Yehowa Odasefohi jeɔ a tsui mi nɛ a haa yemi kɛ buami nɛ a kɛ fĩɔ fiɛɛmi ní tsumi ɔ se. A he we nɔ́ ko ngɛ wa kpehi a sisi, nɛ wa wui mi dlami nyɔngma. (Mateo 10:7, 8) Mohu ɔ, yemi kɛ buami dakahi ngɛ wa jami he ɔmɛ, nɛ ke nɔ ko suɔ kaa e ma ha yemi kɛ buami ɔ, e kɛ woɔ mi. A tsuɛ nihi nɛ a haa yemi kɛ buami ɔ a biɛ.

Nɔ́ kake nɛ ha nɛ wa bɔɛ hiɔ fuu ɔ ji kaa wa be osɔfohi nɛ wa woɔ mɛ hiɔ. Jehanɛ hu, a wui Odasefo ɔmɛ hiɔ ngɛ a wehi a mi fiɛɛmi ní tsumi ɔ he, nɛ wa jami he ɔmɛ ngɛ kpokploo.

A ngɔɔ yemi kɛ buami saisaa nɛ a kɛ maneɔ Yehowa Odasefohi asafo ɔ ní tsumi kɔni ɔmɛ ɔ kɛ yeɔ bua nihi nɛ oslaa ná mɛ, wa ma se sane kpakpa fiɛɛli, kɛ kpɔ mi nɔ hyɛli, a kɛ e ko hu maa wa jami he ɔmɛ ngɛ mahi nɛ a be nɔ́ ko tsɔ ɔ a mi, nɛ a kɛ eko hu peeɔ womihi kɛ Baiblo nɛ a kɛ maneɔ ma slɔɔtohi.

Nɔ nitsɛ nɛ mwɔɔ e yi mi kpɔ ngɛ yemi kɛ buami nɛ e kɛ ma ha kɛ fĩ asafo nɛ e ngɛ mi ɔ se, aloo e kɛ fĩ je kɛ wɛ ní tsumi ɔ se, aloo enyɔ ɔ tsuo. Daa nyɔhiɔ ɔ, asafohi tsuaa asafo haa nɛ e mi bi leɔ sika nɛ a ná, kɛ níhi nɛ a kɛ sika pee.