Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

A Peeɔ Womihi Babauu Konɛ A Kɛ Tsɔɔ Nihi Mawu He Ní Ngɛ Je Kɛ Wɛ

A Peeɔ Womihi Babauu Konɛ A Kɛ Tsɔɔ Nihi Mawu He Ní Ngɛ Je Kɛ Wɛ

Ngɛ je ɔ mi tsuo ɔ, nihi kaneɔ Yehowa Odasefohi a womihi. Nihi ayɔhi abɔ kaneɔ ngɛ intanɛti ɔ nɔ kaa bɔ nɛ o ngɛ pee amlɔ nɛ ɔ. Ke wa de mo womihi abɔ nɛ wa peeɔ ɔ, e maa pee mo nyakpɛ. Kɛ je jeha 2013 kɛ ma nɛ ɔ, wa peeɔ Baiblo kasemi womihi ngɛ gbihi maa pee 700 a mi, nɛ wa gbaa ngɛ je mahi 239 a mi.

Sisije ɔ, loko jeha 1920 maa su ɔ, jinɛ wa bɔɔ womi peemi ní tsumi kuu komɛ apaa nɛ a fiaa wa womi ɔmɛ kɛ haa wɔ. Jamɛ a jeha a mi nɔuu nɛ wɔ nitsɛmɛ wa bɔni wa womi tɛtlɛɛhi kɛ womi wawi peemi ngɛ Brooklyn, New York ngɛ tsu nyafii ko nɛ wa hai ɔ mi. Wa je sisi nyafii, se amlɔ nɛ ɔ, wa ngɛ womi fiami hehi 15 ngɛ Afrika, Asia, Australia, Yuropa, North Amerika, kɛ South Amerika.

Womi Nɛ E He Hia Pe Kulaa

Womi nɛ e he hia pe kulaa nɛ wa fiaa ji Baiblo ɔ. Wa fia kekle nɔ́ ɔ, ngɛ jeha 1942 mi, nɛ lɔ ɔ ji King James Version, Blɛfo gbi nɔ́ ɔ. Se kɛ je jeha 1961 ɔ, Yehowa Odasefohi pee New World Translation of the Holy Scriptures ɔ, nɛ a fia babauu. Benɛ e ke suu jeha 2013 ɔ, wa fia Baiblo nɛ ɔ pe ayɔ 184 ngɛ gbi 121 a mi.

Se ngɛ Baiblo abɔ nɛ ɔ nɛ wa pee ɔ tsuo se ɔ, nɔ́ kpa ko hu ngɛ. Baiblohi nɛ wa peeɔ ɔ se kɛɛ wawɛɛ. Akɛnɛ acid be pepa nɛ waa kɛ pee Baiblo ɔ mi he je ɔ, ke Baiblo ɔ se kɛ po ɔ, pepa a be tsakee nɛ e pee kaa kungwɔ zɔ, nɛ wa peeɔ Baiblo ɔ saminya. Enɛ ɔ haa nɛ Baiblohi nɛ wa peeɔ ɔ puɛ we mla.

Womi Kpahi

Jehanɛ hu wa peeɔ womi kpahi konɛ e ye bua nihi nɛ a nu Baiblo ɔ sisi. Moo hyɛ jeha 2013 akɔtaa bumi ko:

  • A peeɔ Hwɔɔmi Mɔ womi tɛtlɛɛ ɔ ngɛ gbihi nɛ hiɛ pe 210 a mi, nɛ e ji womi nɛ a gbaa ngɛ je ɔ mi pe womi kpahi. A fiaa womi tɛtlɛɛ nɛ hɛɛ ba fa 16 nɛ ɔ maa pee 45,000,000 daa nyɔhiɔ.

  • Ngɛ Hwɔɔmi Mɔ ɔ se ɔ, Awake! womi tɛtlɛɛ ɔ ji womi enyɔne nɛ a gbaa ngɛ je ɔ mi pe womi kpahi tsuo, nɛ a peeɔ ngɛ gbi 99 a mi. Daa nyɔhiɔ ɔ, a fiaa maa pee 44,000,000.

