Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

Hue Tso Kɛ E Mi Lohwehi A He Piɛ Pomi Ngɛ Warwick

Hue Tso Kɛ E Mi Lohwehi A He Piɛ Pomi Ngɛ Warwick

Yehowa Odasefohi je a ní tsumi yi ehe ɔ mami sisi ngɛ Sterling Forest Lake (Blue Lake) kasa nya ngɛ New York kɔpe ko mi. Kɛ a plɛ kɛ ngɛ hue tso nɛ ngɛ lejɛ ɔ kɛ lohwehi nɛ a ngɛ mi ɔ a he piɛ poe kɛɛ?

Akɛnɛ Odasefo ɔmɛ sume nɛ a gbe lohwe ɔmɛ loo a ye mɛ awi he je ɔ, a po piɛ kɛ bɔle he nɛ a ngɛ tsu ɔ mae ngɛ ɔ, konɛ sangahi kɛ aluhi loo koluehi nɛ a ngɛ hue tso ɔ mi ɔ ko ba tsu mami he ɔ. Ngɛ be kɛ behi a mi ɔ, ní tsuli ɔmɛ hyɛɛ piɛ ɔ kaa alini puɔ ko be he ko nɛ lohwe ɔmɛ ma nyɛ maa gblee mi kɛ sɛ tsu mami he ɔ lo. Ke a gbe tsu ɔ mami nya a, a ma je piɛ ɔ. Se ke e ba kaa a na sanga ko ngɛ lejɛ ɔ, a ma ha nɛ nɔ ko nɛ a tsɔse lɛ, nɛ e le sinɔ he ga nɛ ngɔ lɛ kɛ ya he ko banee.

Eastern bluebird

A hɛ tsohi nɛ ngɛ lejɛ ɔ ngɛ fĩɛ be mi konɛ a ko gba lohwe pɛlitsɛmɛ nɛ a bu hlui nɔ ɔ a nya. Lohwe pɛlitsɛ ko nɛ pɔ he ngɛ lejɛ ɔ ji eastern bluebird. Ke a ma tsu ɔmɛ ta a, a maa pee dakahi ngɛ hehi nɛ a hɛ tsohi ngɛ ɔ, konɛ ke lohwe pɛlitsɛmɛ ɔ kpale kɛ ba a, a na he ko nɛ a maa pee a tsu ngɛ.

Jehanɛ hu ɔ, kɛ je October kɛ ya si March ɔ, a maa gba he komɛ nɛ a ma dla lejɛ ɔ konɛ hyssop skullcap nɛ e ji mɔmɔ ko nɛ e hɛɛ alamua tu su nɛ puɛ ngɛ lejɛ ɔ. E ngɛ mi kaa kɛ je jeha 2007 ɔ mi kɛ ma nɛ ɔ, a nɛ́ mɔmɔ nɛ ɔ eko ngɛ lejɛ ɔ mohu lɛɛ, se kɛ̃ ɔ, a kɛ blɔ nya tomi nɛ ɔ ngɛ ní tsue.

Lo slɔɔtohi kaa denɔ, lue kɛ lo kpahi ngɛ taku ko nɛ a tsɛɛ ke Sterling Forest Lake nɛ ngɛ wa zugba a kasa nya a mi. Pa nɔ dɔkɔdɔkɔ loo kpakpahe hu ngɛ lejɛ ɔ. Bɔ nɛ pee nɛ a baa taku nɛ ɔ yi ɔ, tsu mali ɔmɛ to kaa a maa ngɔ tsu mami he ga ko kɛ tsu ní. A ma du nga mumu ngɛ tsu ɔmɛ a yi mi konɛ ke hiɔmi nɛ ɔ, e do nyu ɔ nɔ loko e ya sɛ taku ɔ mi. Jehanɛ hu ɔ, a ngɛ mɔde bɔe konɛ a po hue tso nɛ bɔle taku ɔ he piɛ.

Odasefo no ko nɛ e kɛ e he wo tsu mami ní tsumi nɛ ɔ mi ɔ de ke, “E ngɛ mi kaa jã peemi maa ngɔ be fuu mohu lɛɛ, se wa ngɛ mɔde bɔe kaa wa maa baa adebɔ níhi nɛ ngɛ Warwick ní tsumi he ɔ yi.”