Spring na inhoud

Spring na inhoudsopgawe

 DEEL 7

God verlos die kinders van Israel

God verlos die kinders van Israel

Jehovah bring plae oor Egipte, en Moses lei die kinders van Israel uit daardie land uit. God gee Israel die Wet deur middel van Moses

DIE kinders van Israel het jare lank in Egipte gewoon; hulle was voorspoedig en het vermenigvuldig. Maar ’n nuwe Farao het aan bewind gekom. Hierdie heerser het Josef nie geken nie. Hy was ’n wrede tiran wat bang was omdat die Israeliete baie geword het, en daarom het hy slawe van hulle gemaak en beveel dat al hulle pasgebore seuntjies in die Nylrivier verdrink word. Maar ’n dapper moeder het haar babaseuntjie beskerm deur hom in ’n mandjie tussen die riete weg te steek. Farao se dogter het die baba gevind, hom Moses genoem en hom in die Egiptiese koningshuis grootgemaak.

Toe Moses 40 jaar oud was, het hy in die moeilikheid beland omdat hy ’n Israelitiese slaaf teen ’n Egiptiese taakgewer verdedig het. Moses het na ’n verre land gevlug, waar hy as ’n banneling gelewe het. Toe Moses 80 was, het Jehovah hom teruggestuur na Egipte om voor Farao te verskyn en te eis dat God se volk vrygelaat word.

Farao het volstrek geweier. God het dus tien plae oor Egipte gebring. Elke keer dat Moses voor Farao verskyn het om hom die geleentheid te gee om die volgende plaag te voorkom, was Farao uitdagend en het hy minagting vir Moses en sy God, Jehovah, getoon. Uiteindelik het die tiende plaag die dood veroorsaak van al die eersgeborenes in die land—behalwe in gesinne wat Jehovah gehoorsaam het deur die bloed van ’n geofferde lam aan hulle deurposte te smeer. God se engel van vernietiging het hierdie huisgesinne oorgeslaan. Daarna het die Israeliete hierdie wonderlike redding herdenk deur middel van ’n jaarlikse viering wat die Pasga genoem is.

Aangesien ook Farao se eersgebore seun gesterf het, het hy Moses en al die Israeliete beveel om Egipte te verlaat. Hulle het onmiddellik ’n massa-uittog georganiseer. Farao het egter van plan verander. Hy het hulle met baie krygsmanne en strydwaens agternagesit. Die Israeliete was skynbaar vasgekeer by die oewer van die Rooi See. Jehovah het die Rooi See verdeel, wat die Israeliete in staat gestel het om op ’n droë seebedding deur te trek, met watermure aan weerskante! Toe die Egiptenaars agter hulle aan storm, het God die waters laat neerstort en Farao en sy leër laat verdrink.

Later, terwyl die Israeliete se kamp by die berg Sinai was, het Jehovah ’n verbond met hulle gesluit. God het Moses as middelaar gebruik en vir Israel wette gegee om leiding en beskerming in feitlik elke aspek van die lewe te voorsien. Solank Israel God se heerskappy getrou aanvaar het, sou Jehovah met hulle wees en dié nasie ’n seën vir ander maak.

Die meeste Israeliete het egter ’n teleurstellende gebrek aan geloof in God getoon. Gevolglik het Jehovah daardie geslag 40 jaar lank in die wildernis laat rondswerf. Toe het Moses die regskape man Josua as sy opvolger aangestel. Uiteindelik het Israel op die punt gestaan om die land binne te gaan wat God aan Abraham belowe het.

—Gebaseer op Eksodus; Levitikus; Numeri; Deuteronomium; Psalm 136:10-15; Handelinge 7:17-36.