Yaa mi ní ɔ nɔ

Yaa munyuyi tsɔwi ɔmɛ a nɔ

Yehowa Odasefohi

Dangme

NIHEWI KƐ YIHEWI BIƆ KE

Kɛ Ma Plɛ Kɛ Tsɔɔ Nɔ́ Nɛ I Heɔ Yeɔ Ngɛ Bɔmi Nami He Ha Kɛɛ?

Kɛ Ma Plɛ Kɛ Tsɔɔ Nɔ́ Nɛ I Heɔ Yeɔ Ngɛ Bɔmi Nami He Ha Kɛɛ?

“O ke mɛni—o li nyumu lo?”

Ke o suɔ nɛ o ha heto, nɛ o heto ɔ ji ee ɔ, anɛ o ma nyɛ ma de kɛ nɔ mi mami lo? Munyu nɛ ɔ maa ye bua mo!

 Ke a ke nɔ ko li nyumu aloo e li yo ɔ, mɛni lɔ ɔ tsɔɔ?

E tsɔɔ kaa nɔ ɔ ná we bɔmi hyɛ.

Nihi fuu deɔ ke a ná we bɔmi hyɛ. Se eko ɔ, a kɛ a he wo nyumu kɛ yo yakayaka fiɛmi komɛ a mi hyɛ. Ngɛ anɔkuale mi ɔ, pi nyumu kɛ yo si hwɔ mi pɛ ji bɔmi nami.

Munyu nɛ ji “bɔmi nami” ɔ tsɔɔ níhi fuu. Kaa nɔ hyɛmi nɔ́ ɔ, nyumu tso nɛ a kɛ woɔ nya mi aloo yo he nɛ a lɔɔ, nyumu tso nɛ a kɛ woɔ nɔ abɔɔmi yami he kɛ nɔ kpa fɔmi níhi a he fiɛmi tsuo tsɔɔ bɔmi nami.

Nɔ́ nɛ e sa kaa wa kadi: Nihi nɛ a kɛ a he wo ní peepeehi kaa nyumu tso nɛ a kɛ woɔ nya mi aloo yo he nɛ a lɔɔ, nyumu tso nɛ a kɛ woɔ nɔ abɔɔmi yami he, loo nɔ kpa fɔmi níhi a he fiɛmi mi ɔ be nyɛe ma de kɛ a ná we bɔmi hyɛ.

 Mɛni Baiblo ɔ de ngɛ bɔmi nami he?

Baiblo ɔ tsɔɔ kaa, nyumu kɛ yo nɛ a sɛ gba si himi mi pɛ nɛ e sa kaa a kɛ a he nɛ wo bɔmi nami mi. (Abɛ 5:18) Lɔ ɔ he ɔ, ke o ngɛ hlae nɛ o sa Mawu hɛ mi ɔ, lɛɛ e sɛ nɛ o kɛ o he nɛ wo bɔmi nami ní peepeehi a mi kɛ yaa si benɛ o maa sɛ gba si himi mi.1 Tesalonika Bi 4:3-5.

Ni komɛ deɔ ke nɔ́ nɛ Baiblo ɔ de ngɛ bɔmi nami he ɔ be be, nɛ wa be nyɛe kɛ ma tsu ní mwɔnɛ ɔ. Se o hɛ nɛ e hi nɔ kaa gba puɛmi, hɔ ngɔmi nɛ a hiɛ we blɔ kɛ bɔmi nami mi hiɔ slɔɔtohi pɔ he wawɛɛ mwɔnɛ ɔ. Niinɛ, je nɛ wa ngɛ mi mwɔnɛ ɔ be nyɛe ma ha wɔ jemi bami he mlaa kpakpa ko!1 Yohane 2:15-17.

Ke o susu níhi a he kɛ ya tsitsaa a, o maa na kaa jemi bami he mlaahi nɛ Baiblo ɔ kɛ ha a he ngɛ se nami. Nɔ́ he tomi nɔ́ ko ji nɛ ɔ nɛ: Ngɔɔ lɛ kaa nɔ ko ke mo dɔla 1,000. Anɛ o ma sake sika a kɛ fɔ̃ blɔ he nɛ nɔ ko ba wo lo?

Jã kɛ̃ nɛ e ji ngɛ bɔmi nami blɔ fa mi. Yiheyo ko nɛ a tsɛɛ lɛ ke Sierra nɛ e ye jeha 14 ɔ de ke, “I sume nɛ i kɛ nɔ ko nɛ hwɔɔ se ko po i be lɛ kae ɔ, ma ná bɔmi.” Yiheyo ko nɛ a tsɛɛ lɛ ke Tammy nɛ e ye jeha 17 ɔ hu kplɛɛ nɔ jã. E de ke, “Bɔmi nami ji nike ní titli ko nɛ e sɛ kaa a woɔ he mu”.

