Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

Ke Oslaa Ba a, Suɔmi Haa Nɛ Wa Yeɔ Bua

Ke Oslaa Ba a, Suɔmi Haa Nɛ Wa Yeɔ Bua

Ke oslaa ko ba a, Yehowa Odasefohi kɛ yemi kɛ buami haa a nyɛmimɛ Odasefohi kɛ nihi nɛ a pi Odasefohi hulɔ. A peeɔ jã kɛ tsɔɔ kaa a ngɛ suɔmi. Suɔmi ji su ko nɛ kadiɔ anɔkuale Kristofohi.Yohane 13:35.

Amaniɛ bɔmi nɛ nyɛɛ se nɛ ɔ tsɔɔ yemi kɛ buami slɔɔtohi nɛ wa kɛ ha nihi ngɛ 2011 kɛ 2012 ɔ pɛ mi. Bua womi munyuhi nɛ ngɛ Baiblo ɔ mi nɛ waa kɛ yeɔ bua nihi ngɛ oslaa behi a mi ɔ piɛɛ we amaniɛ bɔmi nɛ ɔ he. Asafo ɔ ní tsumi kɔni ɔ hla Oslaa Be Mi Yemi Kɛ Buami Ajla Toli konɛ a to yemi kɛ buami he blɔ nya. Jehanɛ se hu ɔ, asafohi nɛ a ngɛ he nɛ oslaa a ba ngɛ ɔ yeɔ bua.

Japan

Japan: Ngɛ March 11, 2011 ɔ, zugba mimiɛmi kɛ zugba mimiɛmi nɛ yaa nɔ ngɛ wo mi ɔ kpata nihi babauu a níhi hɛ mi ngɛ Japan yiti je. Yehowa Odasefohi ngɛ je kɛ wɛ ɔ je a tsui mi faa nɛ a ngɔ a sika kɛ níhi nɛ a ngɛ kɛ ha, nɛ a ti ni komɛ hu ngɔ a he kɛ ha konɛ a ya ye bua nihi nɛ oslaa a ná mɛ ɔ. Moo hyɛ video nɛ wa pee nɛ tsɔɔ bɔ nɛ wa ye bua ha benɛ zugba mimiɛ ngɛ Japan ɔ.

Brazil: Benɛ hiɔmi ngua ko nɛ, nɛ zugba a ku wo mi ɔ, mɔsɔ ɔ gbe nihi babauu. Enɛ ɔ ha nɛ Yehowa Odasefohi ngɔ niye ní nɛ puɛ we mla tɔn 42, tɔ mi nyu kakaaka 20,000, tadehi tɔn 10 kɛ tsopahi nɛ a kɛ fɔɔ níhi a he tɔn 5 ya ha nihi nɛ oslaa nɛ ɔ ba a nɔ ɔ. A ngɔ hiɔ tsami tsopahi kɛ ní kpahi hu kɛ ya ye bua.

Congo (Brazzaville): Benɛ oplɛmi ko fɛ ɔ, e hule Yehowa Odasefohi 4 a wehi, nɛ e puɛ Odasefohi kpahi 28 hu a wehi. Enɛ ɔ he ɔ, Odasefo ɔmɛ ngɔ niye ní kɛ tadehi kɛ ya ha nihi nɛ oslaa a ba a nɔ ɔ, nɛ a ha mɛ hwɔ he.

Congo (Kinshasa): A ngɔ tsopahi kɛ ya ha nihi nɛ a ná mi mi plɛmi hiɔ. A ha nihi nɛ nyu je mɛ ɔ tadehi. Nɛ jehanɛ se hu ɔ, a ha nihi nɛ ta je mɛ ɔ tsopahi, dumi wuhi, kɛ tade fuu.

Venezuela: Benɛ hiɔmi ngua ko nɛ ɔ, nyu ɔ je nihi fuu nɛ e ngɔ mɔsɔ hu kɛ ba. Oslaa be mi yemi kɛ buami ajla toli ɔmɛ ye bua Odasefohi 288 nɛ oslaa a ná mɛ ɔ. A ma tsu ehehi nɛ hiɛ pe 50. Jehanɛ se hu ɔ, yemi kɛ buami ajla toli ɔmɛ ngɛ nihi nɛ Valencia Taku nɛ ngɛ hyie ɔ ma nyɛ ma puɛ a wehi ɔ ye buae.