  • Mɛni Tutuutu Ji Baiblo ɔ Tsɔɔmi? womi ɔ hɛɛ ba fa 224. A pee womi nɛ ɔ konɛ e ye bua nihi nɛ a nu Baiblo mi anɔkuale ɔ sisi. Kɛ je jeha 2005 ɔ, a fia womi nɛ ɔ ayɔ 214 kɛ se ngɛ gbi 240 a mi.

  • Bu Mawu Tue womiyo ɔ hu hɛɛ ba fa 32, nɛ a pee kɛ ha nihi nɛ a li ní kanemi kpakpa ko. Fonihi nɛ ngɛ fɛu nɛ ngɛ womiyo nɛ ɔ mi ɔ yeɔ bua nihi nɛ a nuɔ Baiblo mi anɔkuale ɔ sisi. A pee womiyo nɛ ɔ ayɔ 42 kɛ se ngɛ gbi 400 a mi.

Jehanɛ se hu ɔ, Yehowa Odasefohi pee womi slɔɔtohi, womiyohi, kɛ dɛ womi kpahi kɛ ha nihi nɛ a ngɛ Baiblo ɔ kasee ɔ, konɛ a nyɛ nɛ a da a nyagbahi a nya, nɛ a ná a sane bimihi a heto, kɛ weku si himi nɛ ngɛ bua jɔmi. Ngɛ jeha 2012 mi ɔ, Yehowa Odasefohi fia womi tɛtlɛɛhi maa pee ayɔ akpe kake kɛ fa, kɛ womihi kɛ Baiblo ayɔ 80 kɛ se.

Ngɛ jeha 2012 mi ɔ, Yehowa Odasefohi fia womi tɛtlɛɛhi maa pee ayɔ akpe kake kɛ fa, kɛ womihi kɛ Baiblo ayɔ 80 kɛ se

Ke nihi ba hyɛ wa womi fiami he ɔmɛ ɔ, e peeɔ mɛ nyakpɛ kaa a naa nihi nɛ a tsuɔ ní wawɛɛ. Nyumuhi kɛ yihi nɛ a tsuɔ ní ngɛ he nɛ ɔmɛ ɔ ngɔ a he kɛ ha faa. Loko a kpɛti nihi fuu ba Betel nɛ ji “Mawu we” ɔ, a li womi peemi he nɔ́ ko. Se tsɔsemi nɛ a náa ngɛ Betel daa a yeɔ bua mɛ nɛ a tsuɔ ní saminya. Kaa nɔ hyɛmi nɔ́ ɔ, wa ngɛ klamahi nɛ a he sɔɔ wawɛɛ nɛ a ma nyɛ maa pee womi tɛtlɛɛhi 200,000 ngɛ ngmlɛfia kake pɛ mi. Se nihewi nɛ a yi jeha 30 titli nɛ a kɛ klama nɛ ɔmɛ tsuɔ ní.

Jije Wa Náa Sika Ngɛ?

Ngɛ je ɔ mi tsuo ɔ, nihi jeɔ a tsui mi nɛ a haa yemi kɛ buami kɛ fĩɔ ní nɛ Yehowa Odasefohi ngɛ tsue ɔ se. August 1879 Zion’s Watch Tower, nɛ amlɔ nɛ ɔ wa tsɛɛ lɛ Hwɔɔmi Mɔ ɔ de ke: “Wa he ye kaa YEHOWA fĩ ‘Hwɔɔmi Mɔ’ ɔ peemi se, lɔ ɔ he ɔ, wa be sika bae ngɛ nihi a dɛ kɔkɔɔkɔ.” Loloolo ɔ, jã ji bɔ nɛ wa susu.

Mɛni he je nɛ wa ngɔɔ wa he wami, wa be, kɛ sika fuu kɛ woɔ ní tsumi nɛ ɔ mi ɔ? Ejakaa, ke o kane Baiblo kɛ womihi ayɔhi abɔ nɛ wa fia, aloo nɔ́ nɛ wa ngɔ kɛ fɔ wa intanɛti ní tsumi he ɔ nɔ ɔ, wa he ye kaa e maa ye bua mo nɛ o maa hɛ kɛ su Mawu he.