af en tot in alle ewigheid nie weggeneem word van jou, van jou kinders* of van jou kleinkinders* nie,” sê Jehovah.

Voetnote

Of “op leegheid”.
Of “Niemand is eerlik”.
Of “Eerlikheid”.
Lett. “en dit was sleg in sy oë”.
Of “oorwinning”.
’n Beskermende kledingstuk wat deur ’n vegter gedra is.
Of “oorwinning”.
Of “moulose oorkleed”.
Lett. “saad”.
Lett. “van die saad van jou saad”.