Philippines

Philippines: Hiɔmi kɛ ahumi nɛ nya wa puɛ níhi ngɛ ma a mi he komɛ. Asafo ní tsumi kɔni ɔ ngɔ niye ní kɛ tade kɛ ya ha nihi nɛ oslaa a ba a nɔ ɔ, nɛ benɛ nyu ɔ mii ta a, Odasefohi nɛ a ngɛ ma a mi ɔ ya ye bua kɛ dla hehi nɛ oslaa a ba ngɛ ɔmɛ.

Canada: Benɛ la ko nɔ hue tso mi ngɛ Alberta a, Odasefohi nɛ a ngɛ jamɛ a kpokpa a nɔ ɔ ngɔ sika kɛ mane Slave Lake Asafo ɔ konɛ a kɛ tsu nyagba a he ní. Akɛnɛ sika a hiɛ pe bɔ nɛ asafo ɔ maa hia he je ɔ, a ngɔ sika a mi hiɛhiɛɛ kɛ ha konɛ a kɛ ye bua nihi nɛ oslaa ná mɛ ngɛ je ɔ mi he kpahi.

Côte d’Ivoire: Loko ta ko te si ngɛ ma a mi, kɛ benɛ ta a ngɛ nɔ yae ɔ, a ha nihi níhi nɛ maa hia mɛ. A ha nihi hwɔ he, nɛ a hyɛ nihi ngɛ hiɔ tsami blɔ fa mi hulɔ. A tsa nɔ nɛ a pee jã ngɛ ta a se po.

Fiji: Hiɔmi ngua ko nɛ, nɛ e puɛ Odasefohi 192 a ngmɔhi nɛ a náa niye ní kɛ sika kɛ jeɔ mi ɔ. Enɛ ɔ he ɔ, oslaa be mi yemi kɛ buali ya ye bua mɛ kɛ niye ní kɛ ní kpahi.

Ghana: Benɛ nyu je ni komɛ ngɛ pu je he blɔ ɔ, a ha ni ɔmɛ niye ní kɛ dumi wu, nɛ a dla a tsuhi kɛ ha mɛ.

United States: Lasiogblee ko puɛ Odasefohi a wehi 66, nɛ e hule a wehi 12 hulɔ. E ngɛ mi kaa wetsɛmɛ ɔmɛ a ti nihi fuu pee a we ɔmɛ a he insurance mohu lɛɛ, se Odasefohi kpahi ngɔ sika kɛ ya ye bua nihi nɛ oslaa a ba a nɔ ɔ.

Argentina: Benɛ yoku ko pɛ́ nɛ e puɛ Yehowa Odasefohi nɛ a ngɛ ma a woyi je blɔ a wehi ɔ, Yehowa Odasefohi nɛ a ngɛ ma a mi ɔ ye bua mɛ.

Mozambique: A ha nihi nɛ a he hiɛ pe 1,000 niye ní ngɛ hwɔ be mi.

Nigeria: A ngɔ sika kɛ ye bua Odasefohi 24 nɛ a plaa ngɛ lɔle oslaa ko mi. Jehanɛ hu benɛ wɛtsohi a kpɛti ta ko ba ngɛ ma a yiti je nɛ nihi si a wehi ɔ, Yehowa Odasefohi ye bua mɛ.

Benin: Benɛ hiɔmi ngua ko nɛ, nɛ nyu je nihi ɔ, Yehowa Odasefohi ha ni ɔmɛ tadehi, mudɔ, nyu kpakpa, kɛ hwɔ he.

Dominican Republic

Dominican Republic: Benɛ kɔɔhiɔ ko nɛ nya wa fia kɛ puɛ ní se ɔ, Yehowa Odasefohi nɛ a ngɛ lejɛ ɔ ngɔ a he kɛ ha faa kɛ dla nihi a wehi.

