Yesu tsɔɔ blɔhi a nɔ nɛ e sa nɛ nɔ ko nɛ e gu nɔ konɛ e ba pee Yehowa Odasefo no ɔ mi ngɛ Mateo 28:19, 20. Ngmami nɛ ɔ tsɔɔ nɔ́ nɛ e sa nɛ nɔ ko nɛ e pee loko e ma nyɛ maa pee Kristo kaselɔ. Eko ji kaa e sa nɛ e kɛ nihi nɛ sɛɛ Yehowa he ní, aloo e ye Yehowa he odase.

1: Moo kase nɔ́ nɛ Baiblo ɔ tsɔɔ. Yesu fã e kaseli ɔmɛ kaa a ‘pee nihi kaseli . . . , a tsɔɔ mɛ ní.’ (Mateo 28:19, 20) Munyungu nɛ ji “kaselɔ” ɔ sisi tutuutu ji “nɔ ko nɛ e ngɛ nɔ́ ko kasee.” Munyuhi fuu ngɛ Baiblo ɔ mi nɛ maa ye bua wɔ konɛ wa ná bua jɔmi ngɛ si himi mi, titli ɔ, Yesu Kristo ní tsɔɔmi ɔmɛ. (2 Timoteo 3:​16, 17) Waa kɛ nihi kaseɔ Baiblo ɔ nɛ wa he we sika. Wa bua maa jɔ kaa wa maa ye bua mo konɛ o kase Baiblo ɔ.​—Mateo 10:​7, 8; 1 Tɛsalonika Bi 2:13.

2: Ngɔɔ nɔ́ nɛ o kase ɔ kɛ tsu ní. Yesu de ke e sa nɛ nihi nɛ a maa kase e he ní ɔ nɛ ‘a ye níhi tsuo nɛ [e] fã mɛ ɔmɛ a nɔ.’ (Mateo 28:20) Enɛ ɔ tsɔɔ kaa Baiblo ɔ nɛ o maa kase ɔ kɛkɛ pi, mohu ɔ, e biɔ nɛ o pee tsakemihi nɛ a he hia ngɛ bɔ nɛ o susuɔ níhi a he ha kɛ o jemi bami mi. (Ní Tsumi 10:42; Efeso Bi 4:22-29; Hebri Bi 10:24, 25) Nihi nɛ a buɔ Yesu famihi tue ɔ mwɔɔ a muɔ a yi mi kpɔ kaa a maa nyɛɛ e se, nɛ a jɔɔ a wami nɔ kɛ haa Yehowa Mawu.​—Mateo 16:24.

3: Ha nɛ a baptisi mo. (Mateo 28:19) Ngɛ Baiblo ɔ mi ɔ, a ngɔ baptisimi kɛ to nɔ pumi he. (Kɛ to Roma Bi 6:​2-4 ɔ he.) Enɛ ɔ tsɔɔ kaa o gbo ha o sa si himi ɔ nɛ o je si himi ehe sisi. Ke o ha nɛ a baptisi mo ɔ, e haa nɛ nihi naa kaa o pee kekleekle níhi enyɔ nɛ Yesu tsɔɔ kaa o pee ɔ, nɛ jehanɛ ɔ hu, o ngɛ bie konɛ Mawu nɛ e ye bua mo nɛ o ná he nile kpakpa.​—Hebri Bi 9:​14; 1 Petro 3:​21.

Kɛ ma plɛ kɛ le kaa ye he su kɛ ha baptisimi ha kɛɛ?

O kɛ asafo mi nikɔtɔma amɛ nɛ sɛɛ he ní. A kɛ mo ma susu he konɛ a hyɛ ke ji o nu nɔ́ nɛ baptisimi tsɔɔ sisi, o kɛ nɔ́ nɛ o kaseɔ ngɛ ní tsue, nɛ o je mo nitsɛ o suɔmi mi nɛ o jɔɔ o wami nɔ kɛ ha Mawu lo.​—Ní Tsumi 20:28; 1 Petro 5:​1-3.

Anɛ e he hia nɛ Odasefohi a bimɛ nɛ a pee ní nɛ ɔmɛ lo?

Ee. Wa tsɔseɔ wa bimɛ ɔmɛ “ngɛ Yehowa tsɔsemi kɛ e ga womi mi.” (Efeso Bi 6:4) Se ke a ngɛ waeɔ, e sa nɛ mɛ nitsɛmɛ a mwɔ a yi mi kpɔ kaa a maa kase Baiblo ɔ, a maa kplɛ níhi a ngɛ kasee ɔ nɔ, nɛ a kɛ ma tsu ní ngɛ a si himi mi. Lɔ ɔ se loko a he maa su kɛ ha baptisimi. (Roma Bi 12:2) Anɔkuale sane ni kaa, ke nɔ ko suɔ kaa e ma sɔmɔ Mawu jio, e be Mawu sɔmɔe jio, lɛ nitsɛ nɛ e maa mwɔ e yi mi kpɔ ngɛ lɔ ɔ he.​—Roma Bi 14:12; Galatia Bi 6:5.