Nɔ́ nɛ e sa kaa wa kadi: Baiblo ɔ tsɔɔ kaa ke nɔ ko sɛ we gba si himi mi lolo ɔ, e sɛ kaa e kɛ e he woɔ bɔmi nami ní peepeehi a mi, se mohu ɔ, e ha nɛ e jemi bami he nɛ tsɔ.1 Korinto Bi 6:18; 7:8, 9.

 Mɛni o heɔ yeɔ?

  • Anɛ o he ye kaa nɔ́ nɛ Baiblo de ngɛ bɔmi nami heɔ da aloo e ngɛ kpɛii tsɔ?

  • Anɛ o he ye kaa TƆMI KO BE HE kaa nihi enyɔ nɛ a suɔ a sibi se a sɛ we gba si himi mi lolo ɔ kɛ a he maa wo bɔmi nami mi lo?

Nihewi kɛ yihewi babauu susu sane nɛ ɔ he nɛ a yɔse kaa, ke o kɛ o he wui bɔmi nami ní peepeehi a mi nɛ o ha nɛ o jemi bami he tsɔ ɔ, se nami ngɛ he wawɛɛ. Nihi nɛ a pee jã a pia we a he kɔkɔɔkɔ, nɛ e pee we mɛ kaa nɔ́ ko bɔ mɛ hulɔ. Moo hyɛ nɔ́ nɛ a ti ni komɛ de:

  • “Ye bua jɔ kaa i kɛ ye he wui bɔmi nami mi ní peepeehi a mi! E hi kaa o maa ye o he nɔ konɛ o kɛ o he ko wo bɔmi nami mi ní peepeehi a mi bemi nɛ o sɛ we gba si himi mi lolo.”—Emily.

  • “Ye juami bi komɛ kɛ nyumuhi slɔɔtohi ná bɔmi hyɛ. Ye bua jɔ kaa i pee we jã. Jehanɛ hu, i le kaa bɔmi nami mi hiɔ ko be ye he nɛ lɔ ɔ he susumi ma ha nɛ ma hao.”—Elaine.

  • “Ye juami bi komɛ kɛ ni komɛ nɛ a wa pe mi deɔ ke, a pia a he wawɛɛ kaa a kɛ a he wo bɔmi nami ní peepeehi a mi. E sa nɛ a ko to a tsui si. Imi lɛɛ i sume nɛ ma pia ye he kaa mɛ.”—Vera.

  • “I le nihi fuu nɛ daa nɛ ɔ, a ngɛ tsui yee, ejakaa a kɛ a he wo bɔmi nami mi, aloo a ngɛ plãhi fuu. Enɛ ɔ ha nɛ i na kaa pi si himi kpakpa ji nɛ ɔ.”—Deanne.

Nɔ́ nɛ e sa kaa wa kadi: E sa nɛ o le nɔ́ nɛ o heɔ yeɔ loko o kɛ bɔmi nami he ka nɛ kpe.Yakobo 1:14, 15.

 Mɛni blɔ nɔ o maa gu kɛ tsɔɔ ni kpahi nɔ́ nɛ o heɔ yeɔ?

Ke nɔ ko bi mo nɔ́ nɛ o heɔ yeɔ ngɛ bɔmi nami he ɔ, mɛni o ma de lɛ? Behi fuu ɔ, si fɔfɔɛ nɛ o ma ya je mi ɔ lɛ maa tsɔɔ.

“Ke nɔ ko bi mi jamɛ a sane ɔ konɛ e kɛ ye ye he fɛu ɔ, i be lɛ ngɔe kaa fiɛmi nɔ́. Ma de lɛ ke, ‘Enɛ ɔ lɛɛ pi o kɔmɔ,’ nɛ ma je lejɛ ɔ.”—Corinne.

“E ngɛ dɔ mi wawɛɛ kaa nɔ ko ma bi mo sane kɛ doo o nya kɛkɛ. Ke i yɔse kaa a ngɛ mi bɔmi nami he sane bie kɛ ye ye he fɛu ɔ, i be a nya mi poe kulaa.”—David.

Anɛ o le lo? Be komɛ ɔ, ke nihi bi Yesu sane konɛ a kɛ ye e he fɛu ɔ, e pui a nya mi.Mateo 26:62, 63.

