Kekleekle Womi Kɛ Ya Ha Korintobi Ɔmɛ 7:1-40
7 Jehanɛ ɔ, kɛ kɔ níhi nɛ nyɛ ngma a he ɔ, e hi wawɛɛ kaa nyumu be yo he tae;*
2 se akɛnɛ ajuama bɔmi* pɔ he wawɛɛ he je ɔ, nyumu fɛɛ nyumu nɛ e ná lɛ nitsɛ e yo,+ nɛ yo fɛɛ yo nɛ e ná lɛ nitsɛ e huno.+
3 Huno ɔ nɛ e ngɔ nɔ́ nɛ ji e yo ɔ blɔ nya nɔ́ ɔ kɛ ha lɛ, nɛ yogbayo ɔ hu nɛ e pee jã nɔuu kɛ ha e huno ɔ.+
4 Yogbayo ɔ be he wami ngɛ lɛ nitsɛ e nɔmlɔ tso ɔ nɔ, se e huno ɔ lɛ e ngɛ he wami ngɛ nɔ; jã kɛ̃ lɛ huno ɔ hu be he wami ngɛ lɛ nitsɛ e nɔmlɔ tso ɔ nɔ, se e yo ɔ lɛ e ngɛ he wami ngɛ nɔ.
5 Huno kɛ e yo ko tsi a he nya kaa a kɛ a sibi be bɔmi náe, ja mɛ ni enyɔ ɔmɛ tsuo a kplɛɛ kaa a maa pee jã kɛ ya si be ko, konɛ a ná be kɛ ha sɔlemi, kɛkɛ lɔ ɔ se ɔ, a ma nyɛ ma ná bɔmi ekohu, bɔ nɛ pee nɛ he nɔ yemi nɛ nyɛ be ɔ he je ɔ, Satan nɛ ko ya nɔ nɛ e hi nyɛ kae.
6 Se nɔ́ nɛ i ngɛ dee nɛ ɔ ji he blɔ kɛkɛ nɛ i ngɛ nyɛ hae, se pi kita.
7 I ná nɛ nyumuhi tsuo ngɛ kaa imi. Se kɛ̃ ɔ, nɔ fɛɛ nɔ ngɛ lɛ nitsɛ e nike ní+ nɛ e ná kɛ je Mawu ngɔ, nɔ kake nɔ́ ngɛ kikɛ nɛ ɔ, nɛ nɔ kpa hu nɔ́ ngɛ kikɛ nɛ ɔ.
8 Jehanɛ ɔ, i ngɛ nihi nɛ a sɛ we gba si himi mi kɛ yalɔyihi* dee kaa ke a ya nɔ nɛ a hi si kaa bɔ nɛ i ngɛ nɛ ɔ, e maa hi ha mɛ saminya.+
9 Se ke a nyɛ we nɛ a ye a he nɔ ɔ, lɛɛ a sɛ gba si himi mi, ejakaa e hi saminya kaa a maa sɛ gba si himi mi pe nɛ akɔnɔ ma hyi mɛ tɔ.+
10 Nihi nɛ a sɛ gba si himi mi ɔ lɛɛ, i ngɔ blɔ tsɔɔmi kɛ ngɛ mɛ hae, pi imi, se mohu Nyɔmtsɛ ɔ, kaa yogbayo nɛ e kó je e huno he.+
11 Se ke e ná nɛ e je ɔ, ha nɛ e ya nɔ nɛ e hi si nɛ e ko gba, ke pi jã a, lɛɛ e kɛ e huno ɔ nɛ a ya dla; nɛ e sɛ nɛ huno hu nɛ e je e yo he.+
12 Ni kpa amɛ lɛɛ, i ngɛ dee ke, ee, imi, pi Nyɔmtsɛ ɔ:+ Ke nyɛminyumu ko ngɛ yo nɛ́ e he we yi, nɛ yo ɔ kplɛɛ kaa e kɛ lɛ maa hi si ɔ, e ko je e he;
13 nɛ ke yo ko hu ngɛ huno nɛ́ e he we yi nɛ e huno ɔ kplɛɛ kaa e kɛ lɛ maa hi si ɔ, e ko je e he.
14 Ejakaa a tsu huno ɔ nɛ e he we yi ɔ he kɛ gu e yo ɔ nɔ, nɛ a tsu yogbayo ɔ nɛ e he we yi ɔ hu he kɛ gu nyɛminyumu ɔ nɔ; ke pi jã a, jinɛ nyɛ bimɛ a he be tsɔe, se amlɔ nɛ ɔ lɛɛ a ngɛ klɔuklɔu.
15 Se ke nɔ nɛ e he we yi ɔ ma e juɛmi nya si kaa e maa je ɔ,* lɛɛ ha nɛ e ya; ngɛ si fɔfɔɛ kaa jã mi ɔ, nɔ́ ko fi we nyɛminyumu ko aloo nyɛmiyo ko, mohu ɔ, Mawu tsɛ nyɛ kɛ ha tue mi jɔmi.+
16 Ejakaa yogbayo, kɛ o ma plɛ kɛ le ke ji kaa o ma he o huno ɔ yi wami kɛɛ?+ Aloo huno, kɛ o ma plɛ kɛ le ke ji kaa o ma he o yo ɔ yi wami kɛɛ?
