Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

A Fiɛɛ Ngɛ Xingu Pa a Se

A Fiɛɛ Ngɛ Xingu Pa a Se

Ngɛ July 2013 ɔ mi ɔ, Yehowa Odasefohi 28 komɛ nɛ a ngɛ São Félix do Xingu ngɛ Brazil ɔ hia blɔ kɛ ya Cayapo kɛ Yuruna zugba kpɔ ɔ mi. A hi lɛ ko nɛ e kami maa pee gugue 8 mi, nɛ a po Xingu Pa a kɛ ya e yiti je. Pa nɛ ɔ kami ji kilomita 2,092, nɛ e ya sɛɛ Amazon Pa a mi.

Fiɛɛli nɛ ɔmɛ ya fiɛɛ Mawu Matsɛ Yemi ɔ he sane kpakpa a ngɛ kɔpehi nɛ ngɛ pa nɛ ɔ se ɔ. Ngɛ ligbi etɛne ɔ nɔ ɔ, fiɛɛli ɔmɛ ya su Kokraimoro kɔpe ɔ mi. Nihi nɛ a ngɛ kɔpe ɔ mi ɔ he mɛ hɛ mwɔ, nɛ a pee mɛ nibwɔ. Yo ko nɛ a ya na lɛ ngɛ lejɛ ɔ ngɔ e nine kɛ pee mɛ okadi. Nyumu ko nɛ e je jamɛ a kpɔ ɔ mi nɛ e nyɛɛ a hɛ mi ɔ tsɔɔ mɛ nɔ́ nɛ yo ɔ pee ɔ sisi: “Yo ɔ ke: ‘Nyɛ tsuo nyɛɛ ba. Wa suɔ nɛ waa le nyɛ tsuo!’”

Odasefo ɔmɛ kɛ nɔ tsuaa nɔ tu munyu. A kɛ ni komɛ tu munyu ngɛ Potokii gbi mi, nɛ ni komɛ hu lɛɛ, a kɛ a nine lɛ pee mɛ okadi kaa bɔ nɛ mumuihi peeɔ ɔ. Baiblo kasemi womihi nɛ fonihi ngɛ mi nɛ a kɛ ya a ye bua mɛ wawɛɛ. Nihi babauu ngɔ womi ɔmɛ eko, titli Bu Mawu Tue womiyo ɔ.

Gerson, ji blɔ gbalɔ klɛdɛɛ ngɛ São Félix do Xingu. E kai bɔ nɛ nyumu ko bua jɔ Ye Womi Nɛ Sɛɛɔ Baiblo Mi Sanehi womi ɔ he ha a. Gerson de ke: “E hyɛ womi ɔ too, nɛ e ngɔ e nine enyɔ kɛ pɛtɛ he wawɛɛ; nɛ e sume nɛ e maa ngmɛɛ he kɛ fɔ si po.”

Yehowa Odasefo ɔmɛ gba womihi, womi tɛtlɛɛhi, kɛ womiyohi maa pee 500 kɛ ha nihi ngɛ pa a se. Benɛ a ya Kawatire kɔpe ɔ mi ɔ, nihi bu Baiblo sɛ gbi nɛ kɔɔ paradeiso he ɔ tue saminya. Tonjaikwa nɛ e ji Cayapo no ɔ po e yi mi nɛ e de ke, “Lɛɛ nihi nɛ a maa hi si ngɛ Paradeiso ɔ maa hi si kaa wɔ.”

São Félix do Xingu bi fuu nu Odasefo ɔmɛ a blɔ hiami ɔ he. Simone nɛ e piɛɛ blɔ hiali ɔmɛ a he ɔ de ke, ye ma mi bi ɔmɛ ekomɛ he we yi kaa nihi ma he wɔ hɛ muɔ ngɛ kɔpe ɔmɛ a mi. Se waa kɛ nyagba ko kpi. Simone de ke: “Ni ɔmɛ he wɔ atuu, nɛ wa fiɛɛ ha mɛ tsuo.”