Se ke nɔ ko je bumi mi kɛ bi mo sane nɛ ɔ nɛ pi kaa e kɛ maa ye o he fɛu hu nɛɛ? Ke o susu kaa nɔ ɔ suɔ nɛ e le nɔ́ nɛ Baiblo ɔ de ngɛ sane nɛ ɔ he ɔ, o ma nyɛ maa kane ngmami nɛ ngɛ 1 Korinto Bi 6:18 ɔ kɛ tsɔɔ lɛ. Ngmami ɔ tsɔɔ kaa nɔ nɛ e sɛ we gba si himi mi nɛ e kɛ e he woɔ bɔmi nami mi ɔ yeɔ lɛ nitsɛ e nɔmlɔ tso ɔ awi.

Ke o kɛ Baiblo ɔ ma tsu ní oya nɔuu jio, o kɛ ma tsu ní pee se jio, e sa nɛ o tu munyu kɛ kã. Mo kai kaa e sa nɛ o bua nɛ jɔ yi mi kpɔ nɛ o mwɔ kaa o ma ha nɛ o jemi bami he ma tsɔ ɔ he.1 Petro 3:16.

“Ke o kɛ kã ha heto ɔ, lɔ ɔ tsɔɔ kaa o ngɛ nɔ mi mami nitsɛ ngɛ o hemi kɛ yemi ɔ mi. E tsɔɔ hu kaa, pi nɔ ko nɛ de mo nɔ́ nɛ o pee, se mohu o le kaa jã nɛ e sa kaa o pee.”—Jill.

Nɔ́ nɛ e sa kaa wa kadi: Ke o ngɛ nɔ mi mami ngɛ nɔ́ nɛ o le ngɛ bɔmi nami he ɔ mi ɔ, o ma nyɛ maa tsɔɔ mi kɛ tsɔɔ ni kpahi. Ke o nyɛ pee jã a, nɔ́ nɛ maa je mi kɛ ba a maa pee mo nyakpɛ. Yiheyo ko nɛ a tsɛɛ lɛ ke Melinda nɛ e ye jeha 21 ɔ de ke, “Nihi nɛ i kɛ mɛ tsuɔ ní ɔ de mi ke i bɔ mɔde wawɛɛ kaa i kɛ ye he wui bɔmi nami mi. A nɛ́ lɛ kaa i kpɛ se ngɛ je mi. Mohu ɔ, a buu mi wawɛɛ, nɛ a naa kaa i nyɛɔ yeɔ ye he nɔ.”

Ga Womi! Ke o ngɛ hlae nɛ o ná nɔ mi mami nɛ mi wa ngɛ nɔ́ nɛ o le ngɛ bɔmi nami he ɔ mi ɔ, moo gbla ní kasemi womi nɛ ji, “Bɔ Nɛ O Ma Plɛ Kɛ Tsɔɔ Nɔ́ Nɛ O Heɔ Yeɔ Ngɛ Bɔmi Nami He.” Jehanɛ hu moo hyɛ womi nɛ ji, Questions Young People Ask—Answers That Work ɔ mi.

  •  Kpo 1, Yi 24 ɔ hɛɛ munyuyi nɛ ji, “Will Sex Improve Our Relationship?”

  •  Kpo 2, Yi 5 ɔ hɛɛ munyuyi nɛ ji, “Why Stay a Virgin?”

“Ye bua jɔ bɔ nɛ a tsɔɔ munyu nɛ ɔ mi ha ngɛ ‘Young People Ask’ womi ɔ mi ɔ he. Kaa nɔ hyɛmi nɔ́ ɔ, ngɛ kpo 1 ɔ we ba fa 187 ɔ mi ɔ, a tsɔɔ nya kaa ke o kɛ o he wo bɔmi nami mi loko o sɛ gba si himi mi ɔ, e ngɛ kaa nɔ́ nɛ o ngɔ kuɛ ní ko nɛ he jua wa kɛ ke nɔ ko yaka gu. Bu be o he hie hu. Ba fa 177 ɔ hu tsɔɔ kaa ke o ná bɔmi loko o sɛ gba si himi mi ɔ, e ngɛ kaa nɔ́ nɛ o ngɔ foni ko nɛ ngɛ fɛu wawɛɛ kɛ pee tsu nya tako. Se nɔ́ hetomi nɔ́ nɛ ye bua jɔ he wawɛɛ ji nɔ́ nɛ ngɛ kpo 2 ɔ mi ngɛ ba fa 54 ɔ. E de ngɛ lejɛ ɔ kpiti ke: ‘Ke o kɛ o he wo bɔmi nami mi loko o sɛ gba si himi mi ɔ, e ngɛ kaa nɔ́ nɛ o ya bli nike ní ko nya loko a kɛ ba ha mo.’ E ngɛ kaa nɔ́ nɛ o ngɛ nɔ nɛ o kɛ lɛ maa sɛ gba si himi mi hwɔɔ se ɔ nɔ́ ko jue.”—Victoria.