17 Se kɛ̃ ɔ, kaa bɔ nɛ Yehowa* susu kɛ ha nɔ fɛɛ nɔ ɔ, nyɛ ha nɛ nɔ fɛɛ nɔ nɛ e nyɛɛ kaa bɔ nɛ e ngɛ nɛ Mawu kɛ tsɛ lɛ ɔ.+ Nɛ enɛ ɔ he ɔ, i kɛ blɔ tsɔɔmi ngɛ asafo ɔmɛ tsuo hae.
18 Benɛ a ma tsɛ nyumu ko ɔ, anɛ a po lɛ momo lo?+ E ko pee e he mɔmlɔtɔtsɛ hu. A tsɛ nɔ ko be mi nɛ e ji mɔmlɔtɔtsɛ lo? E ko ha nɛ a po lɛ.+
19 Ke a po nɔ ko ɔ, lɔ ɔ pi nɔ́ ko, nɛ jã kɛ̃ lɛ ke a pui nɔ ko hu ɔ, pi nɔ́ ko;+ Mawu kita amɛ a nɔ yemi mohu ji nɔ́ nɛ e he hia.+
20 Si fɔfɔɛ fɛɛ si fɔfɔɛ mi nɛ nɔ fɛɛ nɔ ngɛ nɛ a kɛ tsɛ lɛ ɔ, ha nɛ e hi mi jã.+
21 Anɛ benɛ a ma tsɛ mo ɔ, o ji nyɔguɛ lo? Ko ha nɛ e hao mo;+ se ke o ma nyɛ maa ye o he ɔ, lɛɛ ngɔɔ he blɔ ɔ kɛ pee jã.
22 Ejakaa nɔ fɛɛ nɔ nɛ a tsɛ lɛ ngɛ Nyɔmtsɛ ɔ mi be mi nɛ e ji nyɔguɛ ɔ, e ji nyumu nɛ e ye e he nɛ e ngɛ kɛ ha Nyɔmtsɛ ɔ;+ jã kɛ̃ lɛ nɔ fɛɛ nɔ nɛ a tsɛ lɛ be mi nɛ e ji nyumu nɛ a ngmɛɛ e he ɔ, e ji Kristo nyɔguɛ.
23 A he nyɛ kɛ jua wawɛ;+ nyɛ kpa nyɔguɛ peemi kɛ ha adesahi.
24 Nyɛmimɛ, si fɔfɔɛ fɛɛ si fɔfɔɛ mi nɛ nɔ fɛɛ nɔ ngɛ nɛ a kɛ tsɛ lɛ ɔ, ha nɛ e hi mi jã ngɛ Mawu hɛ mi.
25 Jehanɛ ɔ, ngɛ yihi nɛ a li nyumu aloo nyumuhi nɛ a li yo* ɔ a blɔ fa mi ɔ, i be kita ko nɛ je Nyɔmtsɛ ɔ ngɔ, se i ngɛ ye juɛmi tsɔɔe+ kaa nɔ ko nɛ Nyɔmtsɛ ɔ na lɛ mɔbɔ konɛ e ye anɔkuale.
26 Enɛ ɔ he ɔ, i susu kaa nɔ́ nɛ hi pe kulaa ji kaa nyumu ko maa ya nɔ maa hi si kaa bɔ nɛ e ngɛ ɔ, akɛnɛ wa ngɛ be nɛ mi wa mi amlɔ nɛ ɔ he je.
27 Anɛ a fi mo kɛ mɛtɛ yogbayo he lo? Ko hla kaa a pɛne mo.+ Anɛ o ye o he ngɛ yogbayo he lo? Jɔɔ yo nɛ o maa ngɔ ɔ hlami.
28 Se ke o sɛ gba si himi mi po ɔ, o pee we yayami. Nɛ ke nɔ ko nɛ e sɛ we gba si himi mi sɛ gba si himi mi ɔ, jamɛ a nɔ ɔ pee we yayami. Se ni nɛmɛ nɛ a maa pee jã a maa na amanehlu ngɛ a he lo mi. Se i ngɛ mɔde bɔe kaa ma ha nɛ nyɛɛ ye nyɛ he.
29 Jehanɛ se hu ɔ, nyɛmimɛ, nɔ́ nɛ i ngɛ dee ji kaa be ɔ nɛ piɛ ɔ pi hu.+ Kɛ je amlɔ nɛ ɔ kɛ yaa a, nyɛ ha nɛ nihi nɛ a ngɛ yihi ɔ nɛ a pee kaa nɔ́ nɛ a be eko,
30 nɛ nihi nɛ a foɔ ya a nɛ́ a pee kaa nihi nɛ a fo we ya, nɛ nihi nɛ a nyaa a nɛ a pee kaa nihi nɛ a nya we, nɛ nihi nɛ a heɔ níhi ɔ nɛ a pee kaa nihi nɛ a be nɔ́ ko,
31 nɛ nihi nɛ a kɛ je ɔ ngɛ ní tsue ɔ nɛ a pee kaa ni nɛmɛ nɛ a kɛ tsu we ní kɛ pí si; ejakaa níhi nɛ yaa nɔ ngɛ je nɛ ɔ mi ɔ ngɛ tsakee.