Ethiopia: Benɛ hwɔ ba ngɛ hehi e nyɔ, nɛ nyu je nihi ngɛ he kpa ko ɔ , Yehowa Odasefohi ngɔ sika kɛ ya ye bua nihi nɛ haomi nɛ ɔmɛ ba a nɔ ɔ.

Kenya: Yehowa Odasefohi ngɔ sika kɛ ya ye bua ngɛ hehi nɛ hwɔ ba ngɛ ɔ.

Malawi: Wa ye bua nihi nɛ ta je mɛ nɛ a ngɛ Dzaleka wesa he ɔ.

Nepal: Benɛ zugba ku wo mi nɛ e puɛ Odasefo no ko we ɔ, Odasefo ɔmɛ pee tsu nɛ e maa hi mi lolo kɛ ha lɛ, nɛ nihi nɛ e kɛ mɛ ngɛ asafo kake mi ɔ hu ye bua lɛ.

Papua New Guinea: Basabasa peeli komɛ sã Yehowa Odasefohi a wehi kakaaka kpaanyɔ. Odasefo ɔmɛ to blɔ nya nɛ a kpale ma a nyɛmimɛ ɔmɛ a we ɔmɛ kɛ ha mɛ.

Romania: Benɛ nyu je Odasefohi komɛ ɔ, a to blɔ nya nɛ a kpale ma a we ɔmɛ ha mɛ.

Mali: Hiɔmi nɛ́, nɛ lɔ ɔ ha nɛ ngmɔ ɔmɛ bɛ ní saminya. Enɛ ɔ kɛ hwɔ ba. Benɛ e ba jã a, Odasefohi nɛ a ngɛ Senegal ɔ bua sika nya nɛ a kɛ ya ye bua nihi ngɛ Mali ma a mi.

Sierra Leone: Odasefohi nɛ a ji dɔkitahi nɛ a je France ɔ ye bua Yehowa Odasefohi nɛ a ngɛ hehi nɛ be ko nɛ be ɔ, nihi hwu ta ngɛ ɔ ngɛ hiɔ tsami blɔ fa mi.

Thailand: Nyu kpata níhi babauu a hɛ mi ngɛ kpokpa komɛ a nɔ. Yehowa Odasefohi a yemi kɛ buami kuuhi ya dla wehi 100, kɛ Matsɛ Yemi Asahi 6.

Czech Republic: Benɛ hiɔmi ngua ko nɛ ɔ, e puɛ wehi fuu ngɛ Czech Republic. Odasefohi nɛ a ngɛ Slovakia a ye bua nihi nɛ oslaa nɛ ɔ ná mɛ ɔ.

Sri Lanka: Odasefohi ye bua nihi fuu nɛ zugba mimiɛmi nɛ yaa nɔ ngɛ wo mi ɔ puɛ a níhi ɔ.

Sudan: Akɛnɛ ta nɛ a ngɛ hue ngɛ ma a mi ɔ ha nɛ nihi a níhi tsuo bɔ mɛ he je ɔ, Yehowa Odasefohi ngɔ niye ní, tade, tokota, kɛ ní kpahi kɛ mane a nyɛmimɛ ɔmɛ ngɛ lejɛ ɔ.

Tanzania: Benɛ hiɔmi ngua ko nɛ ɔ, wekuhi 14 nɛ a ji Odasefohi ɔ a nɔ́ fɛɛ nɔ́ hɛ mi kpata. Asafohi nɛ ngɛ lejɛ ɔ ngɔ tadehi kɛ ní kpahi ya ha mɛ. Nɛ a ma we ko nɛ puɛ ɔ ekohu.

Zimbabwe: Hiɔmi nɛ́, nɛ lɔ ɔ ha nɛ hwɔ ba ngɛ ma a mi he komɛ. A ngɔ niye ní kɛ sika kɛ ya ha nihi nɛ haomi nɛ ɔ ba a nɔ ɔ.

Burundi: A hyɛ nihi nɛ ta je mɛ ɔ ngɛ hiɔ tsami blɔ fami, nɛ a ye bua mɛ ngɛ blɔ kpahi fuu a nɔ.