Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

Blɔ Hiami Nɛ Ye Hɛ Be Nɔ Jee Gblee

Blɔ Hiami Nɛ Ye Hɛ Be Nɔ Jee Gblee

Daa jeha a, nihi akpehi abɔ ya slaa Yehowa Odasefohi a ní tsumi kɔni ɔ, kɛ a ní tsumi yi ɔ ngɛ New York, United States. A tsɛɛ he nɛ ɔmɛ ke Betel. Betel ji Hebri biɛ nɛ e sisi ji “Mawu we.” Nihi jeɔ hehi tsitsaa nɛ a ya hyɛɛ bɔ nɛ a peeɔ wa womi ɔmɛ ha, bɔ nɛ a to wa ní tsumi ɔ he blɔ nya ha, nɛ a ya slaa a huɛmɛ nɛ a tsuɔ ní ngɛ lejɛ ɔ hulɔ. Be ko ɔ, nyumu ko pee e juɛmi kaa e maa hia blɔ konɛ e ya hyɛ lejɛ ɔ.

A tsɛɛ lɛ ke Marcellus. E ji Yehowa Odasefo no nɛ e ngɛ Anchorage, Alaska ngɛ U.S.A. Jeha komɛ nɛ be ɔ, hiɔ ko fia lɛ, lɔ ɔ he ɔ, amlɔ nɛ ɔ, e nyɛ we munyu tumi kpakpa ko. * E nyɛ we nyɛɛmi. Ja e hi sɛ mi nɛ nɔ ko tsɛ̃ lɛ, nɛ a peeɔ nɔ́ tsuaa nɔ́ kɛ haa lɛ. Ngɛ e si fɔfɔɛ nɛ ɔ tsuo se ɔ, e suɔ nɛ e ya hyɛ Betel. Lingmi nɛ ɔ, nɔ́ nɛ e ngɛ hlae ɔ ba mi ha lɛ.

Corey nɛ e ji Marcellus huɛ nɛ e ye bua lɛ kɛ to blɔ hiami ɔ he blɔ nya a de ke, “E kɔni mi jɔ we. E pɔɔ mi tsɛmi konɛ e le he nɛ wa blɔ nya tomi ɔ su. Be tsuaa be nɛ Marcellus ma tsɛ mi ngɛ fon nɔ ɔ, i biɔ lɛ sanehi fuu loko i naa nɔ́ nɛ e ngɛ hlae nɛ e de mi, ejakaa nɔ́ nɛ e nyɛɔ deɔ pɛ ji ‘Ee’ loo ‘Dɛbi’.” A ní sɛɛmi ngɛ kaa kikɛ:

“O suɔ nɛ ma ba lo?”

“Dɛbi.”

“Ma tsɛ dɔkita a ha mo lo?”

“Dɛbi.”

“E kɔɔ Betel nɛ wa ke wa maa ya a he lo?”

“Ee.”

“Kɛkɛ i tsɔɔ lɛ he nɛ wa blɔ hiami ɔ he blɔ nya tomi ɔ su. Ye bua jɔ kaa nyagbenyagbe ɔ, e nyɛ nɛ e ya hyɛ Betel.”

Marcellus kɛ nyagbahi fuu kpe loko e nyɛ nɛ e hia e blɔ ɔ. Akɛnɛ sika nɛ e náa daa nyɔhiɔ ɔ pi he je ɔ, e kɛ jeha enyɔ lɛ to sika si loko e nyɛ nɛ e hi ɛloplee mi kɛ po blɔ nɛ ji si tomi 3,400 kɛ ya New York. Akɛnɛ e be he wami he je ɔ, e sa nɛ e ná nɔ ko nɛ e kɛ lɛ maa ya nɛ e kɛ lɛ maa ba. Se loko e ma nyɛ maa ya a, ja e dɔkita a kplɛɛ nɔ. Benɛ e piɛ ligbi etɛ ko nɛ be ɔ maa su ɔ, e dɔkita a de lɛ ke e ma nyɛ maa ya.

Benɛ Marcellus ya su New York ɔ, a ha nɛ nɔ ko kɛ lɛ slaa si ngɛ wa ní tsumi hehi nɛ ngɛ Brooklyn, Patterson, kɛ Wallkill ɔ. Ngɛ si slaami ɔ mi ɔ, e na womihi kɛ Baiblo fiami klama nguahi, nɛ e kase bɔ nɛ a to wa ní tsumi ɔ he blɔ nya ha. Jehanɛ hu ɔ, e na blema níhi nɛ a ngɔ kɛ to nɛ nihi ba hyɛɛ nɛ́ eko ji, “Baiblo ɔ Kɛ Mawu Biɛ ɔ” kɛ “Nihi Nɛ Yehowa Ngɔ E Biɛ Kɛ Fɔ A Nɔ” ɔ. Benɛ e ke jee lejɛ ɔ, e ná huɛmɛ fuu. Niinɛ, e ji blɔ hiami nɛ e hɛ be nɔ jee gblee!

Nihi fuu deɔ ke, ke a ya hyɛ Betel ɔ, bua jɔmi nɛ a náa a hí kalemi. Se benɛ a bi Marcellus ke e bua jɔ Betel nɛ ya a he lo ɔ, e de ke: “Ee. Ee. Ee!”

Ke o kɛ o weku ɔ ya slaa si ngɛ Betel ɔ, nyɛ bua maa jɔ wawɛɛ kaa bɔ nɛ Marcellus bua jɔ ɔ. Nɔ tsuaa nɔ ma nyɛ ma ya slaa si ngɛ wa ní tsumi kɔnihi nɛ ngɛ je kɛ wɛ ɔ eko tsuaa eko mi. Moo ba nɛ o ba slaa wɔ.

^ kk. 3 Marcellus gbo ngɛ May 19, 2014 benɛ a ngɛ munyu nɛ ɔ ngmae ɔ.