32 Ngɛ anɔkuale mi ɔ, i sume kaa nyɛɛ hi tsui yee. Nyumu nɛ e ngɔɛ yo ɔ yeɔ tsui ngɛ Nyɔmtsɛ ɔ níhi a he, bɔ nɛ e maa pee ha kɛ sa Nyɔmtsɛ ɔ hɛ mi.
33 Se nyumu nɛ e ngɔ yo ɔ yeɔ tsui ngɛ je ɔ mi níhi a he,+ nɔ́ nɛ e maa pee kɛ sa e yo ɔ hɛ mi,
34 nɛ e juɛmi ngɛ ní enyɔ a nɔ. Jehanɛ se hu ɔ, yo nɛ e sɛ we gba si himi mi aloo yo nɛ e li nyumu ɔ yeɔ tsui ngɛ Nyɔmtsɛ ɔ níhi a he+ kaa e maa pee klɔuklɔu ngɛ e nɔmlɔ tso ɔ mi kɛ e mumi ɔ mi hulɔ. Se yo nɛ e sɛ gba si himi mi ɔ yeɔ tsui ngɛ je ɔ mi níhi a he, nɔ́ nɛ e maa pee kɛ sa e huno ɔ hɛ mi.
35 Se i ngɛ enɛ ɔ dee konɛ e hi ha nyɛ nitsɛmɛ, pi kaa ma tsi nyɛ nya,* mohu ɔ, ma wo nyɛ he wami konɛ nyɛɛ pee nɔ́ nɛ sa, nɛ nyɛ sɔmɔ Nyɔmtsɛ ɔ be fɛɛ be nɛ nɔ́ ko nɛ ko je nyɛ juɛmi ngɛ nɔ.
36 Se ke nɔ ko susuɔ kaa akɛnɛ e sɛ we gba si himi mi* he je ɔ, bɔ nɛ e ngɛ e ní pee ha a hí ɔ, ke ji kaa e be nihewi* a we akɔnɔ be ɔ nya a, lɛɛ nɔ́ nɛ e sa kaa e ba ji nɛ ɔ nɛ: Nyɛ ha nɛ e pee nɔ́ nɛ e suɔ; e pee we yayami. Ha nɛ e sɛ gba si himi mi.+
37 Se ke nɔ ko ma nya si ngɛ e tsui mi nɛ nɔ́ ko nyɛ we e nɔ, se e ngɛ nɔ́ nɛ e suɔ kaa e maa pee ɔ nɔ he wami, nɛ e ma nya si ngɛ e tsui mi kaa e maa hi si nɛ e be gba si himi mi sɛe ɔ,* e maa hi ha lɛ.+
38 Jã kɛ̃ lɛ nɔ fɛɛ nɔ nɛ e maa sɛ gba si himi mi ɔ hu ma ná he se, se nɔ fɛɛ nɔ nɛ e be gba si himi mi sɛe ɔ, e ma ná he se saminya.+
39 Be abɔ nɛ yogbayo ko huno ngɛ wami mi ɔ, mlaa fi lɛ.+ Se ke e huno ɔ gbo ɔ,* lɛɛ e ngɛ he blɔ nɛ e kɛ nɔ fɛɛ nɔ nɛ e suɔ ɔ sɛɔ gba si himi mi, se ngɛ Nyɔmtsɛ ɔ mi pɛ.+
40 Se ngɛ ye susumi nya a, ke e hi si kaa bɔ nɛ e ngɛ ɔ, e bua maa jɔ wawɛɛ; nɛ ngɛ anɔkuale mi ɔ, i susu kaa imi hu i ngɛ Mawu mumi ɔ.
Sisi Ningmahi
^ Nɛ tsɔɔ kaa, nyumu kɛ yo be bɔmi náe.
^ Hela munyungu nɛ ji porneiʹa a hiɛhiɛɛ peemi. Hyɛ Munyu Komɛ A Sisi Tsɔɔmi.
^ Aloo “ahoyihi.”
^ Aloo “ma tsɔ e he ɔ.”
^ Hyɛ Mi Tsɔɔmi Munyu A5.
^ Aloo “nihi nɛ a sɛ we gba si himi mi hyɛ.”
^ Ngɛ Hela gbi mi ɔ, “pi nyɛ kuɛ kpa nɛ i ngɛ woe.”
^ Aloo “akɛnɛ e li nyumu loo e li yo.”
^ Aloo “nihewi kɛ yihewi.”
^ Aloo “maa ya nɔ maa hi si kaa nɔ ko nɛ e li nyumu aloo e li yo ɔ.”
^ Ngɛ Hela gbi mi ɔ, “hwɔ mahe ɔ.”
